Samiyele Wakusaanguna
24 Sawulu mbaakaboola biyo kuzwa kukwaandilila maFilisiti, bakamubuzya kuti: “Bona! Davida uli munkanda ya-Eni-gedi.”
2 Sawulu wakabweza baalumi bali 3 000 bakali basalwa aakati kama-Israyeli boonse mpawo wakayinkaabo kuti bakayanduule Davida abaalumi mbaakalaabo mumabwe aali mumajeleele,* mukkala mpongo zyamumalundu. 3 Sawulu wakasika kumabondo aambelele aakayakidwe aamabwe aakali mumbali aanzila, ooko kwakali mpako yabbwe mpawo wakanjila mumpako kuti aligwasye.* Aachiindi nchicheecho, Davida abaalumi mbaakalaabo bakakkede kumamanino aampako. 4 Baalumi mbaakalaabo Davida bakati kulinguwe: “Sunu mbuzuba Jehova mbalikukubuzya kuti, ‘Bona, ndabikka sinkondonyokwe mukuboko kwako alubo ulakonzya kumuchitila kufumbwa nzubona kuti zilikabotu.’” Nkinkaako, Davida wakanyampuka mpawo wakawunenga chuumunizi mupeto wajansi lyaSawulu litakwe maboko. 5 Pesi Davida naakachita oobo, moyo wakwe wakayinkilila kunembo kumukataazya akaambo kakuti wakali wanenga mupeto wajansi lyaSawulu litakwe maboko. 6 Davida wakabuzya baalumi mbaakalaabo kuti: “Tazili kabotu pe mumeso aaJehova kuti ndichite chintu chili boobu kuli simalelaangu, munanike waJehova, kuti nditandabike kuboko kwangu kuti ndimulwane, nkaambo munanike waJehova.” 7 Kwiinda mumajwi aaya, Davida wakabakasya* baalumi mbaakalaabo alubo taakabazumizya pe kuti balwane Sawulu. Nkinkaako, Sawulu wakazwa mumpako yabbwe mpawo wakeenda.
8 Kuzwa waawo, Davida wakanyampuka, wazwa mumpako yabbwe alubo wakayita Sawulu kati: “Mwaami, simalelaangu!” Sawulu naakacheba, Davida wakavuntama busyu kabulangide aansi. 9 Davida wakati kuli Sawulu: “Nkamboonzi nulikuswiilila majwi aabantu baamba kuti, ‘Bona! Davida uyanda kukulwana’? 10 Sunu biya meso aako alibonena Jehova mbaakubikka mukuboko kwangu mumpako yabbwe. Pesi umwi muntu naamba kuti ndikujaye, ndakufwida luzyalo mpawo ndaamba kuti, ‘Tandikoonga ndatandabika kuboko kwangu kuti ndilwane simalelaangu, nkaambo munanike waJehova.’ 11 Bona ndeende, ndijisi mupeto wajansi lyako litakwe maboko mukuboko kwangu, pesi nindanenga mupeto wajansi lyako litakwe maboko, teendakujaya pe. Lino wabona alubo waziba kuti tandikwe makanze aakukulwana naakuti aakukubukila akuti teendakakubisizya pe, pesi iwe ulikundivwima kuti undijaye. 12 Jehova abeteke aakati kangu anduwe alubo Jehova abe nguwe uubweedezya chibi kulinduwe akaambo kangu, pesi ime tandikookulwana pe akuboko kwangu. 13 Mbuli mbukaamba kasimpi kachiindi kakuti, ‘Bubi buzwa kubantu babi,’ pesi ime tandikookulwana pe akuboko kwangu. 14 Ngwani biya ngwalikuyanduula mwaami wa-Israyeli? Ngwani ngwalikwaandilila? Munkala uufwide na naakuti ntantabwa iimwi kupela? 15 Jehova abe mubetesi alubo uzoobeteka makani aakati kangu anduwe, uzookabona kaambo kangu akundiiminina alubo uzoondibeteka akundivuna mukuboko kwako.”
16 Davida naakamaninsya kwaamba majwi aaya, Sawulu wakati: “Ndijwi lyako na eeli mwanaangu Davida?” Mpawo Sawulu wakasaanguna kulila loko. 17 Wakati kuli Davida: “Iwe uliluleme kwiinda ndime, nkaambo wandichitila zintu zilikabotu, pesi ime ndakuchitila bubi. 18 Sunu wandibuzya chintu chibotu nchwaandichitila kwiinda mukutandijaya chiindi Jehova naandibikka mukuboko kwako. 19 Nkaambo ngwani uunga wajana sinkondonyina mpawo amuleke kuti ayinke katamuchiside pe? Jehova uzookuchitila zintu zibotu akaambo kazintu nzwaandichitila sunu. 20 Lino bona! Kwaamba choonzyo, ndilizi kuti uzooyendelezya kuli mwaami akuti bwaami bwa-Israyeli buzooyinkilila kunembo kabuli mukuboko kwako. 21 Lino, konka kulindime kwiinda muli Jehova kuti tuzoobamaninsyi pe bazukulu bangu akuti tuzoolilobyi pe zina lyangu aakati kang’anda yandeende.” 22 Nkinkaako, Davida wakakonka kuli Sawulu. Kuzwa waawo, Sawulu wakayinka kung’anda, pesi Davida abaalumi mbaakalaabo bakayinka kundawu iikwabilidwe.