Rute
3 Nawomi banyinazyala, bakabuzya Rute kuti: “Mwanaangu tandeelede kukuyandwiida muunzi* na kuchitila kuti zikweendele kabotu? 2 Bbowazi teebbululu wesu na? Nguwe uulaabasimbi mbwaalaabo. Sunu goko unoopupulula bbali kulubuwa lwakupolela. 3 Nkinkaako, samba unane mafuta aanunkilila, mpawo uzwaate,* ukunuke uye kulubuwa lwakupolela. Utalitondeezyi pe kumwaalumi ooyo kusikila amane kulya akunywa. 4 Naawona, ulangisisye mpatawone, mpawo wiinke ukamuvumbule kumawulu, ukalale mpawaawo. Uzookubuzya nzweelede kuchita.”
5 Mpawo Rute wakasandula kuti: “Zyoonse nzimwandibuzya ndilazichita.” 6 Nkinkaako, wakakunuka waya kulubuwa lwakupolela akuchita zyoonse nzyaakabuzigwa aabanyinazyala kuti achite. 7 Aachiindi nchicheecho, Bbowazi wakalya akunywa kusikila wabotelwa mumoyo wakwe. Mpawo wakayinka waakulala aafwiifwi ampulimanina dwi lyazilyo. Mpawo Rute wakasika chuumunizi wavumbula Bbowazi kumawulu, walala mpawaawo. 8 Aakati kabo, Bbowazi wakasaanguna kukankama mpawo wakabuka wakkala mpawo wakabona mwanakazi wakalede kumawulu aakwe. 9 Bbowazi wakati: “Nduweni?” Mwanakazi wakasandula kuti: “Ndime Rute mubelesi wako. Vumba chigogo* aamubelesi wako nkaambo nduwe sikunununa.” 10 Bbowazi wakati: “Jehova akulongezye mwanaangu. Watondeezya luyando lwako lutamani aachiindi eechino chamamanino kwiinda mbwaakalutondeezya kumatalikilo kwiinda mukutatobela baalumi bachiniini, kufumbwa kuti balafwaba naakuti balinotede. 11 Lino mwanaangu utayoowi pe. Ndilakuchitila zyoonse nzwaamba, nkaambo muntu woonse mumuunzi ulizi kuti ulimwanakazi uulikabotu. 12 Nisimpe kuti ndime sikunununa pesi mpali umwi sikunununa uulaafwiifwi kwiinda ndime. 13 Kkala mpawaawa busiku bwasunu. Kuti akununune kuseeni, zilikabotu, akununune pesi kuti katayandi kukunununa ime ndizookunununa, mbuli Jehova mbali muumi. Lala mpawaawa kusikila bukache.”
14 Nkinkaako, wakalala kumawulu aakwe kusikila nibwakacha mpawo wakabuka kakuchisiya-siya zyakuti, kuti kakuli muntu uulikweenda tukonzyi pe kumuziba. Mpawo Bbowazi wakati: “Kutabi muntu uutazibe kuti kuli mwanakazi wazide kulubuwa lwakupolela.” 15 Wakayungizya kuti: “Yeta mulembo nguzweete wuupetunune.” Wakawupetununa mpawo Bbowazi wakabikka zipimyo* zili musanu achimwi zyabbali mukati, wamutukka. Mpawo Bbowazi wakanjila mumuunzi.
16 Rute wakaya kuli banyinazyala, mpawo banyinazyala bakati: “Weenda biyeni mwanaangu?”* Mpawo wakababuzya zyoonse nzyaakamuchitila mwaalumi ooyo. 17 Wakayungizya kuti: “Wandipa zipimyo eezi zili musanu achimwi zyabbali mpawo wati kulindime: ‘Utayinki chinkwamaanza kuli banyokozyala.’” 18 Mpawo bakati kulinguwe: “Kkala aawa mwanaangu kusikila uzibe kuti nkani eeyi ileenda biyeni, nkaambo mwaalumi ooyu takoopumuna pe kusikila ayibambulule nkani eeyi sunu.”