Samiyele Wakusaanguna
26 Nikwakayinda chiindi, baalumi bakuZifi bakasika kuli Sawulu kuGibbeya mpawo bakati: “Davida tayubide kukalundu kaHakkila kalangene aaJeshimoni* na?” 2 Nkinkaako, Sawulu wakakunukila munkanda yaZifi kalaamwi abaalumi bali 3 000 bakasalwa aakati kama-Israyeli kuti bakayanduule Davida munkanda yaZifi. 3 Sawulu wakakkala kumbali aamugwagwa aakalundu kaHakkila kalangene aaJeshimoni. Aachiindi eecho, Davida wakali kukkala munkanda alubo wakamvwa kuti Sawulu wakali wasika munkanda eeyo kuti azoomuyanduule. 4 Davida wakatuma basikulanga-langa nyika kuti bakabone kuti Sawulu wakali wasika na choonzyo. 5 Mukuya kwachiindi, Davida wakayinka kundawu Sawulu nkwaakakkempede alubo Davida wakabona mpaakalede Sawulu a-Abbineri mwana waNeri mupati wamasooja aakwe. Sawulu wakalilede mukkeempu nkamu yamasooja kayimuzyungulukide kumabazu woonse. 6 Mpawo Davida wakabuzya Ahimelekki muHeti a-Abbishayi mwana waZeruya, mwanike waJowabbu kuti: “Ngwani uutakunuke aandime ooko nkwakkempede Sawulu?” Abbishayi wakasandula kati: “Tulakunukaamwi.” 7 Nkinkaako, Davida a-Abbishayi bakayinka kunkamu yamasooja mansiku alubo bakajana Sawulu kalede mukkeempu, sumu lyakwe kaliyasilidwe aansi kumutwe wakwe. Abbineri ankamu yamasooja bakalilede kabamuzyungulukide.
8 Abbishayi wakati kuli Davida: “Sunu Leza wabikka sinkondonyokwe mumaboko aako. Inche kaka ndizumizye ndimuyasilizye kamwi biyo aanyika asumu, tandikoomuyasa tubili pe.” 9 Nikuba oobo, Davida wakati kuli Abbishayi: “Utamuyasi pe. Nkaambo ngwani uukonzya kulwana munanike waJehova mpawo aleke kuba aamulandu?” 10 Davida wakayinkilila kunembo kati: “Kwaamba choonzyo, mbuli Jehova mbali muumi, Jehova lwakwe nguwe uutazoomujaye naakuti buzuba bwakwe buzoosika mpawo afwe, naakuti uzooyinka kunkondo mpawo akaakufwide nkuko. 11 Tazili kabotu pe mumeso aaJehova kuti ime nditandabike kuboko kwangu kuti ndilwane munanike waJehova! Nkinkaako, bweza sumu lili kumutwe wakwe akankuli kamaanzi mpawo tweende.” 12 Nkinkaako, Davida wakabweza sumu akankuli kamaanzi zyakali kumutwe waSawulu mpawo bakeenda. Taakwe muntu wakababona, taakwe wakabamvwa, taakwe wakabuka, nkaambo boonse bakalifwide biya ang’onzi, mbukunga Jehova wakali wapa kuti boone ng’onzi mpati. 13 Mpawo Davida wakazubukila mutaleeliya waakwiimikila kule-kule aajulu aachilundu, aakati kabo kakuli kasinzo.
14 Davida wakayita nkamu yamasooja kuswaanizya a-Abbineri mwana waNeri kati: “Abbineri, ani tuvwiili na?” Abbineri wakavwiila kati: “Nduweniwe nuulikwiita mwaami?” 15 Davida wakati kuli Abbineri: “Tawuli mwaalumi na? Ngwani uuli mbuli nduwe mu-Israyeli? Nkamboonzi nwaatalinda mwaami simalelaako? Nkaambo umwi musooja walisikide kuti azoojaye mwaami simalelaako. 16 Nzwaachita tazili kabotu pe. Kwaamba choonzyo, mbuli Jehova mbali muumi, mweelede kufwa, nkaambo teemwamulinda pe simalelaanu, munanike waJehova. Lino bona, lili kuli sumu lyamwaami akankuli kamaanzi zyali kumutwe wakwe?”
17 Mpawo Sawulu wakaziba kuti ndijwi lyaDavida alubo wakati: “Ndijwi lyako na eeli mwanaangu Davida?” Davida wakasandula kati: “Iiyi ndijwi lyangu, mwaami simalelaangu.” 18 Wakayungizya kuti: “Nkamboonzi simalelaangu nalikundaandilila ime ndimubelesi wakwe, ndachitaanzi alubo ndabisyaanzi? 19 Mwaami simalelaangu, inche kaka, andiswiilile ime ndimubelesi wakwe: Kuti kakuli nguJehova wakutuma kuti undilwane, atambule* chipo changu chazilyo. Pesi kuti kakuli mbantu balikukutuma kuti uchite oobo, Jehova abatuke, nkaambo banditanda sunu kuti nditabi aachipanzi mulukono lwaJehova, kabali kwaamba kuti, ‘Yinka, ukakombe bamwi baleza!’ 20 Utalekeli ganzi lyangu kuti litikile aanyika kule aJehova, nkaambo mwaami wa-Israyeli wazwa kuti akaakuyanduule ntantabwa iimwi biyo, aanga ulikwaandilila kwale muzilundu.”
21 Sawulu wakasandula kati: “Ndabisya. Boola mwanaangu Davida, nkaambo tandichizookuchitili chibi lubo pe, mbukunga buumi bwangu wabubona kabuyandikana sunu. Kwaamba choonzyo, ndachita chabufuba-fuba alubo ndabisya loko.” 22 Davida wakasandula kati: “Ndeli sumu lyamwaami. Umwi wabalombe aze ookuno azoolibweze. 23 Jehova nguwe uutabbadale umwi awumwi akaambo kabululami bwakwe akusyomeka kwakwe, nkaambo sunu Jehova wakubikka mukuboko kwangu, pesi teendayanda pe kuti nditandabike kuboko kwangu kuti ndilwane munanike waJehova. 24 Mbukunga buumi bwako ndabubona kabuyandikana sunu, andime buumi bwangu Jehova abubone kabuyandikana mumeso aakwe alubo andivune mumapenzi aangu woonse.” 25 Sawulu wakasandula Davida kati: “Leza akulongezye,* mwanaangu Davida. Kwaamba choonzyo, uzoochita zintu zipati alubo kwaamba choonzyo, uzoozunda.” Kuzwa waawo, Davida wakayinka, anguwe Sawulu wakabweeda kumuunzi wakwe.