Joshuwa
6 Muunzi waJerikko wakajalwa akusinkwa akaambo kama-Israyeli; taakwe muntu wakali kuzwa nikuba kunjila.
2 Mpawo Jehova wakabuzya Joshuwa kuti: “Muunzi waJerikko amwaami wawo abasilumamba bawo bali aamanguzu ndababikka mukuboko kwako. 3 Inywe nibaalumi boonse nimulwana nkondo mweelede kuzyunguluka muunzi kamwi. Nzimweelede kuchita kwamazuba aali musanu alimwi. 4 Akube bapayizi bali musanu ababili, umwi awumwi wabo abweze mweembo walwija lwamugutu beende kunembo lyaBbokesi. Pesi mubuzuba bwamusanu aabili, mweelede kuzyunguluka muunzi kwaziindi zili musanu azibili mpawo bapayizi balizye myeembo. 5 Nikwalizigwa mweembo—nkokuti, mbumutamvwe biyo kulila kwamweembo—bantu boonse beelede koompolola loompololo lupati lwankondo, mpawo muduli wamuunzi ulawida aansi kuti mbombombo, bantu beelede kunjila mumuunzi, umwi awumwi kalangide kunembo.”
6 Nkinkaako, Joshuwa mwana waNuni wakayita bapayizi mpawo wakababuzya kuti: “Amunyampule bbokesi lyachizuminano alubo bapayizi bali musanu ababili, umwi awumwi abweze mweembo walwija lwamugutu aye kunembo aaBbokesi lyaJehova.” 7 Mpawo wakabuzya bantu kuti: “Amweende muzyunguluke muunzi, mpawo nkamu yamasooja iili aazilwanisyo yeelede kweendela kunembo aaBbokesi lyaJehova.” 8 Bapayizi bali musanu ababili bakajisi myeembo iili musanu ayibili ibakali kunembo aaJehova bakatunga kunembo kabalikulizya myeembo alubo Bbokesi lyachizuminano chaJehova lyakali kubatobela musule mbuli Joshuwa mbaakabuzizye bantu. 9 Nkamu yamasooja yakali aazilwanisyo yakatunga kunembo aabapayizi bakali kulizya myeembo mpawo imwi nkamu yamasooja yakali kutobela musule aaBbokesi chiindi myeembo niyakali kulizigwa.
10 Joshuwa wakalayilila kuti: “Mutoompololi pe alubo majwi aanu atamvwiki pe. Kutazwi jwi niliba limwi munkanwa lyanu kusikila mubuzuba ninditazoowambe kuti, ‘Amoompolole!’ Mpawo muzoompolole.” 11 Wakapa kuti Bbokesi lyaJehova lizyunguluke muunzi kamwi biyo mpawo nibakamaninsya bakabweeda kukkeempu baakoona nkukooko.
12 Mubuzuba bwakatobela, Joshuwa wakafuma mpawo bapayizi bakanyampula Bbokesi lyaJehova, 13 alubo bapayizi bali musanu ababili bakajisi myeembo iili musanu ayibili bakeenda kunembo aaBbokesi lyaJehova kabalikulizya myeembo eeyo. Nkamu yamasooja yakali aazilwanisyo yakatunga kunembo lyabo mpawo imwi nkamu yamasooja yakali kutobela musule aaBbokesi lyaJehova chiindi myeembo niyakali kulizigwa. 14 Bakazyunguluka muunzi kamwi mubuzuba bwachibili, nibakamaninsya bakabweeda kukkeempu. Eezi nzibakachita kwamazuba aali musanu alimwi.
15 Mubuzuba bwamusanu aabili, bakafuma bazyunguluka muunzi mbuli mbubakali kuchita lubbe kwaziindi zili musanu azibili. Oobu mbubuzuba abulikke nibakazyunguluka muunzi kwaziindi zili musanu azibili. 16 Aachiindi chamusanu azibili, bapayizi bakalizya myeembo, mpawo Joshuwa wakabuzya bantu kuti: “Amoompolole, nkaambo Jehova wamupa muunzi ooyu! 17 Muunzi ooyu azintu zyoonse zili mulinguwo zyeelede kunyonyoonwa, zyoonse nzizyaJehova. Rahabbu, wuule, alikke abantu boonse bali mung’anda mbabo beelede kusyaala kabapona nkaambo wakasisa batumwa mbitwakatumide. 18 Mutasweni aafwiifwi achintu cheelede kunyonyoonwa, kuchitila kuti mutachilombozyi akuchibweza, nkaambo kuti mwachita oobo, kkeempu yama-Israyeli ilaba chintu cheelede kunyonyoonwa akusikilwa aamapenzi. 19 Pesi nsiliva yoonse angolida azintu zyakkopa azyansimbi zilasalala, nzizyaJehova. Zyeelede kubikkwa muchibikkilo chaJehova chazintu ziyandikana.”
20 Mpawo bantu bakoompolola myeembo niyakalizigwa. Bantu mbubakamvwa biyo kulila kwamyeembo bakoompolola loompololo lupati lwankondo, muduli wakawida aansi wati mbombombo. Mpawo bantu bakanjila mumuunzi, umwi awumwi kalangide kunembo, bawubweza. 21 Bakanyonyoona zintu zyoonse zyakali mumuunzi apanga, mwaalumi amwanakazi, kacheche amudaala, ngombe, mbelele amadonki.
22 Joshuwa wakati kubaalumi bakayinkide kuyoolanga-langa nyika: “Amunjile mung’anda yawuule eeliya, mugwisye mwanakazi uulya abantu boonse bamung’anda yakwe mbuli mbumwakakonka kulinguwe.” 23 Nkinkaako, balombe bakatumidwe kuyoolanga-langa nyika bakanjila bagwisya Rahabbu aamwi awisi abanyina abanyaandumi bakwe abantu boonse bamung’anda yakwe; bakagwisya mpuli yakwe yoonse mpawo bakayitola kundawu iili kunze aakkeempu yama-Israyeli kakutakwe uulichiside pe.
24 Mpawo bakatenta muunzi azintu zyoonse zyakali mulinguwo. Pesi nsiliva, ngolida azintu zyakkopa azyansimbi bakazibikka muchibikkilo chazintu ziyandikana zyamung’anda yaJehova. 25 Wuule Rahabbu abamung’anda yawisi abamung’anda yakwe boonse mbabo kupela bakafutulwa aaJoshuwa; alubo Rababbu uchikkala mu-Israyeli kusikila sunu, nkaambo wakasisa batumwa mbaakatumide Joshuwa kuti bakalange-lange Jerikko.
26 Aachiindi eecho, Joshuwa wakaambilizya chikonke eechi: “Ulitukidwe kunembo lyaJehova muntu uuyakulula muunzi ooyu waJerikko. Naazoobikka ntalisyo, uzoofwidwa mwanaakwe wakusaanguna alubo naazoobikka milyango yawo, uzoofwidwa keela kakwe.”
27 Jehova wakali aaJoshuwa alubo mpuwo yakwe yakazula munyika yoonse.