Babetesi
4 Naakafwa Ehudi, ma-Israyeli bakasaanguna lubo kuchita zintu zibi mumeso aaJehova. 2 Mpawo Jehova wakababikka mukuboko kwaJabbini, mwaami waKkenani wakali kweendelezya muHazori. Silutwe wamasooja aakwe wakali Sisera, wakali kukkala muHarosheti yazisi.* 3 Ma-Israyeli bakalilila Jehova nkaambo Jabbini wakali aangolo zyankondo zili 900 zyakali aansimbi zibosya mumavili.* Wakadyaaminina ma-Israyeli chalunya kwaminyaka iili 20.
4 Dibbora mupolofita wachanakazi, mwanakazi waLapidoti wakali kubeteka ma-Israyeli kuchiindi eecho. 5 Wakali kukkala munsi aamukunka waDibbora uuli aakati kaRama aBbeteli muchilawu chili aazilundu cha-Efremu; ma-Israyeli bakali kwiinka kulinguwe kuti bakamvwe mbeta zyaLeza. 6 Wakalayilila kuti kweetwe Bbarakki mwana wa-Abbinowamu kuKkedeshi-nafutali mpawo wakati kulinguwe: “Jehova Leza wa-Israyeli taalayilila na? ‘Yinka* kuChilundu chaTabbori abaalumi bali 10 000 bamusyobo waNafutali awaZebbuloni. 7 Ndilakweetela Sisera silutwe wamasooja aaJabbini kali aamwi angolo zyakwe zyankondo amasooja aakwe kukalonga kaKkishoni mpawo ndilamubikka mukuboko kwako.’”
8 Mpawo Bbarakki wakati kulinguwe: “Kuti wayinka aandime, ndilayinka, pesi kuti teewayinka, tandikooyinka pe.” 9 Dibbora wakati: “Ndilayinka aanduwe, nikuba oobo, nkondo eeyi njuyaakulwana tayikakupi bulemu pe nkaambo Jehova ulabikka Sisera mukuboko kwamwanakazi.” Mpawo Dibbora wakanyampuka wayinkaamwi aBbarakki kuKkedeshi. 10 Bbarakki wakayita bamusyobo waZebbuloni aNafutali kuKkedeshi, mpawo baalumi bali 10 000 bakamutobela. Anguwe Dibbora wakayinka aamwi anguwe.
11 Hebberi muKkeni wakalipambula kumaKkeni, bana baHobbabbu wisizyala waMozesi, tente lyakwe lyakali aafwiifwi amusamu mupati muZaananimu iili kuKkedeshi.
12 Sisera wakabuzigwa kuti Bbarakki mwana wa-Abbinowamu watanta Chilundu chaTabbori, 13 mpawo Sisera wakabunganizya ngolo zyakwe zyoonse zyankondo—ngolo* zili 900 zili aansimbi zibosya mumavili—amasooja woonse ngaakali aawo mpawo bakazwa kuHarosheti baya kukalonga kaKkishoni. 14 Dibbora wakabuzya Bbarakki kuti: “Nyampuka, nkaambo oobu mbubuzuba Jehova mbwatabikke Sisera mukuboko kwako. Jehova talikweenda kunembo lyako na?” Mpawo Bbarakki wakaseluka muChilundu chaTabbori abaalumi bali 10 000 bakali kumutobela. 15 Mpawo Jehova wakanyongania Sisera angolo zyakwe zyoonse zyankondo amasooja aakwe woonse kunembo aapanga lyaBbarakki. Kumamanino, Sisera wakasotoka mungolo yakwe wachija. 16 Bbarakki wakaandilila ngolo zyankondo amasooja waakusika kuHarosheti yazisi. Nkinkaako, masooja woonse aaSisera akajayigwa apanga; taakwe naaba uumwi wakasyaala.
17 Pesi Sisera wakachija aamawulu waya kutente lyaJayeli mwanakazi waHebberi muKkeni nkaambo kwakali luumuno aakati kaJabbini mwaami waHazori ang’anda yaHebberi muKkeni. 18 Jayeli wakazwa kuti akatambule Sisera mpawo wakati kulinguwe: “Njila mwaami wangu, kuza ookuno utayoowi pe.” Nkinkaako, wakanjila mutente lyakwe mpawo Jayeli wakamuvumba ndumba.* 19 Mpawo Sisera wakati kulinguwe: “Ndikumbila twaanzi twakunywa ndafwa nyota.” Mpawo wakajula chibikkilo chachikumba chamalili, wamupa wanywa mpawo wakamuvumba lubo. 20 Sisera wakamubuzya kuti: “Yimikila aamulyango watente, kuti kuze umwi muntu uutakubuzye kuti, ‘Muli muntu na oomo?’ umubuzye kuti, ‘Peepe!’”
21 Pesi Jayeli mwanakazi waHebberi wakabweza nkanka yatente ansando mukuboko kwakwe. Sisera naakali koona akaambo kakukatala, Jayeli wakasika chuumunizi kulinguwe mpawo wakamugankamina nkanka mumpobe* yaakuyasa aansi mpawo wafwa.
22 Bbarakki wakayinka nkukooko kayabutobela Sisera, mpawo Jayeli wakazwa kuti akamutambule, mpawo wakati: “Kuza ndikutondeezye muntu ngulikuyanduula.” Bbarakki wakanjilaamwi anguwe mpawo wakabona Sisera kalede kafwide kayasidwe nkanka mumpobe.
23 Mubuzuba oobo, Leza wakazunda Jabbini mwaami waKkenani kunembo aama-Israyeli. 24 Kuboko kwama-Israyeli kwakaba aamanguzu kwiinda Jabbini mwaami waKkenani, kusikila nibakamujaya Jabbini mwaami waKkenani.