Samiyele Wakusaanguna
28 Mumazuba ngayaayo, maFilisiti bakabunganizya nkamu zyamasooja aabo kuti bakalwane ma-Israyeli. Nkinkaako, Akkishi wakati kuli Davida: “Iwe biya ulizizi kuti, iwe abaalumi mbulaabo mulayinka aandime kunkondo.” 2 Mpawo Davida wakati kuli Akkishi: “Uzizi kabotu nzinditachite ime ndimubelesi wako.” Akkishi wakati kuli Davida: “Nzizyo zitape kuti ndikusale kuti ube sikundilinda chiindi choonse.”*
3 Aachiindi eecho, Samiyele wakali wafwa alubo ma-Israyeli boonse bakali bamulila akumuzikka kumuunzi wakwe kuRama. Alubo Sawulu wakali wabagwisya munyika basondi abasikwaamba zitazoochitike kunembo.
4 MaFilisiti bakabunganaamwi mpawo bakaakukkempa kuShunemu. Nkinkaako, Sawulu wakabunganizya ma-Israyeli boonse mpawo bakaakukkempa kuGilibbowa. 5 Sawulu naakabona masooja aamaFilisiti aakakkempede, wakayoowa akukankama. 6 Nikuba kuti Sawulu wakali kunoonga wabuzya makani kuli Jehova, Jehova taakali kumusandula pe nikuba muziloto naakuti kwiinda mu-Urimu naakuti kwiinda mubapolofita. 7 Kumamanino, Sawulu wakabuzya babelesi bakwe kuti: “Amundiyandwiide mwanakazi musondi mpawo ndiinke ndikabuzye makani kulinguwe.” Babelesi bakwe bakamusandula kabati: “Bona! Nkwali mwanakazi musondi ku-Eni-dori.”
8 Nkinkaako, Sawulu wakalichincha kuti atazibikani, wazwaata zimbi zigogo mpawo wakayinka kumwanakazi ooyo mansiku kalaamwi abaalumi babili. Wakati: “Sonda, undeetele muntu ngunditaambe.” 9 Mwanakazi ooyo wakati kulinguwe: “Uzizi kabotu nzyaakachita Sawulu, mbaakagwisya basondi abasikwaamba zitazoochitike kunembo munyika. Nkamboonzi nulikunditeya, kuyanda kuti ndijayigwe?” 10 Sawulu wakakonka kulinguwe kwiinda muli Jehova kati: “Kwaamba choonzyo, mbuli Jehova mbali muumi, tukooba aamulandu pe munkani eeyi!” 11 Sawulu naakaamba oobo, mwanakazi ooyo wakati: “Ngwani nguyanda kuti ndikweetele?” Wakasandula kati: “Ndeetele Samiyele.” 12 Mwanakazi ooyo naakabona “Samiyele,”* wakakwiila ajwi pati mpawo wakati kuli Sawulu: “Nkamboonzi nwaandeena? Ani teenduwe Sawulu biya!” 13 Mwaami wakati kulinguwe: “Utayoowi pe, ulikubonaanzi?” Mwanakazi ooyo wakasandula Sawulu kati: “Ndilikubona muntu uuli mbuli leza kalikuzwa munyika.” 14 Wakabuzya kuti: “Ulibiyeni muntu ooyo?” mpawo mwanakazi ooyo wakati: “Kulikuzwa mudaala alubo uzweete jansi litakwe maboko.” Naakamvwa oobo, Sawulu wakaziba kuti wakali “Samiyele” alubo wakavuntama aansi busyu kabulangide aansi.
15 Mpawo “Samiyele” wakati kuli Sawulu: “Undikataazizyaanzi kwiinda mukwaamba kuti ndeetwe?” Sawulu wakasandula kati: “Ndili mupenzi pati. MaFilisiti balikundilwana mpawo Leza wandisiya, tachindisanduli pe, nikuba kwiinda mubapolofita naakuti muziloto. Nzizyo zyapa kuti ndikwiite kuchitila kuti undibuzye nzindeelede kuchita.”
16 “Samiyele” wakati: “Nkamboonzi nulikubuzya kulindime kakuli Jehova wakusiya akuti waba sinkondonyokwe? 17 Jehova uzoochita nzyaakaamba kwiinda mulindime: Jehova uzoodelula bwaami kuzwa mumaboko aako, azoobupe umwi wabeenzinyokwe, Davida. 18 Akaambo kakuti teewakaswiilila jwi lyaJehova akuti teewakatondeezya bukali bwakwe bupati kuma-Amalekki, nzizyo zilikupa kuti Jehova achite zintu eezi kulinduwe sunu. 19 Jehova uzoobikka ma-Israyeli anduwe mukuboko kwamaFilisiti alubo juunza iwe abana bako muzooba aandime. Alubo Jehova uzoobikka masooja aama-Israyeli mumaboko aamaFilisiti.”
20 Aachiindi eecho, Sawulu wakawidaansi walandabala alubo wakayoowa loko akaambo kamajwi “aaSamiyele.” Alubo taakachilikwe manguzu pe, nkaambo taakalide pe buzuba boonse abusiku boonse. 21 Mwanakazi ooyo naakasika mpaakabede Sawulu akubona kuti wakakataazikene loko, wakati kulinguwe: “Mubelesi wako waziswiilila nzwaamubuzya alubo ndabikka buumi bwangu mungoozi mpawo ndachita nzwaandibuzya kuti ndichite. 22 Lino swiilila nzyataambe mubelesi wako. Leka ndikupe kankwa mpawo ulye, kuchitila kuti ujane manguzu nwaaba mulweendo lwako.” 23 Pesi wakakaka mpawo wakati: “Tandikoolya pe.” Nikuba oobo, babelesi bakwe amwanakazi ooyo bakayinkilila kunembo kumukombelezya. Kumamanino, wakabaswiilila mpawo wakanyampuka, wakkala aabulo. 24 Mwanakazi ooyo wakali aamwana wang’ombe uuneneede mung’anda yakwe, nkinkaako, wakamufunda* chakufwambaana mpawo wakabweza fulawa wayikanda, wajika chinkwa chitakwe bumena. 25 Wakazipa Sawulu ababelesi bakwe mpawo bakalya. Kuzwa waawo, bakanyampuka, beenda mansiku.