Samiyele Wakusaanguna
29 MaFilisiti bakabunganizya nkamu zyabo zyoonse zyamasooja ku-Afekki, ma-Israyeli bakakkempede kukasawu kali muJezriyeli. 2 Beendelezi bamaFilisiti bakali kweenda aankamu zyabo zyamyaanda ankamu zyabo zyazyuulu alubo Davida abaalumi mbaakalaabo bakali kutobela musule kabali aa-Akkishi. 3 Pesi basilutwe bamaFilisiti bakati: “Nkamboonzi maHebberu aaba nibali aano?” Akkishi wakasandula basilutwe bamaFilisiti kati: “Ooyu nguDavida, mubelesi waMwaami Sawulu wa-Israyeli, walaamwi andime kwamunyaka naakuti kwiinda. Taakwe bubi pe mbundakajana mulinguwe kuzwa mubuzuba mbwaakachijila kulindime kusika sunu.” 4 Pesi basilutwe bamaFilisiti bakamunyemena mpawo bakati kulinguwe: “Mubuzye abweede. Muleke abweede kundawu njwaakamupa. Utamulekeli pe kuti ayinke aandiswe kunkondo kuchitila kuti atazootubukili pe munkondo. Niinzi biya nchakonzya kuchita kuti ape kuti simalelaakwe amuyande kunze kwakumupa mitwe yamasooja eesu? 5 Teenguwe na Davida ooyu, ngubakayimba kabazyana kabati:
‘Sawulu wajaya zyuulu,
Davida wajaya makumi aazyuulu’?”
6 Nkinkaako, Akkishi wakayita Davida mpawo wakamubuzya kuti: “Kwaamba choonzyo, mbuli Jehova mbali muumi, iwe uliluleme alubo ime ndilayanda kuti wiinke aamasooja aangu kunkondo, nkaambo taakwe bubi mbundakajana mulinduwe kuzwa mubuzuba mbwaakasika kulindime kusika sunu. Pesi beendelezi tabakusyomi pe. 7 Nkinkaako, bweeda muluumuno alubo utachiti kufumbwa chintu chitababotezyi pe beendelezi bamaFilisiti.” 8 Nikuba oobo, Davida wakati kuli Akkishi: “Nkamboonzi, ndachitaanzi? Mulanduunzi ngwaajana mulindime ndimubelesi wako kuzwa mubuzuba nindakasika kulinduwe kusika sunu? Nkamboonzi ninditeelede kwiinka aanduwe kuti ndikalwane basinkondonyina bamwaami simalelaangu?” 9 Akkishi wakasandula Davida kati: “Kulindime, uli muntu uulikabotu mbuli ngilozi yaLeza. Pesi basilutwe bamaFilisiti baamba kuti: ‘Utamuleki kuti ayinke aandiswe kunkondo.’ 10 Lino mufumine, iwe ababelesi basimalelaako mbwaakazaabo, mubuke mweende kuseeni-seeni nibwacha.”
11 Nkinkaako, Davida abaalumi mbaakalaabo bakafuma kuseeni-seeni kuti babweede kunyika yamaFilisiti mpawo maFilisiti bakayinka kuJezriyeli.