Samiyele Wakusaanguna
19 Nikwakayinda chiindi, Sawulu wakaambuula aamwanaakwe Jonatani ababelesi bakwe boonse atala akujaya Davida. 2 Mbukunga Jonatani mwana waSawulu wakali kumuyanda loko Davida, Jonatani wakabuzya Davida kuti: “Ndeende uyanda kuti ujayigwe. Nkinkaako, libambile kuseeni, wiinke kundawu iisisikene ukayube nkukooko. 3 Ndizoozwa ndiimikile aafwiifwi andeende musokwe nkunoobede. Ndilaambuula aandeende atala anduwe, kuti kwaba zintu nzinditamvwe ndizookubuzya.”
4 Nkinkaako, Jonatani wakaambuula makani mabotu atala aDavida kuli Sawulu. Wakati kulinguwe: “Mwaami tayelede kuchita zintu zibi kumubelesi wakwe Davida, nkaambo taakakubisizya pe alubo zintu nzyaakakuchitila zyakakugwasya. 5 Wakabikka buumi bwakwe mungoozi kuti ajaye muFilisiti, zyakuti Jehova wakapa kuti kube luzundo* lupati kuma-Israyeli boonse. Iwe wakazibona mpawo wakabotelwa loko. Lino nkamboonzi nweelede kutila ganzi lyamuntu uutakwe mulandu kwiinda mukupa kuti Davida ajayigwe kakutakwe kaambo?” 6 Sawulu wakaswiilila Jonatani alubo wakakonka kati: “Kwaamba choonzyo, mbuli Jehova mbali muumi, takoojayigwa pe.” 7 Kuzwa waawo, Jonatani wakayita Davida mpawo wakamubuzya makani woonse aaya. Nkinkaako, Jonatani wakeeta Davida kuli Sawulu alubo wakayinkilila kunembo kali kumubelekela mbuli mbaakali kuchita.
8 Mukuya kwachiindi, kwakaba nkondo lubo alubo Davida wakazwa waakulwana aamaFilisiti mpawo wakajaya bantu biingi alubo bamwi boonse bakamuchija.
9 Alubo muuya mubi uuzwa kuli Jehova wakasikila Sawulu naakakkede mung’anda yakwe, kajisi sumu mukuboko kwakwe chiindi Davida naakali kulizya kantimbwa. 10 Sawulu wakeezya kuyasikizya Davida kumuduli asumu, pesi Davida wakalileya sumu lyaSawulu mpawo lyakayasa aamuduli. Mubusiku mbuboobo, Davida wakachija, wafutuka. 11 Nikwakayinda chiindi, Sawulu wakatuma batumwa kung’anda yaDavida kuti bakamuyubilile akuti bamujaye kuseeni. Pesi Mikkala, mwanakazi waDavida wakamubuzya kuti: “Kuti teewachija* sunu mansiku, juunza unooli wafwa.” 12 Aachiindi nchicheecho, Mikkala wakaselusya Davida aawindo kuchitila kuti achije afutuke. 13 Mpawo Mikkala wakabweza chibumbwa chamaterafimu* wachibikka aabulo alubo wakabikka kansabwe kakapangidwe aaboya bwampongo kubbazu Davida nkwaakali kubikka mutwe mpawo wakachivumba aamulembo.
14 Aachiindi eecho, Sawulu wakatuma batumwa kuti bakeete Davida, pesi Mikkala wakati: “Ulikuchiswa.” 15 Nkinkaako, Sawulu wakatuma batumwa kuti bakabone Davida mpawo wakababuzya kuti: “Mumweete kulindime kali aabulo bwakwe kuti ajayigwe.” 16 Batumwa nibakasika, kwakali chibumbwa chamaterafimu* aabulo bwakwe akansabwe kakapangidwe aaboya bwampongo kakabikkidwe kubbazu Davida nkwaakali kubikka mutwe. 17 Sawulu wakati kuli Mikkala: “Nkamboonzi nwaandeena oobu akupa kuti sinkondoma achije?” Mikkala wakasandula Sawulu kati: “Wakandibuzya kuti, ‘Ndileke ndichije, kuti teewachita oobo, ndilakujaya!’”
18 Davida wakali wachija akufutuka alubo wakayinka kuli Samiyele kuRama. Wakamubuzya zyoonse Sawulu nzyaakali wachita kulinguwe. Mpawo Davida aSamiyele bakayinka baakukkala kuNayoti. 19 Nikwakayinda chiindi, Sawulu wakabuzigwa kuti: “Davida uli kuNayoti kuRama.” 20 Aachiindi nchicheecho, Sawulu wakatuma batumwa kuti bakajate Davida. Nibakabona bapolofita bakomena kabali kupolofita, aSamiyele kayimvwi kali kubazulwida, muuya waLeza wakasikila batumwa baSawulu mpawo ambabo bakasaanguna kuchita mbuli bapolofita.
21 Nibakabuzya Sawulu makani aaya, wakatuma bamwi batumwa aachiindi nchicheecho mpawo ambabo bakasaanguna kuchita mbuli bapolofita. Nkinkaako, Sawulu wakatuma kabunga kachitatu kabatumwa mpawo ambabo bakasaanguna kuchita mbuli bapolofita. 22 Kumamanino, anguwe wakayinka kuRama. Naakasika kumugodi mupati wakali kuSekku wakabuzya kuti: “Ani Samiyele aDavida balikuli?” Mpawo bakamusandula kuti: “Bali kuNayoti muRama.” 23 Sawulu naakali kweenda kazwa kundawu eeyo kaya kuNayoti kuRama, muuya waLeza wakamusikila anguwe. Mpawo wakeenda kalikuchita mbuli mupolofita kusikila naakasika kuNayoti kuRama. 24 Alubo Sawulu wakagwisya zigogo zyakwe mpawo anguwe wakasaanguna kuchita mbuli mupolofita kunembo lyaSamiyele alubo wakoona mpawaawo katazweete* kwabuzuba boonse abusiku boonse. Nchibaamba kuti: “Sawulu anguwe waba mupolofita na?”