Joshuwa
2 Mpawo Joshuwa mwana waNuni wakatuma baalumi babili chakusisikizya kuzwa kuShitimu kuti bakalange-lange nyika. Wakababuzya kuti: “Amwiinke mukalange-lange nyika, kapati Jerikko.” Nkinkaako, bakayinka baakunjila mung’anda yawuule litegwa Rahabbu mpawo bakakkala mumoomo. 2 Mwaami waJerikko wakabuzigwa kuti: “Kwasika baalumi bachi-Israyeli mansiku kuzoolanga-langa nyika.” 3 Amvwe oobo, mwaami waJerikko wakatuma jwi kuli Rahabbu lyakuti: “Gwisya baalumi basika, bakkede mung’anda yako, nkaambo baza kuzoolanga-langa nyika yoonse.”
4 Pesi mwanakazi ooyo wakabweza baalumi aabo wabasisa, mpawo wakati: “Iiyi, baalumi balizide kulindime, pesi tandizi pe kuti bazwa kuli. 5 Bazwa nikwasiya-siya, geedi lyamuunzi nilyali lyaba aafwiifwi kujalwa. Tandizi pe kuti batozya kuli, pesi kuti mwabatobela chakufwambaana mulabeenzya.” 6 (Nikuba oobo, wakali wabatola aajulu aang’anda wabasisa mumakuba aafulakisi aakayalidwe aajulu aang’anda.) 7 Nkinkaako, baalumi aabo bakabatobela kabatozya kumazubukilo aaJodani mpawo geedi lyamuunzi lyakajalwa basikubatobela nibakazwa.
8 Baalumi aabo kabatanoona, Rahabbu wakayinka kulimbabo aajulu aang’anda. 9 Mpawo wakati kulimbabo: “Ndilizi kuti Jehova ulamupa nyika eeyi alubo toonse tuliyoowede aakambo kandinywe. Bantu boonse bamunyika iino bamana manguzu akaambo kandinywe, 10 nkaambo twakamvwa Jehova mbaakayuminizya maanzi aamuLwizi Lusalala kunembo lyanu nimwakazwa ku-Ijipita anzimwakachita kubaami babili bama-Amori, Sihoni a-Ogi mbimwakanyonyoona mutaleeliya* aaJodani. 11 Nitwakamvwa makani aaya, myoyo yesu yakayaaya alubo taakwe uulaachibindi akaambo kandinywe nkaambo Jehova Leza wanu, nguLeza uuli kujulu lyamajulu akunsi aanyika. 12 Inche ndakombelela, amukonke kulindime kwiinda muli Jehova, kuti mbukunga ndamutondeezya luyando lutamani andinywe mweelede kubatondeezya luyando lutamani bamung’anda yandeende. Mweelede kundipa chitondeezyo chisyomeka. 13 Mweelede kufutula ndeende abaama abana babaama azintu zyoonse nzibalaazyo. Mweelede kutuvuna kulufu.”
14 Baalumi aabo bakati kulinguwe: “Tulapa buumi bwesu akaambo kandinywe! Kuti teemwabbulula makani aali atala alweendo lwesu, tuzookutondeezya luyando lutamani akusyomeka, Jehova natazootupe nyika eeyi.” 15 Mpawo mwanakazi ooyo wakabaselusizya aawindo kabelesya ntambo, nkaambo ng’anda yakwe yakali kumuduli wamuunzi. Kwaamba choonzyo, wakali kukkala kumuduli. 16 Mpawo wakati kulimbabo: “Amwiinke kuchilawu chili aazilundu, mukayube nkuko kwamazuba aatatu kuchitila kuti aabo balikumutobela batamujani pe. Mpawo nibaboola basikumutobela mulakonzya kwiinkilila kunembo alweendo lwanu.”
17 Baalumi aabo bakati kulinguwe: “Kuti tutazoobi aamulandu kuchikonke eechi nchwaapa kuti tukonke, 18 uzoowange ntambo eeyi iisalala aawindo mpuwatuselusizya twazooboola munyika eeyi. Mung’anda yako, weelede kunjinzya wuso, banyoko, banyaandumi bako abantu boonse bamung’anda yawuso. 19 Kufumbwa muntu uutazoozwe mung’anda yako akuya aanze, iganzi lyakwe lizooba aamutwe wakwe, iswe tatunoolikwe mulandu pe. Pesi kuti muntu uutanooli aamwi anduwe mung’anda wasikilwa mapenzi,* ganzi lyakwe lizooba aamitwe yesu. 20 Pesi kuti wabbulula makani aali atala alweendo lwesu, tatunoolikwe mulandu pe kuchikonke eechi nchwaapa kuti tukonke.” 21 Mwanakazi ooyo wakati: “Akube mbuli mbumwaamba.”
Wakabaleka kuti beende mpawo bakayinka. Kuzwa waawo, wakazoowanga ntambo iisalala aawindo. 22 Nkinkaako, bakazwa baya kuchilawu chili aazilundu baakukkala nkuko kwamazuba aatatu, kusikila nibakaboola basikubatobela. Basikubatobela aabo bakali kubayanduula munzila zyoonse, pesi teebakababona pe. 23 Baalumi aabo babili bakaseluka kuzwa muchilawu chili aazilundu bazubuka mulonga baya kuli Joshuwa mwana waNuni. Bakamubuzya zintu zyoonse zyakabachitikila. 24 Mpawo bakati kuli Joshuwa: “Jehova watupa nyika yoonse. Kwaamba choonzyo, bantu boonse bakkala munyika iilya baliyoowede akaambo kandiswe.”