Rute
4 Kuzwa waawo, Bbowazi wakatanta kaya kugeedi lyamuunzi waakukkala nkukooko. Lino bona! Sikunununa wakaambidwe aaBbowazi wakayinda. Mpawo Bbowazi wakati: “Ndaba, zookuno uzookkale aansi aawa.” Mpawo wakayinka waakukkala aansi. 2 Bbowazi wakabweza baalu bamuunzi bali kkumi wababuzya kuti: “Mukkale aansi aawa.” Mpawo bakakkala aansi.
3 Bbowazi wakabuzya sikunununa kuti: “Nawomi, ooyo wakaboola kuzwa kuchilawu chaMowabbu, weelede kuuzya muunda wakali wabbululu wesu Elimelekki. 4 Nkinkaako, ndayeeya kuti ndikubuzye kwiinda mukwaamba kuti, ‘Uwule kunembo lyabantu boonse akunembo lyabaalu bamuchilawu chesu. Kuti kuyanda kuuwula, uwule. Pesi kuti kutakonzyi, ndibuzye kuchitila kuti ndizibe, nkaambo iwe nduwe ulaacheelelo chakuuwula mpawo ime nditobela nduwe.’” Wakasandula kuti: “Ndilawuula.” 5 Mpawo Bbowazi wakati: “Mubuzuba mbutazoowuule kuli Nawomi, weelede kuzoowuula akuli Rute muMowabbu mwanakazi wasikufwa, kuchitila kuti zina lyasikufwa litalobi pe mulukono lwakwe.” 6 Mpawo sikunununa wakati: “Tandikonzyi pe kuunununa, nkaambo ndilakonzya kupambanisya lukono lwangu. Uwule kubelesya cheelelo changu chakuuwula, nkaambo ime tandikonzyi pe kuuwula.”
7 Nzezi zyakali kuchitwa chiindi mu-Israyeli atala acheelelo chakunununa akuuzizyania zintu munzila iili mumulawu: Muntu wakeelede kugwisya nyatela yakwe akwiipa mweenzinyina. Eezi nzizyo zyakali kuchitwa kutondeezya kuti bantu bazuminana* mu-Israyeli. 8 Nkinkaako, chiindi sikunununa naakati kuli Bbowazi, “Uwuule iwe,” wakagwisya nyatela yakwe. 9 Mpawo Bbowazi wakati kubaalu akubantu boonse: “Muli bakamboni sunu kuti ndilikuula zintu zyoonse kuzwa kuli Nawomi zyakali zya-Elimelekki azintu zyoonse zyakali zyaKkiliyoni aMaloni. 10 Alubo ndilikubweza Rute muMowabbu mwanakazi waMaloni kuti abe mwanakazi wangu, kuti ndibusilizye zina lyasikufwa kulukono lwakwe, kuchitila kuti zina lyasikufwa litafwidilili aakati kanzubo zyakwe aageedi lyamuunzi wakulimbabo. Muli bakamboni sunu.”
11 Mpawo bantu boonse bakali aageedi lyamuunzi abaalu bakati: “Tuli bakamboni! Jehova amulongezye mwanakazi uulikunjila mung’anda yako, abe mbuli Rakkeli aLeya, aabo bakayaka ng’anda ya-Israyeli. Uzwidilile mu-Efrata akuba aazina* bbotu muBbetelehema. 12 Ng’anda yako ayibe mbuli ng’anda yaPerezi, ooyo Tamari ngwaakazyalila Juda kwiinda mubana Jehova mbatakupe kakubelesegwa mwanakazi ooyu.”
13 Bbowazi wakabweza Rute, waba mwanakazi wakwe, woonaawe alubo Jehova wakapa kuti Rute aminte mpawo wakatumbuka mwana mulombe. 14 Mpawo banakazi bakati kuli Nawomi: “Atembawulwe Jehova ooyo watakulekelezya kuti utabi aasikukunununa sunu. Zina lyakwe alyaambilizigwe mu-Israyeli! 15 Mwana* ooyu wabusilizya* buumi bwako alubo uzookulela kubuchembele bwako, nkaambo wazyalwa amukamwanaako uukuyanda loko alubo uulikabotu kwiinda bana balombe bali musanu ababili.” 16 Nawomi wakabweza mwana wamubukata mpawo wakaba sikumulela. 17 Basimayakilane bachanakazi bakamuuzika zina. Bakati: “Nawomi wazyalilwa mwana,” mpawo bakamuuzika kuti Obbedi. Ooyu nguwe wakazyala Jese wisi aaDavida.
18 Eeli ndilyo zyalani lyaPerezi: Perezi wakazyala Hezironi; 19 Hezironi wakazyala Ramu; Ramu wakazyala Aminadabbu; 20 Aminadabbu wakazyala Nasoni; Nasoni wakazyala Salimoni; 21 Salimoni wakazyala Bbowazi; Bbowazi wakazyala Obbedi; 22 Obbedi wakazyala Jese mpawo Jese wakazyala Davida.