Samiyele Wakusaanguna
8 Samiyele naakachembaala, wakasala bana bakwe kuti babe babetesi mu-Israyeli. 2 Mwana wakwe wakusaanguna wakali Joweli, wachibili wakali Abbija. Bana aaba bakali babetesi muBberi-shebba. 3 Pesi bana bakwe teebakeenda munzila zyakwe pe, bakali kulijanina zintu munzila yakutasyomeka, bakali kutambula zisinkamulomo akubeteka munzila iitaluleme.
4 Nikwakayinda chiindi, baalu bamu-Israyeli bakabunganaamwi alubo bakaza kuli Samiyele kuRama. 5 Bakati kulinguwe: “Bona! Wachembaala, pesi bana bako tabalikweenda munzila zyako pe. Tusalile mwaami uutatubeteke mbuli zimwi zisi zyoonse.” 6 Pesi Samiyele taakabotelwa pe* nibakati: “Tupe mwaami uutatubeteke.” Nkinkaako, Samiyele wakakomba kuli Jehova, 7 mpawo Jehova wakati kuli Samiyele: “Swiilila nzibaamba bantu, nkaambo teenduwe pe ngubakaka, pesi bakaka ndime kuti ndibe mwaami wabo. 8 Balikuchita mbuli mbubakali kuchita kuzwa mubuzuba nindakabagwisya mu-Ijipita kusika sunu. Balikundikaka akukomba bamwi baleza alubo mbubalikuchita akulinduwe. 9 Baswiilizye. Nikuba oobo, ubachenjezye changuzu atala abuyumu-yumu mbubatazooswaane. Ubabuzye zyeelelo nzyanoolaazyo mwaami uutanoobeendelezye.”
10 Nkinkaako, Samiyele wakabuzya bantu bakali kukumbila mwaami majwi aaJehova woonse. 11 Wakati: “Nzezi zintu nzyanooli aacheelelo chakuchita muntu uutazoobe mwaami wanu: Uzoobweza bana banu balombe akubabikka kuti babeleke aangolo zyakwe akupa kuti babe basimabbiza bakwe alubo bamwi banoochijaana kunembo lyangolo zyakwe. 12 Alubo uzoosala bamwi kuti babe bazulwidi babantu bali chuulu abazulwidi babantu bali makumi aali musanu alubo bamwi bazooba basikumulimina, basikumutebwida abasikupanga zilwanisyo zyakwe zyankondo azibelesyo zyangolo. 13 Uzoobweza bana banu basimbi kuti babe basikupanga mafuta,* basikujika chakulya abasikujika zinkwa. 14 Uzoobweza zintu zibotu mumyuunda yanu yazilyo amumyuunda yanu yamisaansa amumyuunda yanu yama-olifa mpawo uzoozipa babelesi bakwe. 15 Uzoobweza chakkumi kuzwa kuzilyo zyamyuunda yanu amumyuunda yanu yamisaansa mpawo uzoozipa balupati-pati bakwe ababelesi bakwe. 16 Alubo uzoobweza babelesi banu bachaalumi abachanakazi, ng’ombe zyanu zibotu amadonki aanu azoozibelesye kumilimu yakwe. 17 Uzoobweza chakkumi kuzwa kumbelele ampongo zyanu alubo inywe muzooba babelesi bakwe. 18 Buzuba buzoosika aawo nimutazoolile akaambo kamwaami ngumwalisalila, pesi Jehova tazoomuvwiili pe mubuzuba oobo.”
19 Nikuba oobo, bantu teebakaziswiilizya pe nzyaakaamba Samiyele, bakati: “Peepe, iswe tuyanda mwaami uutatweendelezye. 20 Mpawo tulaba mbuli zimwi zisi zyoonse alubo mwaami wesu unootubeteka, unootuzulwida akutulwanina nkondo zyesu.” 21 Samiyele naakamvwa majwi aabantu woonse, wakaayindulula lubo Jehova kamvwide. 22 Jehova wakati kuli Samiyele: “Baswiilizye alubo usale mwaami uutabeendelezye.” Samiyele wakabuzya ma-Israyeli kuti: “Umwi awumwi abweede kumuunzi wakwe.”