Babetesi
19 Mumazuba aayo nikwakatalikwe mwaami mu-Israyeli, umwi muLevi iwakali kukkala kundawu iili kule muchilawu chili aazilundu cha-Efremu, wakabweza umwi mwanakazi wakuBbetelehema iili muJuda kuti abe mwanakazi wakwe. 2 Pesi mwanakazi ooyo taakali kusyomeka pe kumulumaakwe, wakamuchija waya kung’anda yawisi kuBbetelehema iili muJuda. Wakakkala nkukooko kwamyeezi iine. 3 Mulumaakwe wakamutobela kuti akamukombelezye kuti aboole. Wakayinka aamubelesi wakwe wachaalumi amadonki aabili. Naakasika, mwanakazi wakwe wakamunjizya mung’anda yawisi. Mpawo wisi wamwanakazi naakamubona, wakamutambula kabotu. 4 Nkinkaako, wisizyala, nkukwaamba wisi wamusimbi ooyo, wakamukombelezya kuti akkale aanguwe kwamazuba aatatu; bakali kulya akunywa kawona nkukooko.
5 Mubuzuba bwachine, wakafuma kuti ayende, pesi wisi wamusimbi wakabuzya mukwaansa wakwe kuti: “Lya ujane manguzu nuteende.” 6 Nkinkaako, bakakkala mpawo boonse bakalya akunywa; mpawo wisi wamusimbi ooyo wakabuzya mwaalumi ooyo kuti: “Wona lubo sunu ubotelwe.”* 7 Mwaalumi ooyo naakanyampuka kuti ayende, wisizyala wakaliswini kumukombelezya mpawo wakoona lubo nkukooko.
8 Naakafuma mubuzuba bwamusanu, wisi wamusimbi ooyo wakati: “Lya ujane manguzu.” Wakaliswini kuwaya-waya kusikila lyaba goko alubo kabali babili bakali kulya. 9 Mwaalumi ooyo naakanyampuka amwanakazi wakwe amubelesi wakwe, wisizyala, nkukwaamba wisi wamusimbi, wakati kulinguwe: “Bona! Zuba lyayinka. Wona. Zuba lyaamba kubbila. Wona lubo ubotelwe mpawo juunza uzoofuma weende kuya kumuunzi wako.” 10 Nikuba oobo, mwaalumi ooyo taakayanda pe koona busiku oobo. Nkinkaako, wakanyampuka weenda waakusika kuJebbusi, nkukwaamba Jerusalema. Wakali aamadonki aabili aali aazyuuno, mwanakazi wakwe, amubelesi wakwe.
11 Nibakasika aafwiifwi akuJebbusi, zuba lyakali lyaamba kubbila. Nkinkaako, mubelesi wakabuzya simalelaakwe kuti: “Tunjile na mumuunzi wamaJebbusi toone mumo?” 12 Pesi simalelaakwe wakati kulinguwe: “Tutanjili pe mumuunzi wabeenzu batali ma-Israyeli. Atweende tukasike kuGibbeya.” 13 Mpawo wakabuzya mubelesi wakwe kuti: “Atweende tukasike kundawu eezi, tulakonzya kuyoowona kuGibbeya naakuti kuRama.” 14 Nkinkaako, bakayinkilila kunembo alweendo lwabo. Zuba lyakababbilila kabali baamba kusika kuGibbeya iili muBbenjamini.
15 Bakanjila muGibbeya kuti bawone mumo. Kabali mukati, bakakkala mulubuwa lwamuunzi, pesi taakwe wakabanjizya mung’anda yakwe kuti boone mumo. 16 Mpawo goko ndileelyo, kwakasika umwi mudaala wakali kuzwa kumuunda, wakuchilawu chili aazilundu cha-Efremu, ooyo aachiindi eecho wakali kukkala muGibbeya; pesi bantu bakali kukkala mumuunzi ooyo, bakali bamusyobo waBbenjamini. 17 Mudaala ooyo naakalanga akubona silweendo wakali mulubuwa lwamuunzi, wakamubuzya kuti: “Uya kuli, uzwa kuli?” 18 Mwaalumi ooyo wakasandula kuti: “Twazwa kuBbetelehema iili muJuda, tuya kundawu iili kule loko kuchilawu chili aazilundu cha-Efremu, nkundizwa. Ndakali kuBbetelehema iili muJuda, lino ndilikuya kung’anda yaJehova,* pesi taakwe wanditambula pe mung’anda yakwe. 19 Tuli aabwizu achakulya chamadonki, ime amwanakazi wangu amubelesi wangu tuli aachinkwa awayini. Zyoonse tulaazyo.” 20 Nikuba oobo, mudaala ooyo wakati: “Ba aaluumuno! Ndilamuchitila zyoonse nzimuyanda. Mutawoni mulubuwa lwamuunzi pe.” 21 Nkinkaako, wakabeeta kung’anda yakwe mpawo wakaapa chakulya madonki aakwe. Kuzwa waawo, bakasamba kumawulu, balya akunywa.
22 Nibakachili kubotelwa, kwakasika bamwi baalumi bamumuunzi batagwasyi mpawo bakazyunguluka ng’anda kabali kuuma kkoma. Bakali kubuzya mudaala wakali aang’anda eeyo kuti: “Gwisya mwaalumi wasika mung’anda yako nkaambo tuyanda koonaawe.” 23 Mpawo mwaalumi wakali aang’anda eeyo wakazwa aanze waakubabuzya kuti: “Peepe beenzuma, mutachiti bubi buli boobu pe. Mwaalumi ooyu mweenzu mung’anda yangu. Mutachiti chintu chitondwa chili boobu. 24 Ngoyu mwanaangu musimbi uuchili nakalindu* amwanakazi wamwaalumi ooyu. Amuleke ndibagwisizye aanze mubachite nzimuyanda. Pesi mutachiti chintu chitondwa kumwaalumi ooyu.”
25 Pesi baalumi aabo teebakamuswiilila pe, nkinkaako, muLevi wakajata mwanakazi wakwe wamugwisizya aanze kulimbabo. Bakoonaawe bamuchita mbuli mbubakali kuyanda busiku boonse kusika kubuchedo. Mpawo kuseeni bakamuleka kuti ayende. 26 Kuseeni-seeni, mwanakazi ooyo wakeenda waakuwida aamulyango wang’anda yamudaala uulya mwakali simalelaakwe, mpawo wakalala kusikila kwangweemuka. 27 Simalelaakwe naakabuka kuseeni akujula mulyango wang’anda kuti ayinkilile kunembo alweendo lwakwe, wakabona mwanakazi wakwe kalede aanze, maboko kaali kumulyango wang’anda. 28 Mpawo mwaalumi wakati kulinguwe: “Buka tweende.” Pesi taakasandula pe. Mwaalumi ooyo wakamutansika aadonki mpawo wakayinka kumuunzi wakwe.
29 Naakasika kung’anda yakwe, wakabweza kafulo* wanenga mwanakazi wakwe muzipanzi zili 12. Mpawo chipanzi chimwi achimwi wakachitumizya kuchilawu chimwi achimwi cha-Israyeli. 30 Bantu boonse bakachibona bakati: “Chintu chili boobu tachinaba aabuzuba chachitika nikuba kubonwa, kuzwa mubuzuba ma-Israyeli nibakazwa munyika ya-Ijipita kuzoosika sunu. Amwaayeeyesesye* makani aaya mwaambuuzyanie atala angawo mpawo muzootubuzye zyakuchita.”