Myeelwe
23 Mpawo Bbalamu wakati kuli Bbalakki: “Yaka zipayililo zili musanu azibili aandawu eeyi alubo undibambile bapule bang’ombe bali musanu ababili abagutu bali musanu ababili.” 2 Aachiindi nchicheecho, Bbalakki wakachita mbuli mbaakabuzigwa aaBbalamu. Bbalakki aBbalamu bakapa pule wang’ombe uumwi amugutu uumwi aachipayililo chimwi achimwi. 3 Bbalamu wakati kuli Bbalakki: “Syaala aawa kumbali aachipo chako chitentwa mpawo ime ndilayinka. Amwi Jehova ulaambuula aandime. Kufumbwa nzyatandibuzye ndilakubuzya.” Nkinkaako, wakatanta aakalundu katakwe chintu.
4 Leza wakaambuula aaBbalamu mpawo Bbalamu wakati kulinguwe: “Ndabamba zipayililo zili musanu azibili kazitobelene mpawo ndapa pule wang’ombe uumwi amugutu uumwi aachipayililo chimwi achimwi.” 5 Mpawo Jehova wakabikka majwi mumulomo waBbalamu aakuti: “Bweeda kuli Bbalakki alubo nzezi nzweelede kwaamba.” 6 Nkinkaako, wakabweeda alubo wakabona Bbalakki abamwi balupati-pati bakuMowabbu kabayimvwi kumbali aachipo chakwe chitentwa. 7 Mpawo wakaambuula kaambyo aaka kakuti:
“Bbalakki Mwaami waMowabbu wakandeeta kuzwa ku-Aramu,
Kuzwa kuzilundu zyakubuzwezuba wakati:
‘Kuza uzootuke Jakkobo.
Kwaamba choonzyo, kuza uzoosampule Israyeli.’
8 Nga ndilabatuka biyeni bantu Leza mbatatukide pe?
Alubo nga ndilabasampula biyeni bantu Jehova mbatasampwide pe?
9 Kuzwa aajulu aamabwe ndilibabwene,
Alubo kuzwa aajulu aazilundu ndilibabwene.
Bantu aaba bakkala aabalikke,
Tabalibalilizyi pe aakati kazisi.
10 Ngwani uukonzya kubala bana baJakkobo biingi mbuli museele
Nikuba kubala chipanzi chimwi chazipanzi zine zya-Israyeli?
Andifwe biyo mbuli mbubafwa bantu baluleme,
Amamanino aangu aabe mbuli aabo.”
11 Mpawo Bbalakki wakati kuli Bbalamu: “Niinzi nzwaandichitila? Ndakweetela kuzootuka basinkondoma, pesi iwe ulikubalongezya* biya.” 12 Wakamusandula kati: “Tandeelede kwaamba kufumbwa zintu Jehova nzyabikka munkanwa lyangu na?”
13 Bbalakki wakati kulinguwe: “Inche kaka ndikumbila kuti twiinkaamwi kuliimwi ndawu nkukonzya kubabona. Ulabona chipanzi chabo kupela, tukoobabona pe boonse. Batuke bantu aaba kuli nkukooko.” 14 Nkinkaako, wakamubweza wayinkaawe kulusaka lwaZofimu aajulu aaPisiga alubo wakayaka zipayililo zili musanu azibili mpawo wapa pule wang’ombe uumwi amugutu uumwi aachipayililo chimwi achimwi. 15 Bbalamu wakati kuli Bbalakki: “Kkala aawa kumbali aachipo chako chitentwa ime nindichiinka kuyoowambuula aaLeza aalya.” 16 Mpawo Jehova wakaambuula aaBbalamu akubikka majwi aaya munkanwa lyakwe: “Bweeda kuli Bbalakki alubo nzezi nzweelede kwaamba.” 17 Nkinkaako, wakabweeda kulinguwe mpawo wakamujana kakkede kumbali aachipo chakwe chitentwa alubo balupati-pati bakuMowabbu bakalaamwi anguwe. Bbalakki wakabuzya kuti: “Jehova watyeni?” 18 Mpawo wakaamba kaambyo aaka kakuti:
“Nyampuka Bbalakki uswiilile.
Mvwa nzinditaambe, O mwana waZipori.
19 Leza tali mbuli muntu uubeja
Alubo tali mbuli mwanaamuntu uuchincha mizeezo yakwe.*
Kuti waamba chimwi chintu, tachichiti na?
Nzyaamba tazizuzikizyi na?
20 Bona, ndeetwa kuti ndizoolongezye,
Lino Leza walongezya alubo tandikonzyi pe kuzichincha.
21 Tazumizyi kuti Jakkobo achitikilwe zintu zyamasalamusi,
Alubo tazumizyi kuti Israyeli aswaane penzi.
Jehova Leza wakwe ulaabo,
Alubo ulikutembawulwa aajwi pati mbuli mwaami aakati kabo.
22 Leza ulikubagwisya mu-Ijipita.
Uli mbuli meja aapule wang’ombe yamusokwe aakati kabo.
23 Taakwe chiposo chikonzya kutuminwa Jakkobo,
Naakuti kusonda kukonzya kuchisa Israyeli.
Aachiindi eechi, kulakonzya kwaambwa kuti atala aJakkobo a-Israyeli:
‘Bona nzyachita Leza!’
24 Mbaba bantu batazoonyampuke mbuli mulavu,
Bazoonyampuka mbuli mulavu.
Tabakoolala aansi kusikila balye munyama ngubajata
Akunywa ganzi lyabanyama bajayigwa.”
25 Bbalakki wakati kuli Bbalamu: “Kuti kutakonzyi kumutuka, nkukwaamba kuti toyelede kumulongezya pe.” 26 Bbalamu wakati kuli Bbalakki: “Teendakubuzya na kuti, ‘Ndilachita zyoonse Jehova nzyatandibuzye’?”
27 Bbalakki wakati kuli Bbalamu: “Inche ndikumbila kuti usike twiinkaamwi kuliimwi ndawu. Amwi ooko nkuko kutabe kabotu mumeso aaLeza wakasimpe kuti unditukile bantu aaba.” 28 Nkinkaako, Bbalakki wakabweza Bbalamu akumutola aajulu aaPeyori iilangene aaJeshimoni.* 29 Mpawo Bbalamu wakati kuli Bbalakki: “Yaka zipayililo zili musanu azibili aandawu eeyi alubo undibambile bapule bang’ombe bali musanu ababili abagutu bali musanu ababili.” 30 Nkinkaako, Bbalakki wakachita mbuli mbaakamubuzya Bbalamu. Wakapa pule wang’ombe uumwi amugutu uumwi aachipayililo chimwi achimwi.