Rute
2 Nawomi wakali aabbululu wamulumaakwe wakanotede loko. Zina lyakwe wakali kutegwa Bbowazi alubo wakali waluzubo lwa-Elimelekki.
2 Rute muMowabbu wakati kuli Nawomi: “Amuleke ndiinke kumyuunda ndikavululwide zilyo, kanditobela kufumbwa muntu uutakandifwide luzyalo.” Mpawo Nawomi wakati kulinguwe: “Yinka mwanaangu.” 3 Kuzwa waawo, wakeenda mpawo wakasaanguna kuvululwida mumuunda musule aabasikutebula. Katayeeyeli, wakanjila mumuunda waBbowazi ooyo wakali bbululu wa-Elimelekki. 4 Bbowazi wakasika kazwa kuBbetelehema mpawo wakati kuli basikutebula: “Jehova abe aandinywe.” Bakasandula kuti: “Jehova akulongezye.”
5 Mpawo Bbowazi wakabuzya mulombe wakali kulanga-langa basikutebula kuti: “Musimbi ooyu uzwa kuli?” 6 Mulombe ooyo wakasandula kuti: “Musimbi ooyu muMowabbu, wakaza aaNawomi kuzwa kuchilawu chaMowabbu. 7 Naasika wati, ‘Ndikumbila kuvululwida makunka aazilyo zyasiigwa musule aabasikutebula?’ Walikubeleka kuzwa kuseeni naasika kusikila lino naayakukukkala mumweenzule kuti alyookezye kwachiindi chifwiifwi.”
8 Mpawo Bbowazi wakati kuli Rute: “Swiilila mwanaangu. Utayinki kuyoovululwida kuluumwi muunda pe alubo utayinki kumbi pe, kkala aafwiifwi ababelesi bangu basimbi. 9 Bikkila maanu kumuunda ngubali kutebula, wiinkaabo. Ndalayilila balombe kuti batakugumi.* Kuti waba aanyota, wiinke kunongo ukanywe maanzi ngibateka balombe.”
10 Kuzwa waawo, Rute wakavuntama waliwaala aansi mpawo wakati kulinguwe: “Nkamboonzi nwaandifwida luzyalo alubo nkamboonzi nwaaba aandaba andime kakuli ndili mweenzu?” 11 Bbowazi wakamusandula kuti: “Ndakaamvwa makani woonse aali atala azintu zyoonse nzwaakachitila banyokozyala kuzwa mulumaako naakafwa ambwaakasiya wuso abanyoko, anyika yababbululu bako kuti uze kubantu mbwaakatazi pe. 12 Jehova akulongezye akaambo kamilimu yako alubo Jehova Leza wa-Israyeli, ooyo ngwaasala kuyubila mumababa aakwe, akupe bulumbu bukkwene.” 13 Mpawo Rute wakati: “Wandifwida luzyalo mwaami wangu, nkaambo wanduumbulizya akwaamba majwi aasimya kumubelesi wako nikuba kuti tandili umwi wababelesi bako pe.”
14 Nichakaba chiindi chakulya, Bbowazi wakati kulinguwe: “Kuza uzoolye chinkwa, kuli kuchisunsa muviniga.” Kuzwa waawo, wakakkala aafwiifwi abasikutebula. Bbowazi wakamutambikizya zilyo ziyokedwe mpawo wakalya wakkuta kusikila kwasyaala zimwi. 15 Rute naakanyampuka kuti akavululwide, Bbowazi wakalayilila babelesi bakwe balombe kuti: “Amumulekele kuti avululwide nikuba muzilyo* nzimwatebula, mutamukataazyi pe. 16 Mweelede kumusomweda makunka aazilyo kuzwa kumisunta, mwaasiye kuti avululwide alubo tamweelede kumubuzya kuti aleke kuvululwida.”
17 Nkinkaako, wakayinkilila kunembo kuvululwida mumuunda ooyo kusikila nilyakaba goko. Naakapola nzyaakavululwida, zyakachizule efa* yabbali. 18 Kuzwa waawo, wakazibweza wanjila mumuunzi, mpawo banyinazyala bakazibona nzyaakavululwida. Rute wakabweza chakulya nchaakasiide naakakkuta mpawo wachipa banyinazyala.
19 Mpawo banyinazyala bakati kulinguwe: “Waakuvululwida kuli sunu? Nkuukuli nkwaakubeleka? Alongezegwe ooyo wakufwida luzyalo.” Nkinkaako, wakabuzya banyinazyala atala amuntu ngwaakabelekedaawe, kati: “Muntu ngundabelekaawe sunu nguBbowazi.” 20 Nawomi wakabuzya mukamwanaakwe kuti: “Alongezegwe aaJehova, ooyo watakachilwa kutondeezya luyando lutamani kubawumi abafwide.” Nawomi wakayinkilila kunembo kwaamba kuti: “Mwaalumi ooyu ngubbululu wesu, nguumwi wabasikutunununa.” 21 Mpawo Rute muMowabbu wakati: “Alubo wandibuzya kuti, ‘Kkala aafwiifwi ababelesi bangu bachiniini kusikila bazoomaninsye kunditebwida.’” 22 Nawomi wakati kuli mukamwanaakwe Rute: “Zilikabotu mwanaangu kuti weende ababelesi bakwe bachanakazi bachiniini kwiinda kuti ukajatwe chalunya mumyuunda yabamwi bantu.”
23 Nkinkaako, wakakkala aafwiifwi ababelesi baBbowazi bachanakazi kavululwida kusikila nibakamana kutebula bbali akutebula wiiti. Alubo wakayinkilila kunembo kukkala abanyinazyala.