Samiyele Wakusaanguna
22 Nkinkaako, Davida wakazwa mundawu eeyo, wachija waakuyuba mumpako yaku-Adulamu. Babbululu bakwe abantu boonse bamung’anda yawisi nibakazimvwa, bakakunuka baya kulinguwe. 2 Bantu boonse bakakataazikene abakali aazikwelete abakatali kubotelwa mubuumi bwabo,* bakayinka kulinguwe mpawo wakaba muzulwidi wabo. Baalumi mbaakalaabo bakachisike ku 400.
3 Nikwakayinda chiindi, Davida wakazwa mundawu eeyo waya kuMizipa kuMowabbu mpawo wakati kumwaami wakuMowabbu: “Ndikumbila kuti ndeende abaama bakkale aanduwe kusikila ndizibe kuti Leza ulandichitilaanzi.” 4 Nkinkaako, wakabasiya aamwaami wakuMowabbu alubo bakakkala aanguwe chiindi choonse Davida naakali mundawu iikwabilidwe.
5 Mukuya kwachiindi, mupolofita Gadi wakati kuli Davida: “Utakkali mundawu iikwabilidwe. Zwa mundawu eeyi uye munyika yaJuda.” Nkinkaako, Davida wakazwa waya mulusaka lwaHereti.
6 Sawulu wakazoomvwa kuti Davida abaalumi mbaakalaabo bajanika. Aachiindi eecho, Sawulu wakakkede munsi aamunsamu wamutamarisikki aandawu iili aajulu kuGibbeya, kajisi sumu lyakwe mukuboko alubo babelesi bakwe boonse kabamuzyungulukide. 7 Mpawo Sawulu wakabuzya babelesi bakwe bakamuzyungulukide kuti: “Amuswiilile nibantu bamusyobo waBbenjamini. Mubonaanga mwana waJese uzoomupa na moonse myuunda yazilyo ayamisaansa? Uzoomubikka na moonse kuti mube bazulwidi bazyuulu abazulwidi bamyaanda? 8 Moonse mwandibukila! Taakwe naba uumwi wakandibuzya, chiindi mwanaangu naakapangana chizuminano amwana waJese! Taakwe naba uumwi uuli kundeetelela akundibuzya kuti mwanaangu wakayunga mubelesi wangu kuti andibwatilile, mbuli mbuzili kuchitika lino.”
9 Mpawo Dowegi mu-Edomu, ooyo wakali kuzulwida babelesi baSawulu wakasandula kati: “Ndakamubona mwana waJese naakasika kuNobbu kuli Ahimelekki mwana wa-Ahitubbi. 10 Mpawo Ahimelekki wakamubuzizya makani kuli Jehova alubo wakamupa chakulya. Wakamupa apanga lyaGoliyati muFilisiti.” 11 Aachiindi nchicheecho, mwaami wakati Ahimelekki mwana wa-Ahitubbi mupayizi asike, kuswaanizya abapayizi boonse bamung’anda yawisi bakali kuNobbu. Nkinkaako, boonse bakasika kumwaami.
12 Sawulu wakati kulinguwe: “Swiilila iwe numwana wa-Ahitubbi!” mpawo wakati: “Ndime aano, simalelaangu.” 13 Sawulu wakati kulinguwe: “Nkamboonzi iwe nwaandibukila amwana waJese, kwiinda mukumupa chinkwa apanga akumubuzizya makani kuli Leza? Wandibukila alubo ulikundibwatilila, mbuli mbuzili kuchitika lino.” 14 Ahimelekki wakasandula mwaami kati: “Aakati kababelesi bako boonse, ngwani uusyomeka kwiinda Davida? Davida mukwaansa wamwaami alubo mupati wabalindi bako alubo ulalemekwa mung’anda yako. 15 Ndasaanguna sunu na kumubuzizya makani kuli Leza? Tandikoonga ndazichita pe zintu nzulikwaamba. Utandipi mulandu ime ndimubelesi wako, kuswaanizya abantu boonse bamung’anda yandeende, nkaambo ime ndimubelesi wako taakwe nchindakazi pe atala amakani aaya.”
16 Pesi mwaami wakati: “Kwaamba choonzyo, iwe Ahimelekki weelede kufwa, kuswaanizya abantu boonse bamung’anda yawuso.” 17 Mpawo mwaami wakabuzya balindi* bakamuzyungulukide kuti: “Amuchengunuke mujaye bapayizi baJehova, nkaambo baba kubbazu lyaDavida! Bakalizi kuti wakachija, pesi bakaleka kundibuzya!” Nikuba oobo, babelesi bamwaami teebakali kuyanda pe kujaya bapayizi baJehova. 18 Mpawo mwaami wakati kuli Dowegi: “Iwe chengunuka ubajaye bapayizi!” Aachiindi nchicheecho, Dowegi mu-Edomu wakayinka waakujaya bapayizi. Wakajaya baalumi bali 85 bakazweete tubaki twabupayizi twamulembo mubotu. 19 Wakanyonyoona Nobbu muunzi wabapayizi apanga alubo wakabanyonyoona aapanga baalumi abanakazi, bana baniini abaabo bachinyonka ang’ombe amadonki ambelele.
20 Nikuba oobo, umwi mwana wa-Ahimelekki wakali kutegwa Abbiyata wakafutuka mpawo wakachija watobela Davida. 21 Abbiyata wakabuzya Davida kuti: “Sawulu wajaya bapayizi baJehova.” 22 Davida naakamvwa oobo, wakati kuli Abbiyata: “Ndakaziziba mubuzuba oobuya Dowegi naakaliwo kuti wakali kuzoomubuzya kupela Sawulu. Ndime ndajazya bantu boonse bamung’anda yawuso. 23 Kkala aandime. Utayoowi pe, nkaambo kufumbwa uuyanduula buumi bwako uyanduula buumi bwangu. Ime ndizookukwabilila.”