Babetesi

20 Mpawo ma-Israyeli boonse bakalongonoka kuzwa kuDani kuyoosika kuBberi-shebba akunyika yaGiliyadi, mpawo mbungano yoonse yakajatana* yabungana kunembo lyaJehova kuMizipa. 2 Basilutwe babantu abamisyobo yoonse ya-Israyeli bakayimikila mundawu zyabo mumbungano yabantu baLeza—masooja bali 400 000 beenda aamawulu bakali aamapanga.

3 Bamusyobo waBbenjamini bakamvwa kuti ma-Israyeli bakali baya kuMizipa.

Mpawo ma-Israyeli bakati: “Amutubuzye, chintu chibi chili boobu chakachitika biyeni?” 4 Mpawo muLevi, mulumi wamwanakazi wakali wajayigwa wakasandula kuti: “Ndakasika muGibbeya yaBbenjamini amwanakazi wangu kuti toone nkuko. 5 Mpawo bantu bamuGibbeya* bakandizida mansiku bazyunguluka ng’anda. Bakali kuyanda kundijaya, pesi bakajata mwanakazi wangu boonaawe, mpawo wakazoofwa. 6 Mwanakazi ooyo ndakamubweza ndaakumunenga muzipanzi mpawo ndakazitumizya kulukono loonse lwa-Israyeli, nkaambo baalumi aabo bakachita chintu chifwisya bweeme chitondwa mu-Israyeli. 7 Lino nima-Israyeli moonse, amwaambe mizeezo yanu twaambuuzyanie atala amakani aaya.”

8 Bantu boonse bakanyampukilaamwi bati: “Taakwe naba umwi aakati kesu uutabweede kutente lyakwe naakuti kung’anda yakwe. 9 Nzezi nzituyanda kwiichitila Gibbeya, tulawuma chisale* tukayilwane. 10 Tulabweza baalumi bali 10 kuzwa mubaalumi bali 100 bamisyobo yoonse ya-Israyeli, bali 100 kuzwa muli bali 1 000, bali 1 000 kuzwa muli bali 10 000 kuti batole zyakulya zyamasooja, kuchitila kuti bakalwane Gibbeya yaBbenjamini nkaambo bakachita zintu zitondwa mu-Israyeli.” 11 Nkinkaako, baalumi boonse ba-Israyeli bakabungana, bajatana kuti balwane muunzi ooyo.

12 Mpawo misyobo ya-Israyeli yakatuma baalumi kubaalumi bamusyobo waBbenjamini kuti bakababuzye kuti: “Chintu eechi chibi chakachitika biyeni aakati kanu? 13 Lino amutupe baalumi batagwasyi bamuGibbeya kuchitila kuti tubajaye, tugwisye chintu chibi mu-Israyeli.” Pesi bamusyobo waBbenjamini bakakaka kuswiilila bananyina ma-Israyeli.

14 Mpawo bamusyobo waBbenjamini bakazwa mumuunzi baakubungana kuGibbeya kuti bakalwane baalumi ba-Israyeli. 15 Mubuzuba oobo kwakabungana baalumi bamusyobo waBbenjamini bali 26 000 bakali aamapanga kuzwa mumyuunzi yabo, kutaswaanizya bamwi basalidwe bali 700 bazwa muGibbeya. 16 Munkamu eeyi yamasooja, kwakali baalumi basichimweensi basalidwe bali 700. Umwi awumwi wabaalumi aaba wakali kulanza ankwisyo, zyakuti wakali kukonzya kuuma kasusu katafusi pe.

17 Baalumi ba-Israyeli kutabala abamusyobo waBbenjamini, bakabunganizya baalumi bali 400 000 bakali aamapanga, umwi awumwi wabaalumi aabo wakali silumamba ulaaluzibo. 18 Bakanyampuka baya kuBbeteli kuti bakabuzye makani kuli Leza. Mpawo baalumi ba-Israyeli bakati: “Ngwani aakati kesu uutatuzulwide kuyoolwana bamusyobo waBbenjamini?” Jehova wakati: “Juda nguwe uutazulwide.”

19 Mpawo ma-Israyeli bakabuka kuseeni baakukkempa kuti balwane Gibbeya.

20 Baalumi ba-Israyeli bakayinka kuti bakalwane bamusyobo waBbenjamini; bakalibambila kubalwana kuGibbeya. 21 Mubuzuba oobo, bamusyobo waBbenjamini bakazwa muGibbeya bajaya baalumi bali 22 000 ba-Israyeli. 22 Nikuba oobo, masooja aabaalumi ba-Israyeli bakatondeezya kuti bali aachibindi kwiinda mukulibambila nkondo lubo andawu njibakalibambilide nkondo mubuzuba bwakusaanguna. 23 Bakayinka baakulila kunembo lyaJehova kusikila goko, mpawo bakabuzya Jehova kuti: “Twiinke lubo na, tukalwane babbululu besu bamusyobo waBbenjamini?” Jehova wakati: “Amwiinke mukabalwane.”

24 Nkinkaako, ma-Israyeli bakaswena aafwiifwi abamusyobo wa-Bbenjamini mubuzuba bwachibili. 25 Ambabo bamusyobo waBbenjamini bakazwa muGibbeya kuti bakaswaanane aambabo mubuzuba bwachibili, mpawo bakajaya bamwi ma-Israyeli bali 18 000. Boonse bakajayigwa bakali aamapanga. 26 Mpawo baalumi boonse ba-Israyeli bakaya kuBbeteli. Bakalila, bakkala kunembo lyaJehova balyiimya kulya mubuzuba oobo kusika goko alubo bakapa zipo zitentwa azipo zyalumvwanano kunembo lyaJehova. 27 Mpawo baalumi ba-Israyeli bakabuzya makani kuli Jehova, nkaambo kumazuba aayo, bbokesi lyachizuminano lyaLeza wakasimpe lyakali nkukooko. 28 Mumazuba aayo, Finiyasi mwana wa-Eliyezari, mwana wa-Aroni wakali kubeleka* kunembo aandilyo. Nkinkaako, ma-Israyeli bakabuzya kuti: “Twiinke lubo na, tukaakulwane babbululu besu, baalumi bamusyobo waBbenjamini naakuti tuleke?” Jehova wakasandula kuti: “Amwiinke, nkaambo juunza ndilababikka mukuboko kwanu.” 29 Mpawo ma-Israyeli bakabikka baalumi kuti babwatilile Gibbeya yoonse.

30 Ma-Israyeli bakayinka kuti bakalwane bamusyobo waBbenjamini mubuzuba bwachitatu. Bakalibambila kulwana Gibbeya mbuli mbubakachitide kale. 31 Bamusyobo waBbenjamini nibakazwa kuti bakabalwane, bakatolwa kule amuunzi wabo. Mpawo mbuli mbubakachitide aali chimwi chiindi, bakasaanguna kulwana akujaya bamwi baalumi mumigwagwa, umwi wakali kuya kuBbeteli mpawo umwi wakali kuya kuGibbeya, bakajaya baalumi ba-Israyeli bali 30 musokwe. 32 Nkinkaako, bamusyobo waBbenjamini bakati: “Tulikubazunda mbuli mbutwakachita kumatalikilo.” Pesi ma-Israyeli bakati: “Atuchije, tukabasisye kumigwagwa, kule amuunzi wabo.” 33 Baalumi boonse ba-Israyeli bakanyampuka mundawu zyabo, balibambila nkondo kuBbaala-tamari kakuli ma-Israyeli bakali kuyubilila bakavundumuka kabazwa mundawu zyabo aafwiifwi aGibbeya. 34 Nkinkaako, baalumi bali 10 000 basalidwe kuzwa mu-Israyeli yoonse bakasika kunembo aaGibbeya, mpawo nkondo yakayuma. Pesi bamusyobo waBbenjamini teebakazi pe kuti mapenzi aba aafwiifwi kubasikila.

35 Jehova wakazunda bamusyobo waBbenjamini kunembo aama-Israyeli. Mubuzuba oobo, ma-Israyeli bakajaya baalumi bali 25 100 muBbenjamini. Boonse bakali aamapanga.

36 Nikuba oobo, bamusyobo waBbenjamini bakali kuyeeya kuti balabazunda baalumi ba-Israyeli chiindi nibakachija, pesi chakapa kuti babachije nchakuti bakali kusyoma baalumi bakabwatilide Gibbeya. 37 Chakufwambaana, baalumi bakabwatilide muunzi, bakavundumuka banjila muGibbeya. Mpawo bakasansaana banyonyoona muunzi woonse apanga.

38 Baalumi ba-Israyeli bakali babamba abaalumi bakabwatilide muunzi kuti bawutente amulilo, kuchitila kuti nibwawuntumuka busi, chibe chitondeezyo kulimbabo.

39 Ma-Israyeli nibakachija nkondo, baalumi bamusyobo waBbenjamini bakasaanguna kubalwana, mpawo bakajaya baalumi ba-Israyeli basika ku 30, mpawo bakati: “Tulikubazunda lubo mbuli mbutwakachita munkondo yayinda.” 40 Pesi busi bwakupya kwamuunzi bwakasaanguna kuuntumuka. Baalumi bamusyobo waBbenjamini nibakacheba akulanga, bakabona muunzi woonse kawulikuyaka. 41 Baalumi ba-Israyeli bakanyona mpawo baalumi bamusyobo waBbenjamini bakayoowa nkaambo bakabona kuti basikilwa aamapenzi. 42 Nkinkaako, bakachija baalumi ba-Israyeli kabatozya munkanda, pesi nkondo yakabatobela; baalumi bakali kuzwa mumyuunzi ambabo bakasaanguna kubalwana. 43 Bakazyunguluka bamusyobo waBbenjamini mpawo bakabaandilila kabatabapi mweenya wakupumuna. Bakabalyatuuka kunembo aaGibbeya kutozya kubuzwezuba. 44 Kumamanino, baalumi baBbenjamini bali 18 000 bakajayigwa, boonse bakali basilumamba bali aamanguzu.

45 Baalumi bamusyobo waBbenjamini bakanyona bachijila munkanda kubbwe pati lyaRimoni, mpawo ma-Israyeli bakajaya bamwi bali 5 000 mumigwagwa, alubo bakayinkilila kunembo kwaandilila bamwi mane kuyoosika kuGidomu, mpawo bakajaya* bamwi baalumi bali 2 000. 46 Baalumi boonse bamusyobo waBbenjamini bakali aamapanga bakajayigwa mubuzuba oobo bakali 25 000. Boonse bakali basilumamba bali aamanguzu. 47 Pesi bali 600, bakachijila munkanda, kubbwe pati lyaRimoni alubo bakakkala kubbwe pati lyaRimoni kwamyeezi iine.

48 Baalumi ba-Israyeli bakaboola kuzoolwana bamusyobo waBbenjamini alubo bakanyonyoona muunzi apanga, kuzwa kumuntu kuya kuzivuubwa azyoonse zyakasyeede. Bakatenta myuunzi yoonse yakali mundawu mubakali kwiinda.