Joshuwa
16 Nyika yakapegwa bana baJosefa kwiinda mukuuma chisale* yakali kusaangunina kuJodani, kuJerikko, kuyoosika kumaanzi aaJerikko aali kubuzwezuba kwaJerikko, kayiinda munkanda kuzwa kuJerikko kuya kuchilawu chili aazilundu chaBbeteli. 2 Yakali kuzwa aaBbeteli yakuLuzi kayiinda kuyoosika kumugaano wama-Akkiti ku-Ataroti, 3 mpawo yakali kukunuka kiitozya kububbila kumugaano wamaJafeliti kuyoosika kumugaano waBbeti-horoni Yamunsi aGezeri alubo yakali kugolela kulwizi.
4 Nkinkaako, bana baJosefa, Manase a-Efremu, bakabweza nyika yabo. 5 Ngoyu mugaano wabana ba-Efremu kweendelana ampuli zyabo: Mugaano walukono lwabo nkuuli kubuzwezuba, wakali Ataroti-adari kuyoosika kuBbeti-horoni Yaajulu, 6 alubo mugaano wakali kusika kulwizi. Mikkimetati yakali kubbazu lyakunyika alubo mugaano wakali kuzyunguluka kubuzwezuba kuya kuTaanati-shilo alubo wakayinda kubuzwezuba kwaJanowa. 7 Mpawo wakakunuka kuzwa kuJanowa waya ku-Ataroti akuNaara waakusika kuJerikko kuyoosika kuJodani. 8 Mugaano wakazwa kuTapuwa watozya kububbila kumusena waKkana waakugolela kulwizi. Oolu nduulukono lwamusyobo wa-Efremu kweendelana ampuli zyabo; 9 bana ba-Efremu bakali aayimwi myuunzi atuunzi mulukono lwaManase.
10 Pesi teebakabatanda pe maKkenani bakali kukkala muGezeri. MaKkenani bachikkala aakati kabana ba-Efremu kusikila sunu alubo bakapa kuti babeleke milimu iimizya.