Myeelwe
22 Mpawo ma-Israyeli bakazwa baakukkala kumabuwa aakuMowabbu, mutaleeliya aaJodani kuti kuli muJerikko. 2 Bbalakki mwana waZipori wakabona zyoonse ma-Israyeli nzibakachita kuma-Amori 3 alubo Mowabbu wakabayoowa loko bantu aaba, nkaambo bakali biingi loko. Kwaamba choonzyo, Mowabbu wakamana akuyoowa akaambo kama-Israyeli. 4 Nkinkaako, Mowabbu wakati kubaalu bamaMidiyani: “Mbungano eeyi ilanyonyoona myuunzi yesu yoonse mbuli pule wang’ombe mbanyonyoona masokwe.”
Aachiindi eechi, Bbalakki mwana waZipori nguwe wakali mwaami wamaMowabbu. 5 Wakatuma batumwa kuli Bbalamu mwana waBbewori kuPetori, iili kumbali aaMulonga muchisi chakwe.* Wakamwiita kati: “Bona! Kuli bantu basika kuzwa ku-Ijipita. Bazula nyika yoonse alubo bakkede kunembo lyangu. 6 Lino ndakumbila kaka, sika uzootuke bantu aaba nkaambo bali aamanguzu kwiinda ndime. Amwi ndalikunoobazunda akubatanda kuti bazwe munyika eeyi, nkaambo ndilizi kuti ooyo ngulongezya* ulalongezegwa akuti ooyo ngutuka ulatukwa.”
7 Nkinkaako, baalu bakuMowabbu abaalu bakuMidiyani bakeenda aamali yakusondya mumaboko aabo kuli Bbalamu mpawo bakamubuzya mulumbe waBbalakki. 8 Naakamvwa oobo, wakati kulimbabo: “Amoone ookuno mpawo ndilamubuzya kufumbwa Jehova nzyataambe kulindime.” Nkinkaako, balupati-pati bamaMowabbu bakakkala aaBbalamu.
9 Mpawo Leza wakasika kuli Bbalamu wati: “Mbaani baalumi aabo mbulaabo?” 10 Bbalamu wakati kuli Leza wakasimpe: “Bbalakki, mwana waZipori mwaami wamaMowabbu watuma mulumbe kulindime wakuti, 11 ‘Bona! Bantu bazwa ku-Ijipita bazula munyika. Kuza uzoobatuke. Amwi ndalikunoobalwana akubatanda.’” 12 Mpawo Leza wakati kuli Bbalamu: “Utayinkaabo pe alubo utabatuki pe bantu aaba nkaambo balilongezedwe.”
13 Bbalamu wakabuka kuseeni mpawo wakati kuli balupati-pati baBbalakki: “Amwiinke kunyika yanu nkaambo Jehova wakaka kuti ndiinke aandinywe.” 14 Nkinkaako, balupati-pati bakuMowabbu bakazwa, babweeda kuli Bbalakki mpawo bakati: “Bbalamu wakaka kuza aandiswe.”
15 Nikuba oobo, Bbalakki wakatuma bamwi balupati-pati biingi alubo balemekwa loko kwiinda bakusaanguna. 16 Bakasika kuli Bbalamu mpawo bakati kulinguwe: “Nzezi nzyaamba Bbalakki mwana waZipori, ‘Inche kaka utazumizyi kufumbwa chintu kuti chikukachizye kuza kulindime, 17 nkaambo ndizookulemeka loko alubo ndilakuchitila kufumbwa nchutandibuzye kuti ndikuchitile. Nkinkaako, kuza utuke bantu aaba.’” 18 Pesi Bbalamu wakabuzya babelesi baBbalakki kuti: “Nikuba kuti Bbalakki wandipa ng’anda yakwe kayizwide nsiliva angolida, tandikoochita kufumbwa chintu chiteendelani aamalayilile aaJehova Leza wangu, kufumbwa kuti nchiniini naakuti nchipati. 19 Pesi ndikumbila kuti andinywe moone kuchitila kuti ndizibe kuti nziizili zimwi Jehova nzyatandibuzye.”
20 Leza wakasika kuli Bbalamu mansiku mpawo wakati kulinguwe: “Kuti kakuli baalumi aaba batumwa kuti bazookwiite, yinka aambabo, pesi weelede kuyoowamba majwi nginditakubuzye kuti waambe kupela.” 21 Nkinkaako, Bbalamu wakabuka kuseeni mpawo wakatanta donki lyakwe,* wiinka abalupati-pati bakuMowabbu.
22 Pesi Leza wakanyema loko akaambo kakuti wakayinka, nkinkaako, ngilozi yaJehova yakayimikila mumugwagwa kuti imukasye. Bbalamu wakatantide donki lyakwe kali aababelesi bakwe babili. 23 Donki nilyakabona ngilozi yaJehova kayiimvwi munzila kayijisi panga, lyakaleya lyanjila musokwe. Pesi Bbalamu wakasaanguna kulyuuma loko kayanda kuti libweede munzila. 24 Mpawo ngilozi yaJehova yakayimikila mukazila kakamanikide kakali aakati kamyuunda yamisaansa iibili, ooko kwakali miduli yamabwe kumabazu woonse. 25 Donki nilyakabona ngilozi yaJehova, lyakasaanguna kulimanikizya aamuduli alubo lyakasyanikizya kuulu kwaBbalamu aamuduli mpawo Bbalamu wakasaanguna kulyuuma lubo.
26 Ngilozi yaJehova yakayinka lubo kunembo, yaakwiimikila aandawu iimanikide loko zyakuti teekwakali kwiindika pe kuchilisyo naakuti kuchimweensi. 27 Donki nilyakabona ngilozi yaJehova, lyakalala aansi, nkinkaako, Bbalamu wakanyema loko alubo wakaliswini kulyuuma ankoli yakwe. 28 Kumamanino, Jehova wakapa kuti donki lyaambuule mpawo lyakati kuli Bbalamu: “Ndakuchitaanzi chapa kuti unduume kwaziindi eezi zitatu?” 29 Bbalamu wakati kudonki: “Nkaambo wandifubaazya. Kaansinga ndili aapanga mukuboko kwangu, ndalikunookujaya!” 30 Donki lyakati kuli Bbalamu: “Tandili donki lyako na ndwaali kutanta kwabuumi bwako boonse kusika sunu? Kuli nindakakuchitila zili boobu na?” Bbalamu wakati: “Peepe.” 31 Jehova wakajula meso aaBbalamu mpawo wakabona ngilozi yaJehova kayiimvwi munzila, kayijisi panga mukuboko kwayo. Aachiindi nchicheecho, wakavuntama aansi mpawo walanga aansi.
32 Mpawo ngilozi yaJehova yakati kulinguwe: “Walyuuminaanzi donki lyako kwaziindi eezi zitatu? Ndime biya ndasika kuzookukasya nkaambo nzulikuchita tazyeendelani pe aakuyanda kwangu. 33 Donki lyandibona mpawo lyandileya kwaziindi eezi zitatu. Kaansinga teelyachita oobo nikuli ndakujaya mpawo kandisiya donki kalipona.” 34 Bbalamu wakati kungilozi yaJehova: “Ndabisya nkaambo teendazi pe kuti nduwe walikwiimikila munzila kuti undiswaane. Kuti eezi kazitali kabotu mumeso aako, ndilakonzya kubweeda.” 35 Pesi ngilozi yaJehova yakati kuli Bbalamu: “Yinka aabaalumi aaba, pesi waambuule majwi nginditakubuzye kupela.” Nkinkaako, Bbalamu wakayinkilila kunembo kweenda aabalupati-pati baBbalakki.
36 Bbalakki mbaakamvwa biyo kuti Bbalamu wasika, wakayinka kuti akamuswaane mumuunzi waMowabbu, kunkomwe ya-Anoni kumugaano wachilawu eecho. 37 Bbalakki wakati kuli Bbalamu: “Teendakakutumina bantu na kuti usike? Wakalekelaanzi kusika? Wakali kubonaanga tandikonzyi na kukupa bulemu bupati?” 38 Bbalamu wakasandula Bbalakki kati: “Ndasika lino. Pesi tandizumizigwi pe kwaamba nzindiyanda. Majwi nginditaambe ngaayo Leza ngatabikke mumulomo wangu kupela.”
39 Nkinkaako, Bbalamu wakayinka aaBbalakki mpawo bakasika kuKkiriyati-huzoti. 40 Bbalakki wakapayizya ng’ombe ambelele mpawo zimwi wakazitola kuli Bbalamu akuli balupati-pati mbaakalaabo. 41 Kuseeni, Bbalakki wakabweza Bbalamu, watantaawe kuBbamoti-bbaala ooko nkwaakali kukonzya kubona bantu boonse.