Samiyele Wakusaanguna
4 Jwi lyaSamiyele lyakasika kuma-Israyeli boonse.
Mpawo ma-Israyeli bakayinka kuyoolwana maFilisiti. Bakakkempa aafwiifwi aku-Ebbeneza mpawo maFilisiti bakakkempede ku-Afekki. 2 MaFilisiti bakalibambila kuti balwane ma-Israyeli, pesi zintu teezyakabeendela kabotu pe ma-Israyeli alubo bakazundwa aamaFilisiti zyakuti maFilisiti bakajaya baalumi bali 4 000 munkondo eeyo. 3 Bantu nibakabweeda kukkeempu, baalu bama-Israyeli bakati: “Nkamboonzi Jehova naazumizya kuti tuzundwe* oobu amaFilisiti sunu? Atubweze bbokesi lyachizuminano chaJehova kuzwa kuShilo, kuchitila kuti libe aandiswe alubo lituvune mukuboko kwabasinkondoma.” 4 Nkinkaako, bantu bakatuma baalumi kuShilo, baakubweza bbokesi lyachizuminano chaJehova wamakamu, uukkala aachuuno chabwaami aajulu* aamakkerubbi. Bana ba-Eli babili Hofini aFiniyasi ambabo bakaliwo kabali aabbokesi lyachizuminano chaLeza wakasimpe.
5 Mbulyakasika biyo bbokesi lyachizuminano chaJehova mukkeempu, ma-Israyeli boonse bakasaanguna koompolola zyakuti nyika yakazungaana. 6 MaFilisiti nibakamvwa musindo wakoompolola bakati: “Nkamboonzi nikuli loompololo lupati oobu mukkeempu yamaHebberu?” Kumamanino, bakazooziba kuti Bbokesi lyaJehova lyakali lyeetwa mukkeempu. 7 MaFilisiti bakayoowa, nkaambo bakati: “Leza wasika mukkeempu!” Nkinkaako, bakati: “Zintu zyatubijila, nkaambo takunachitika zintu zili boobu pe! 8 Zintu zyatubijila! Ngwani uutatuvune mukuboko kwaLeza ooyu mupati? Ooyu nguuLeza wakajaya ma-Ijipita kwiinda mukubeetela mapenzi aasiyene-siyene munkanda. 9 Amube aachibindi nimaFilisiti, muchite mbuli baalumi, kuchitila kuti mutabi bazike bamaHebberu mbuli mbubakali bazike banu. Amuchite mbuli baalumi mubalwane!” 10 Nkinkaako, maFilisiti bakabalwana alubo ma-Israyeli bakazundwa zyakuti umwi awumwi wakachijila kutente lyakwe. Kwakafwa bantu biingi loko kubbazu lyama-Israyeli. Kwakajayigwa masooja aali 30 000 aayenda aamawulu. 11 Kuyungizya waawo, Bbokesi lyaLeza lyakabwezegwa aamaFilisiti alubo bana ba-Eli babili, Hofini aFiniyasi bakafwa.
12 Umwi mwaalumi wamusyobo waBbenjamini wakachija kunkondo mpawo wakasika kuShilo mubuzuba mbuboobo kazweete zigogo zidelukide alubo kali aalusuko mumutwe. 13 Mwaalumi ooyo naakasika, Eli wakalikkede aachuuno, kumbali aamugwagwa kalikulindila, nkaambo wakali kukataazikana mumoyo akaambo kaBbokesi lyaLeza wakasimpe. Mwaalumi ooyo wakanjila mumuunzi, waambilizya mulumbe mpawo bantu boonse bamumuunzi bakasaanguna kulila. 14 Eli naakamvwa kulila ooko wakabuzya kuti: “Nkamboonzi nikuli musindo ooyu?” Mwaalumi ooyo wakazide aamulumbe, wakafwambaana waakubuzya Eli makani aayo. 15 (Aachiindi eecho, Eli wakali aaminyaka iili 98 alubo meso aakwe akalijulikide, pesi taakali kubona pe.) 16 Mpawo mwaalumi ooyo wakati kuli Eli: “Ndime ndachija kunkondo! Ndachija sunu biya kuzwa kunkondo.” Mpawo Eli wakabuzya kuti: “Niinzi chachitika mwanaangu?” 17 Sikweeta mulumbe wakati: “Ma-Israyeli bachija maFilisiti alubo bantu bazundwa loko alubo bana bako babili, Hofini aFiniyasi bafwa mpawo Bbokesi lyaLeza wakasimpe lyabwezegwa.”
18 Naakaamba atala aBbokesi lyaLeza wakasimpe, Eli wakawidaansi wasalama kuzwa aachuuno chakwe chakali kumbali aageedi mpawo wakatyoka nsingo wafwa, nkaambo wakali wachembaala alubo wakalineneede. Wakali wabeteka ma-Israyeli kwaminyaka iili 40. 19 Aachiindi eecho, mukamwanaakwe, mwanakazi waFiniyasi, wakali aada alubo wakali waba aafwiifwi kutumbuka. Mbaakamvwa mulumbe wakuti Bbokesi lyaLeza wakasimpe lyabwezegwa akuti wisizyala amulumaakwe bafwa, wakakotama watalika kumyongwa katayeeyeli mpawo wakatumbuka. 20 Naakali waba aafwiifwi kufwa, banakazi bakayimvwi aafwiifwi anguwe bakati: “Utayoowi pe, nkaambo watumbuka mwana mulombe.” Taakabasandula pe alubo taakaba aandaba* pe. 21 Pesi mwana ooyo wakamuuzika kuti Ikkabbodi,* kati: “Bulemu bwazwa mu-Israyeli bwaya mubuzike,” kaamba Bbokesi lyaLeza wakasimpe lyakali lyabwezegwa azyakali zyachitika kuli wisizyala akumulumaakwe. 22 Wakati: “Bulemu bwazwa mu-Israyeli bwaya mubuzike, nkaambo Bbokesi lyaLeza wakasimpe lyabwezegwa.”