Samiyele Wakusaanguna
18 Davida mbaakamaninsya biyo kwaambuula aaSawulu, Jonatani aDavida bakaba beenzinyina bamvwanana loko alubo Jonatani wakasaanguna kuyanda Davida mbuli mbaliyanda.* 2 Kuzwa mubuzuba oobo, Sawulu wakabweza Davida wakkalaawe alubo taakamuzumizya pe kuti abweede kung’anda yawisi. 3 Mukuyungizya, Jonatani aDavida bakapangana chizuminano, nkaambo wakali kumuyanda mbuli mbaliyanda. 4 Jonatani wakagwisya jansi lyakwe litakwe maboko ndyaakali kuzwaata, walipa Davida azigogo zyakwe zyankondo, kuswaanizya apanga lyakwe adaantambwa lyakwe abbanti lyakwe. 5 Davida wakasaanguna kwiinka kunkondo alubo wakali kuzwidilila* kufumbwa Sawulu nkwaakali kumutuma. Nkinkaako, Sawulu wakamubikka kuti abe mupati wabaalumi bakali kulwana nkondo alubo eezi zyakabotezya bantu boonse ababelesi baSawulu.
6 Chiindi Davida abamwi nibakali kuboola kabazwa kukujaya maFilisiti, banakazi bakali kuzwa mumyuunzi yoonse yama-Israyeli kuti bakaswaanane aaMwaami Sawulu kabali kwiimba akuzyana kabajisi nsakalala, kabali kubotelwa akulizya zibelesyo zyakwiimbya zili aantambo zitatu. 7 Banakazi bakali kubotelwa bakali kwiimba kabati:
“Sawulu wajaya zyuulu,
Davida wajaya makumi aazyuulu.”
8 Sawulu wakanyema loko alubo lwiimbo oolu teelwakamubotezya pe, nkaambo wakati: “Davida balikumupa makumi aazyuulu, pesi ime balikundipa zyuulu. Chasyaala nkumupa bwaami kupela!” 9 Kuzwa mubuzuba oobo, Sawulu taakachili kumusyoma pe Davida.
10 Mubuzuba bwakatobela, muuya mubi uuzwa kuli Leza, wakasikila Sawulu alubo wakasaanguna kuchita mbuli muntu uupengede* kali mung’anda yakwe, chiindi Davida naakali kulizya kantimbwa mbuli mazuba woonse. Sawulu wakajisi sumu mukuboko kwakwe 11 mpawo wakawaala sumu kalikulibuzya kuti: ‘Ndilamuyasikizya kumuduli Davida!’ Pesi Davida wakamuchija tubili. 12 Sawulu wakasaanguna kumuyoowa Davida, nkaambo Jehova wakali aanguwe, pesi wakali wasiya Sawulu. 13 Nkinkaako, Sawulu wakamugwisya kunembo lyakwe alubo wakamusala kuti abe muzulwidi wabali chuulu. Mukuyungizya, Davida wakali kuzulwida nkamu yamasooja kunkondo.* 14 Davida wakayinkilila kunembo kuzwidilila* muzintu zyoonse nzyaakali kuchita alubo Jehova wakali aanguwe. 15 Chiindi Sawulu naakabona kuti wakali kuzwidilila loko, wakasaanguna kumuyoowa. 16 Pesi ma-Israyeli boonse amaJuda bakali kumuyanda Davida, nkaambo wakali kubazulwida kunkondo.
17 Mukuya kwachiindi, Sawulu wakati kuli Davida: “Ngoyu mwanaangu musimbi mupati Merabbu. Ndilakupa nguwe kuti abe mwanakazi wako. Nikuba oobo, weelede kwiinkilila kunembo kunootondeezya chibindi akulwana nkondo zyaJehova.” Nkaambo Sawulu wakalibuzya kuti: ‘Kuboko kwangu teenkuko pe kweelede kumujaya, pesi ajayigwe aakuboko kwamaFilisiti.’ 18 Mpawo Davida wakati kuli Sawulu: “Ndimeni loko alubo babbululu bangu ampuli yandeende mbaani biya mu-Israyeli, zyakuti ndibe mukwaansa wamwaami?” 19 Nikuba oobo, nichakasika chiindi chakuti Merabbu mwana waSawulu apegwe Davida, wakali wapegwa Adiliyeli wakuMehola kuti abe mwanakazi wakwe.
20 Mikkala mwana waSawulu wakali kuyanda Davida mpawo Sawulu wakabuzigwa makani aayo alubo akamubotezya. 21 Nkinkaako, Sawulu wakati: “Ndilamupa mwanaangu kuchitila kuti abe kakole kulinguwe, kuchitila kuti kuboko kwamaFilisiti kuze aalinguwe.” Mpawo Sawulu wakabuzya Davida kachibili kuti: “Pangana aandime chizuminano chalukwatano* sunu.” 22 Mukuyungizya, Sawulu wakalayilila babelesi bakwe kuti: “Amwaambuule aaDavida chakusisikizya mumubuzye kuti, ‘Bona! Mwaami ulabotelwa anzuchita ababelesi bakwe boonse balakuyanda. Nkinkaako, kwata mwana wamwaami.’” 23 Chiindi babelesi baSawulu nibakabuzya Davida zintu eezi, Davida wakati: “Mubonaanga nchintu chiniini na kukwata mwana wamwaami, kakuli ndili muntu uufwaba alubo uutakwe ambabede?” 24 Mpawo babelesi baSawulu bakamubuzya kuti: “Aaya ngiimajwi ngaamba Davida.”
25 Mpawo Sawulu wakati: “Nzezi nzimweelede kubuzya Davida, ‘Mwaami tayandi luselo pe, uyanda biyo ndomo zyamaFilisiti zili 100 kuchitila kuti ababweedezye chibi basinkondonyina bamwaami.’” Nkaambo Sawulu wakakanzide kuti Davida ajayigwe aakuboko kwamaFilisiti. 26 Nkinkaako, babelesi bakwe bakaamba majwi aaya kuli Davida alubo zyakamubotezya Davida kuti akwate mwana wamwaami. Kachitanakkwana chiindi chakabikkidwe, 27 Davida wakayinka aabaalumi mbaakalaabo, waakujaya baalumi bachiFilisiti bali 200 alubo Davida wakeeta ndomo zikkwene kumwaami kuti apangane chizuminano chalukwatano amwaami. Nkinkaako, Sawulu wakamupa mwanaakwe Mikkala kuti abe mwanakazi wakwe. 28 Sawulu wakazibona kuti Jehova wakali aaDavida akuti mwanaakwe Mikkala wakali kumuyanda Davida. 29 Eezi zyakapa kuti Sawulu amuyoowe loko Davida alubo Sawulu wakazonda Davida kwabuumi bwakwe boonse.
30 Balupati-pati bamaFilisiti bakali kunoonga bazwa baya kunkondo, pesi chiindi choonse nibakali kwiinka, Davida wakali kuzwidilila* loko kwiinda babelesi baSawulu boonse alubo zina lyakwe lyakaba aampuwo mpati.