Joshuwa
3 Mpawo Joshuwa wakafuma kuseeni aamwi ama-Israyeli boonse, bazwa kuShitimu baakusika kuJodani. Bakoona nkukooko kabatanazubuka pe.
2 Nikwakayinda mazuba aatatu, basilutwe bakayinda mukkeempu 3 mpawo bakalayilila bantu kabati: “Nimwabona bbokesi lyachizuminano chaJehova Leza wanu kalinyampwidwe aabapayizi maLevi, mweelede kuzwa aandawu zyanu mulitobele. 4 Mweelede kweendela kule-kule andilyo amamita aasika ku 900; mutasweni aafwiifwi pe andilyo kuchitila kuti muzibe nzila njimweelede kweendela nkaambo nzila eeyi tamunayibelesya pe.”
5 Joshuwa wakabuzya bantu kuti: “Amulisalazye, nkaambo juunza Jehova uzoochita zintu zigambya aakati kanu.”
6 Mpawo Joshuwa wakabuzya bapayizi kuti: “Amunyampule bbokesi lyachizuminano mutunge kunembo lyabantu.” Nkinkaako, bakanyampula bbokesi lyachizuminano mpawo bakatunga kunembo lyabantu.
7 Jehova wakabuzya Joshuwa kuti: “Sunu ndilasaanguna kukusumpula kunembo lyama-Israyeli boonse kuchitila kuti bazibe kuti ndinooli aanduwe mbuli mbundakali aaMozesi. 8 Weelede kulayilila bapayizi banyampwide bbokesi lyachizuminano kuti: ‘Nimwasika aasaangunina maanzi aaJodani, mweelede kwiimikila nji, muli Jodani.’”
9 Mpawo Joshuwa wakabuzya ma-Israyeli kuti: “Amuze muzoomvwe majwi aaJehova Leza wanu.” 10 Mpawo Joshuwa wakati: “Eezi nzizyo zitape kuti muzibe kuti Leza uupona uli aakati kanu akuti uzoobatanda kunembo lyanu maKkenani, maHeti, maHivi, maPerezi, maGigashi, ma-Amori amaJebbusi. 11 Amubone! Bbokesi lyachizuminano lyaMwaami wanyika yoonse lili kutunga kunembo lyanu kuya muJodani. 12 Amubweze baalumi bali 12 kuzwa kumisyobo ya-Israyeli, mwaalumi uumwi kuzwa kumusyobo umwi awumwi, 13 mawulu aabapayizi banyampwide Bbokesi lyaJehova Mwaami wanyika yoonse mbaatagume biyo maanzi aamuli Jodani, maanzi aamuli Jodani aazwida kujulu alayimikila abe dambwa.”*
14 Bapayizi bakanyampwide bbokesi lyachizuminano bakatunga kunembo lyabantu, bantu nibakazwa mumatente aabo kabatanazubuka Jodani. 15 Bapayizi bakanyampwide Bbokesi nibakasika aali Jodani, amawulu aabo mbaakanjila biyo mumaanzi (Jodani ulapawula mazuba woonse aakutebula), 16 maanzi aakali kukunka kaazwa aajulu akayimikila aba dambwa,* kule loko ku-Adamu, imuunzi uuli aafwiifwi aZaretani, mpawo maanzi aakali kukunka kaaya kuLwizi lwa-Arabba, nkukwaamba Lwizi lwaMunyo* akayuminina. Maanzi akayimikila, mpawo bantu bakazubukila aandawu iilangene aaJerikko. 17 Bapayizi bakabwezede bbokesi lyaJehova lyachizuminano nibakayimvwi aanyika njumu aakati kaJodani, ma-Israyeli boonse bakazubuka aanyika njumu kusikila boonse bamaninina kuzubuka Jodani.