Samiyele Wakusaanguna
23 Mukuya kwachiindi, Davida wakabuzigwa kuti: “MaFilisiti balikulwana Kkeyila alubo balikunyanga bantu chakulya mumabuwa aakupolela.” 2 Nkinkaako, Davida wakabuzya kuli Jehova kuti: “Ndiinke na ndikalwane maFilisiti aaya?” Jehova wakati kuli Davida: “Yinka ukalwane maFilisiti mpawo uvune Kkeyila.” 3 Pesi baalumi mbaakalaabo Davida bakati kulinguwe: “Bona! Oomuno muJuda tuliyoowede, nkukwaamba kuti, kuti twayinka kuKkeyila kuti tukaakulwane masooja aamaFilisiti, tunooli twaabuyoowa loko!” 4 Nkinkaako, Davida wakabuzya lubo kuli Jehova. Jehova wakamusandula kati: “Nyampuka ukunukile kuKkeyila, nkaambo maFilisiti ndilaabikka mukuboko kwako.” 5 Davida abaalumi mbaakalaabo bakayinka kuKkeyila baakulwana maFilisiti. Bakabweza lubono lwabo alubo bakajaya bantu biingi mpawo Davida wakavuna bantu bakuKkeyila.
6 Abbiyata mwana wa-Ahimelekki naakachija kaya kuli Davida kuKkeyila, wakali aakabaki kabupayizi. 7 Sawulu wakabuzigwa kuti: “Davida waza kuKkeyila.” Mpawo wakati: “Leza wamupa kulindime,* nkaambo walibikka mukakole kwiinda mukunjila mumuunzi uuli aamageedi aminkulwa.”* 8 Sawulu wakayita bantu boonse kuti baye kunkondo, bakunukile kuKkeyila akuti bakasinkile Davida abaalumi mbaakalaabo. 9 Davida naakaziba kuti Sawulu wakakanzide kumuchitila zintu zibi, wakabuzya Abbiyata mupayizi kuti: “Yeta ookuno kabaki kabupayizi.” 10 Davida wakati: “O Jehova Leza wa-Israyeli, mubelesi wako wamvwa kuti Sawulu uyanda kuza kuKkeyila kuti azoonyonyoone muunzi ooyu akaambo kandime. 11 Bazulwidi* bamuKkeyila bazoondibikka na mukuboko kwakwe? Sawulu uzookunukila ookuno na mbuli mbundamvwa ndimubelesi wako? O Jehova Leza wa-Israyeli ndibuzye ndimubelesi wako.” Mpawo Jehova wakati: “Uzoosika.” 12 Davida wakabuzya kuti: “Bazulwidi bamuKkeyila bazoondibikka na mukuboko kwaSawulu ime abaalumi mbindilaabo?” Jehova wakasandula kati: “Bazookubikka.”
13 Aachiindi nchicheecho, Davida wakanyampuka abaalumi mbaakalaabo bakali kusika ku 600. Bakazwa muKkeyila bayinka kundawu zisiyene-siyene nzibakali kubona kuti zyakali kabotu. Sawulu naakabuzigwa kuti Davida wazwa muKkeyila, taakamutobela pe. 14 Davida wakakkala munkanda mundawu zyakali kukataazya kusika, muzilundu zyamuchilawu chankanda yaZifi. Sawulu wakaliswini kumuyanduula, pesi Jehova taakamubikka pe mukuboko kwakwe. 15 Davida wakalizi kuti* Sawulu wakali wazwa kuti akayanduule buumi bwakwe naakali munkanda yaZifi kuHoreshi.
16 Aachiindi eecho, Jonatani mwana waSawulu wakaya kuli Davida kuHoreshi mpawo wakamugwasya kuti ajane nguzu* muli Jehova. 17 Wakati kulinguwe: “Utayoowi pe, nkaambo Sawulu, ndeende tazookujani pe. Iwe uzooba mwaami wa-Israyeli mpawo ime ndizooba wachibili kulinduwe alubo Sawulu, ndeende ulizizi eezi.” 18 Mpawo boonse kabali babili bakapangana chizuminano kunembo lyaJehova. Davida wakakkala muHoreshi mpawo Jonatani wakabweeda kumuunzi wakwe.
19 Nikwakayinda chiindi, baalumi bakuZifi bakatanta kabaya kuli Sawulu kuGibbeya mpawo bakamubuzya kuti: “Davida uyubide aafwiifwi andiswe mundawu zikataazya kusika, kuHoreshi, aakalundu kaHakkila kali kubbazu lyakumusanza* kwaJeshimoni.* 20 Kufumbwa chiindi nwaayanda kuza O mwaami, ulakonzya kuza mpawo tulamubikka mukuboko kwako mwaami.” 21 Amvwe oobo, Sawulu wakati: “Jehova amulongezye,* nkaambo mwandifwida luzyalo. 22 Lino ndikumbila kuti mwiinke mukayanduule mpabede loko akuti ngwani wakamubona, nkaambo ndakabuzigwa kuti mulombe ooyu uchenjede loko. 23 Amukaziyanduulisisye ndawu zyoonse nzyayubila mpawo muboole kulindime kamuli aabukamboni. Kuzwa waawo, ndizooyinka aandinywe alubo kuti kali munyika eeyo, ndizoomuyanduula aakati kazyuulu* zyoonse zyamaJuda.”
24 Nkinkaako, bakazwa bayinka kuZifi kabali kunembo lyaSawulu chiindi Davida abaalumi mbaakalaabo nibakali munkanda yaMayoni ku-Arabba, kubbazu lyakumusanza kwaJeshimoni. 25 Mpawo Sawulu wakasika abaalumi mbaakalaabo kuti bazoomuyanduule. Davida naakabuzigwa makani aaya, chakufwambaana wakakunukila kubbwe pati mpawo wakaakukkala munkanda yaMayoni. Sawulu naakazimvwa, wakaandilila Davida kunkanda yaMayoni. 26 Sawulu naakazida kulilimwi bbazu lyachilundu, Davida abaalumi mbaakalaabo bakali kulilimwi bbazu lyachilundu. Davida wakali kweezya amanguzu aakwe woonse kuchija Sawulu, pesi Sawulu abaalumi mbaakalaabo bakali baba aafwiifwi kuti beenzye Davida abaalumi mbaakalaabo akuti babajate. 27 Pesi mutumwa wakasika kuli Sawulu mpawo wakati: “Fwambaana kuza, nkaambo maFilisiti basika kuti bazoolwane muunzi!” 28 Naakamvwa oobo, Sawulu wakaleka kwaandilila Davida mpawo wakayinka kuyoolwana maFilisiti. Eezi nzizyo zyakapa kuti ndawu eeyi yaambwe kuti Bbwe Pati Lyakwaanzaana.
29 Mpawo Davida wakazwa aandawu eeyo waakukkala kundawu zikataazya kusika ku-Enigedi.