Samiyele Wakusaanguna
14 Bumwi buzuba Jonatani mwana waSawulu wakati kumubelesi wakanyampwide zilwanisyo zyakwe: “Kuza tuzubukile kukkempede nkamu yamasooja aamaFilisiti.” Pesi taakamubuzya pe wisi. 2 Sawulu wakali kukkala nkwiimanina Gibbeya munsi aamunsamu wamupomegraneti kuMigironi alubo wakali aabaalumi basika ku 600. 3 (Alubo Ahija mwana wa-Ahitubbi mukulana wa-Ikkabbodi mwana waFiniyasi, mwana wa-Eli, wakali mupayizi waJehova kuShilo, wakabwezede kabaki kabupayizi.) Bantu teebakazi pe kuti Jonatani wakali wayinka. 4 Jonatani wakali kuyanda kwiinda mumumpata kuti akasike kwakakkempede masooja aamaFilisiti. Kumabazu aabili aamumpata ooyo kwakali mabwe aabili aakali mbuli menyo. Limwi bbwe lyakali kutegwa Bbozezi mpawo limwi lyakali kutegwa Sene. 5 Limwi bbwe lyakaliimvwi kubbazu lyakunyika kalilangide kuMikkimashi mpawo limwi lyakaliimvwi kubbazu lyakumusanza kalilangide kuGebba.
6 Jonatani wakati kuli sikumunyampwida zilwanisyo: “Kuza tuzubukile kukkeempu yabantu aaba batapalwidwe pe. Amwi Jehova ulakonzya kutugwasya, nkaambo taakwe chintu chikonzya kukachizya Jehova kuti atuvune kabelesya bantu biingi naakuti bache.” 7 Mpawo sikumunyampwida zilwanisyo wakati kulinguwe: “Chita kufumbwa moyo wako nchuuyanda kuti uchite. Yinka kufumbwa nkuyanda, ndilakutobela kufumbwa moyo wako nkuuyanda kuti uye.” 8 Mpawo Jonatani wakati: “Tulazubukila kubaalumi aaba mpawo tukalitondeezye kulimbabo. 9 Kuti bakatubuzye kuti, ‘Amwiimikile mpawaawo kusikila tusike kulindinywe!’ tulayimikila mpututanoobede, tatukatanti pe kuti tuye kulimbabo. 10 Pesi kuti bakaambe kuti, ‘Amutante muzootulwane!’ tulatanta, nkaambo Jehova unooli wababikka mukuboko kwesu. Eechi nchicho chinooli chitondeezyo chesu.”
11 Mpawo boonse kabali babili, bakalitondeezya kukkeempu yamaFilisiti. MaFilisiti bakati: “Amubone! MaHebberu balikuzwa mumpako mubayubide.” 12 Nkinkaako, baalumi bakali mukkeempu bakati kuli Jonatani akuli sikumunyampwida zilwanisyo: “Amutante muze ookuno mpawo tulamuyiisya chiiyo!” Aachiindi eecho, Jonatani wakati kuli sikumunyampwida zilwanisyo: “Nditobele, nkaambo Jehova ulababikka mukuboko kwa-Israyeli.” 13 Mpawo Jonatani wakasaanguna kutanta kajatilila aamaboko, sikumunyampwida zilwanisyo kalikumutobela musule. Mpawo maFilisiti bakali kuwa kunembo lyaJonatani alubo sikumunyampwida zilwanisyo wakali kubajaya musule lyakwe. 14 Nibakabalwana kakusaanguna, Jonatani asikumunyampwida zilwanisyo, bakajaya baalumi bali 20 mumusinzo uusika kuhafu yabulimo bulimwa aachipani chang’ombe mubuzuba bumwi.
15 Kuyoowa kwakazula mukkeempu yakali musokwe akumasooja woonse, nibaba basikunyanga bantu zintu bakaliyoowede. Nyika yakasaanguna kuzungaana alubo Leza wakapa kuti bantu bayoowe. 16 Balindi baSawulu bakuGibbeya iili muchilawu chaBbenjamini, bakabona kuti lupyopyongano lwakali kuyabuzula ndawu yoonse.
17 Sawulu wakati kubantu mbaakalaabo: “Amubale bantu mubone kuti ngwani wazwa.” Nibakabala bantu, bakabona kuti Jonatani asikumunyampwida zilwanisyo teebakaliwo pe. 18 Sawulu wakati kuli Ahija: “Yeta Bbokesi lyaLeza wakasimpe aafwiifwi.” (Nkaambo aachiindi eecho,* Bbokesi lyaLeza wakasimpe lyakali aama-Israyeli.) 19 Sawulu naakali kwaambuula aamupayizi, lupyopyongano mukkeempu yamaFilisiti lwakali kuyabuvula. Mpawo Sawulu wakati kumupayizi: “Leka nzulikuchita.”* 20 Nkinkaako, Sawulu abantu boonse mbaakalaabo bakabunganaamwi mpawo bakaya kunkondo, ooko nkubakaakujana maFilisiti kabali bajayana chabo-chabo amapanga alubo lupyopyongano lwakali lupati loko. 21 Alubo maHebberu bakali bayinka kubbazu lyamaFilisiti akwiinka aambabo kukkeempu yabo, bakali baabubweeda kuma-Israyeli bakali kuzulwidwa aaSawulu aJonatani. 22 Baalumi boonse bachi-Israyeli bakayubide muchilawu chili aazilundu cha-Efremu, bakamvwa kuti maFilisiti bachija mpawo ambabo bakaliswaanizya mukubaandilila munkondo. 23 Nkinkaako, Jehova wakavuna Israyeli mubuzuba oobo alubo nkondo yakayinkilila kunembo kusikila kuBbeti-aveni.
24 Pesi baalumi bachi-Israyeli bakaliwizukide mubuzuba oobo, nkaambo Sawulu wakali wakonkezya bantu kuti: “Ulitukidwe muntu uutalye kufumbwa chakulya kusikila mansiku alubo kusikila ndibweedezye chibi kuli basinkondoma!” Nkinkaako, taakwe muntu wakalya chakulya* pe.
25 Mpawo bantu boonse bakanjila* mulusaka alubo kwakali buchi aansi. 26 Bantu nibakanjila mulusaka bakabona buchi bwakali kuloka, pesi taakwe muntu naba uumwi wakabikka kuboko kwakwe munkanwa kuti abulabile, nkaambo bakali kuyoowa chikonke. 27 Pesi Jonatani taakamvwa pe chiindi wisi naakakonkezya bantu, nkinkaako, wakatandabika mufunko wakali mukuboko kwakwe wawugumika aamayaya aabuchi nkuuli kumpela. Naakatola kuboko kwakwe kumulomo kuti abulye, kumeso kwakangweemuka. 28 Aachiindi eecho, umwi wabo wakati: “Wuso wakonkezya bantu kati: ‘Ulitukidwe muntu uutalye chakulya sunu!’ Eezi nzizyo zyapa kuti bantu bakatale.” 29 Nikuba oobo, Jonatani wakati: “Ndeende wapa kuti bantu banjile mumapenzi munyika. Amubone mbundangweemuka kumeso akaambo katuchi tuche ntundalabila. 30 Zyalikunoobota loko kaansinga bantu balilida kuzwa kuzintu nzibanyanga basinkondonyina! Alubo kwalikunoojayigwa maFilisiti miingi loko.”
31 Mubuzuba oobo, bakayinkilila kunembo kujaya maFilisiti kuzwa kuMikkimashi kusika ku-Ayijaloni alubo bantu bakakatala loko. 32 Nkinkaako, bantu bakachijaana baakubweza zintu nzibakali banyanga basinkondonyina. Bakabweza mbelele ang’ombe mpawo bakazijaya mpawaawo, balya nyama kuswaanizya aganzi lyayo. 33 Sawulu wakabuzigwa majwi aaya: “Bona! Bantu babisizya Jehova kwiinda mukulya nyama aganzi lyayo.” Mpawo Sawulu wakati: “Mwachita chakutasyomeka. Amukunkulisye bbwe pati eelyo aalindime chakufwambaana.” 34 Mpawo Sawulu wakati: “Amwiinke kubantu, mubabuzye kuti, ‘Umwi awumwi ayete pule wang’ombe ambelele mpawo azifunde ookuno alubo azilye. Mutabisizyi Jehova kwiinda mukulya nyama aganzi lyayo.’” Nkinkaako, umwi awumwi wakeeta pule wang’ombe wakwe mubusiku oobo, wamujaya nkukooko. 35 Mpawo Sawulu wakayakila Jehova chipayililo. Eechi nchicho chakali chipayililo chakusaanguna Sawulu nchaakayakila Jehova.
36 Mukuya kwachiindi, Sawulu wakati: “Atukunukile maFilisiti tukabalwane busiku boonse kusika kuseeni nibwacha. Taakwe muntu ngutweelede kusiya pe.” Mpawo bakati: “Chita kufumbwa nzubona kuti zilikabotu mumeso aako.” Mpawo mupayizi wakati: “Atubuzye makani kuli Leza wakasimpe aano.” 37 Sawulu wakabuzya Leza kuti: “Ndiinke na ndikalwane maFilisiti? Uzoobabikka na mukuboko kwa-Israyeli?” Pesi Leza taakamusandula pe mubuzuba oobo. 38 Nkinkaako, Sawulu wakati: “Amuze aafwiifwi moonse nibazulwidi babantu mpawo mubone kuti nchibiinzi chachitwa sunu. 39 Kwaamba choonzyo, mbuli Jehova mbali muumi, ooyo wakavuna Israyeli, nikuba kuti nguJonatani mwanaangu, weelede kufwa.” Pesi taakwe muntu wakamusandula pe. 40 Mpawo Sawulu wakati kuma-Israyeli boonse: “Inywe mulaba kubbazu eeli mpawo ime amwanaangu Jonatani tulaba kubbazu eeli.” Bantu bakasandula Sawulu kabati: “Chita kufumbwa nzubona kuti zilikabotu mumeso aako.”
41 Mpawo Sawulu wakati kuli Jehova: “O Leza wa-Israyeli, sandula kwiinda muTumimu!” Mpawo Jonatani aSawulu bakasalwa alubo bantu bakeenda kabaangunukide. 42 Sawulu wakati: “Amuume chisale* aakati kangu amwanaangu Jonatani.” Mpawo Jonatani wakasalwa. 43 Sawulu wakati kuli Jonatani: “Ndibuzye, wachitaanzi?” Nkinkaako, Jonatani wakamubuzya kuti: “Ndalabila tuchi tuche twali kumpela aamufunko wali mukuboko kwangu. Ndime aano! Ndalipeda kufwa!”
44 Sawulu wakati: “Leza andisubule alubo ayungizye chisubulo eecho kuti iwe Jonatani teewafwa.” 45 Pesi bantu bakati kuli Sawulu: “Jonatani afwe na, kali nguwe weeta luzundo* oolu kuma-Israyeli? Tazichiti pe! Kwaamba choonzyo, mbuli Jehova mbali muumi, taakwe nikaba kasusu kamwi kamumutwe wakwe keelede kuwidaansi, nkaambo Leza nguwe wapa kuti achite oobo sunu.” Bantu nibakaamba oobo bakamuvuna* Jonatani, taakafwa pe.
46 Nkinkaako, Sawulu wakaleka kutobela maFilisiti alubo maFilisiti bakayinka kuchilawu chabo.
47 Sawulu wakasimya bwaami bwakwe mu-Israyeli alubo wakalwana basinkondonyina boonse mumabazu woonse. Wakalwana aamaMowabbu, ma-Amoni, ma-Edomu, baami baZobba amaFilisiti alubo kufumbwa nkwaakali kuya, wakali kubazunda. 48 Wakalwana kali aachibindi, wakazunda ma-Amalekki alubo wakavuna ma-Israyeli kuzwa mukuboko kwabasikubanyanga zintu.
49 Bana balombe baSawulu bakali Jonatani, Ishivi aMalikki-shuwa. Alubo wakali aabana basimbi babili. Mupati wakali kutegwa Merabbu mpawo muniini wakali kutegwa Mikkala. 50 Mwanakazi waSawulu wakali kutegwa Ahinowamu mwana wa-Ahimazi. Mupati wamasooja aakwe wakali Abbineri mwana waNeri, wisi muniini waSawulu. 51 Kkishi wakali wisi waSawulu alubo Neri, ooyo wakali wisi wa-Abbineri, wakali mwana wa-Abbiyeli.
52 Mumazuba woonse aaSawulu kwakali nkondo iiyoosya aakati kakwe amaFilisiti. Sawulu naakali kubona kufumbwa mwaalumi uusimide uuli aachibindi, wakali kumubweza kuti abe musooja wakwe.