Samiyele Wakusaanguna
7 Nkinkaako, baalumi bakuKkiriyati-jeyarimu bakasika babweza Bbokesi lyaJehova batantaalyo aakalundu kabaya kung’anda ya-Abbinadabbu mpawo bakasalazya mwanaakwe Eliyezari kuti kanoolinda Bbokesi lyaJehova.
2 Nikwakayinda chiindi chilamfu loko, minyaka iili 20, kuzwa mubuzuba Bbokesi nilyakasika kuKkiriyati-jeyarimu, bantu boonse bamung’anda ya-Israyeli bakasaanguna kuyanduula* Jehova. 3 Mpawo Samiyele wakabuzya bantu boonse bamung’anda ya-Israyeli kuti: “Kuti kamulikubweeda kuli Jehova amyoyo yanu yoonse, amusowe baleza beenzu azikozyano zya-Ashitoreti zili aakati kanu, mulipede kuli Jehova amyoyo yanu yoonse alubo mukombe nguwe alikke mpawo uzoomufutula kuzwa mukuboko kwamaFilisiti.” 4 Aachiindi eecho, ma-Israyeli bakasowa baBbaala azikozyano zya-Ashitoreti mpawo bakakomba Jehova alikke.
5 Mpawo Samiyele wakati: “Amubunganizye ma-Israyeli boonse kuMizipa mpawo ndilamukombela kuli Jehova.” 6 Nkinkaako, bakabunganaamwi kuMizipa mpawo bakateka maanzi baatila kunembo lyaJehova alubo bakalyiimya kulya mubuzuba mbuboobo. Kabali nkukooko, bakati: “Twabisizya Jehova.” Mpawo Samiyele wakasaanguna kubeleka kali mubetesi wama-Israyeli kuMizipa.
7 MaFilisiti nibakamvwa kuti ma-Israyeli babunganaamwi kuMizipa, baami bamaFilisiti bakayinka kuti bakalwane ma-Israyeli. Ma-Israyeli nibakazimvwa eezi, bakayoowa akaambo kamaFilisiti. 8 Nkinkaako, ma-Israyeli bakati kuli Samiyele: “Utaleki pe kwiita Jehova Leza wesu kuti atugwasye akuti atuvune mukuboko kwamaFilisiti.” 9 Mpawo Samiyele wakabweza kabelele kachinyonka akukapa kakali chipo chitentwa chikkwene kuli Jehova. Samiyele wakayita Jehova kuti agwasye ma-Israyeli mpawo Jehova wakamusandula. 10 Samiyele naakali kupa chipo chitentwa, maFilisiti bakali kuzabuza kuzoolwana ma-Israyeli. Jehova wakapa kuti kube kudilima kupati mubuzuba oobo kumaFilisiti akuti banyongane mpawo bakazundwa kunembo lyama-Israyeli. 11 Aachiindi eecho, baalumi bachi-Israyeli bakazwa kuMizipa mpawo bakaandilila maFilisiti kabali kubajaya kusika kumusanza kwaBbeti-kkari. 12 Mpawo Samiyele wakabweza bbwe walibikka aakati kaMizipa aJeshana mpawo wakalyuuzika kuti Ebbeneza,* nkaambo wakati: “Jehova walikutugwasya kusikila lino.” 13 Nkinkaako, maFilisiti bakazundwa alubo taakwe nibakazoosika lubo pe muchilawu chama-Israyeli. Alubo kuboko kwaJehova kwakayinkilila kunembo kakulwana maFilisiti mumazuba woonse aaSamiyele. 14 Mukuyungizya, myuunzi yoonse maFilisiti njibakabwezede kuma-Israyeli yakabweedezegwa kuma-Israyeli, kuzwa ku-Ekkironi kusika kuGati alubo ma-Israyeli bakayibweza ndawu yabo kuzwa mukuboko kwamaFilisiti.
Alubo kwakaba luumuno aakati kama-Israyeli ama-Amori.
15 Samiyele wakayinkilila kunembo kabeteka ma-Israyeli kwabuumi bwakwe boonse. 16 Munyaka amunyaka, wakali kweenda kazyunguluka muBbeteli, muGiligali amuMizipa alubo wakabeteka ma-Israyeli mundawu zyoonse eezi. 17 Pesi wakali kubweeda kuRama, nkaambo nkuko nkuyakabede ng’anda yakwe alubo wakali kubeteka ma-Israyeli nkukooko. Wakayakila Jehova chipayililo nkukooko.