Babetesi
5 Mubuzuba oobo, Dibbora aBbarakki mwana wa-Abbinowamu bakayimba lwiimbo oolu:
3 Amuswiilile nibaami! Amuchenjeke matwi nibeendelezi!
Ndilayimbila* Jehova.
Ndilatembawula* Jehova, Leza wa-Israyeli.
4 Jehova, nwaakazwa kuSeyiri,
Nwaakeenda kuzwa muchilawu cha-Edomu,
Nyika yakazungaana, julu lyakapoomona,
Mayoba akapoomona maanzi.
5 Zilundu zyakayaaya* kunembo lyaJehova,
Nichiba chilundu chaSinayi chakayaaya kunembo lyaJehova, Leza wa-Israyeli.
6 Mumazuba aaShamuga mwana wa-Anati,
Mumazuba aaJayeli, teekwakachili kwiindwa pe mumugwagwa;
Bantu bakali kubelesya tuzila tuniini.
7 Bantu bamumyuunzi bamu-Israyeli bakamana;
Bakamana kusikila ime ndiDibbora nindakanyampuka,
Kusikila nindakanyampuka kandili banyina mu-Israyeli.
8 Bakasala baleza bapya;
Mpawo mwakaba nkondo mumageedi.
Ntobo teeyakachili kuboneka pe, niliba sumu,
Aakati kabantu bali 40 000 mu-Israyeli.
9 Moyo wangu uli aabapati bamasooja aa-Israyeli,
Aabo bakalipeda kweenda aabantu.
Amutembawule Jehova!
10 Inywe nimutanta madonki aasalala-salala,
Inywe nimukkala aamakkapeti mabotu,
Andinywe nimweenda mumugwagwa,
Amuyeeyesesye makani aaya!
11 Majwi aabasikuteka maanzi akamvwigwa kundawu zitekwa maanzi;
Bakali kwaamba milimu iiluleme yaJehova kabali nkukooko,
Milimu iiluleme yabantu bakwe bakkala mumyuunzi ya-Israyeli.
Mpawo bantu baJehova bakakunuka baya kumageedi.
12 Buka, buka, Dibbora!
Buka, buka, wiimbe lwiimbo!
Nyampuka Bbarakki! Zulwida bazike bako, mwana wa-Abbinowamu!
13 Aabo bakasyeede bakakunuka baya kubazulwidi;
Bantu baJehova bakakunukila kulindime kuzoolwana basinguzu.
14 Aabo bali mukkuti* bakazwa kuli Efremu;
Balikutobela nduwe Bbenjamini, aakati kabantu bako.
Kuzwa kuMakkiri, bapati bamasooja bakakunuka,
Abaabo banyampula nkoli yamuzulwidi wamasooja* bakazwa kuli Zebbuloni.
15 Basilutwe ba-Isakkara bakali aaDibbora,
Anguwe Bbarakki wakali aaDibbora.
Wakatumwa kuti ayende aamawulu mukkuti* litandabete.
Tubunga twaRubbeni twakali aamyoyo iibili.
16 Nkamboonzi nwaakkala aansi aakati kazibbudu zibili,
Kuli kubaswiilila kabali kusibila mbelele nyeele?
Nkaambo tubunga twaRubbeni twakali aamyoyo iibili.
17 Giliyadi wakasyaala mutala aaJodani;
Nkamboonzi Dani naakakkala mumaato?
Asha wakakkala kalyiibide kunkomwe,
Wakakkala kuzito zyakwe.
18 Zebbuloni wakabikka buumi bwakwe mupenzi zyakuti wakali kukonzya kufwa;
Nchimwi biyo aNafutali mutulundu.
19 Baami bakasika, bakalwana;
Baami baKkenani bakalwana
MuTaanakki, kumbali aamaanzi aakuMegido.
Taakwe nsiliva njibakabweza pe.
20 Nyenyeezi zyakalwana kujulu;
Kazili munzila yazyo zyakalwana Sisera.
21 Kalonga kaKkishoni kakabatola,
Kalonga kachiindi, kalonga kaKkishoni.
Ndakabalyatuuka basinguzu.
22 Kujitika kwansumba zyamabbiza aakwe meenze kwakamvwika
Naakali kuchijaana chabukali.
23 Ngilozi yaJehova yakati, ‘Amutuke Merozi,
Abatukwe bantu bakkala mumo,
Nkaambo teebakasika pe kuzoogwasya Jehova,
Kuti bazoogwasye Jehova aamwi abasinguzu.’
24 Jayeli ulilongezedwe kwiinda banakazi boonse
Mwanakazi waHebberi muKkeni;
Mwanakazi uulongezedwe loko kwiinda banakazi bakkala mumatente.
25 Sisera wakakumbila maanzi; pesi wakamupa malili.
Wakamupa masase* mundido mbotu yapobwe.
26 Wakatandabika kuboko kwakwe wabweza nkanka yatente,
Kuboko kwakwe kwachilisyo kwakajisi nsando.
Wakagankamina Sisera, wamupwayuula mutwe,
Wakamupwaya akumudonkola mumpobe.*
27 Wakawida kumawulu aakwe; wakawa walala mpawaawo;
Wakawida kumawulu aakwe;
Mpaakawida, mpimpawo mpaakazundilwa.
28 Mwanakazi wakayuna aawindo,
Banyina aaSisera bakayuna aawindo lyatupako-pako kabati:
‘Nkamboonzi ngolo zyakwe nizyanonoka kusika?
Nkamboonzi kujitika kwansumba zyamabbiza aangolo zyakwe nikwanonoka?’
29 Banakazi basongo bamung’anda yakwe bakali kumusandula;
Anguwe wakali kulibuzya kuti,
30 ‘Kweelede balikwaabana zintu nzibajana,
Silumamba umwi awumwi wapegwa musimbi uumwi naakuti babili,
Chigogo chamubala mubotu nchibabweza nchichaSisera, chigogo chamubala
Chigogo chisuminidwe, chigogo chamabala-mabala, zigogo zibili zisuminidwe
Nzyansingo zyabasikubweza zintu.’
31 O Jehova, basinkondonyokwe boonse abalobe,
Pesi aabo bakuyanda ababe mbuli zuba lizwa mubulemu bwalyo.”
Mpawo nyika yakapumuna* kwaminyaka iili 40.