Samiyele Wakusaanguna
25 Nikwakayinda chiindi, Samiyele wakafwa alubo ma-Israyeli boonse bakabungana kuti bamulile akuti bamuzikke kung’anda yakwe kuRama. Mpawo Davida wakanyampuka kuti aye kunkanda yaParani.
2 Kwakali umwi mwaalumi kuMayoni wakali kubelekela kuKkameli.* Mwaalumi ooyu wakanotede loko. Wakali aambelele zili 3 000 ampongo zili 1 000 alubo aachiindi eecho, wakali kugela mbelele zyakwe kuKkameli. 3 Mwaalumi ooyu wakali kutegwa Nabbali mpawo mwanakazi wakwe wakali kutegwa Abbigeli. Mwanakazi ooyu wakali musongo alubo kali mubotu, pesi mulumaakwe, ooyo wakali kuzwa mumpuli yaKkalebbu, wakali aalunya abuntu bubi. 4 Davida naakali munkanda, wakamvwa kuti Nabbali wakali kugela mbelele zyakwe. 5 Nkinkaako, Davida wakatuma balombe bali kkumi kulinguwe alubo wakababuzya kuti: “Amutante muye kuKkameli mpawo nimwasika kuli Nabbali mukamujuzye muzina lyangu. 6 Mpawo mwaambe kuti: ‘Upone kwachiindi chilamfu alubo upone kabotu,* bamung’anda yako bapone kabotu azintu zyako zyoonse zikweendele kabotu. 7 Ndamvwa kuti ulikugela mbelele zyako. Beembeli bako nibakali aandiswe, teetwakabachitila chintu chibi pe alubo taakwe nchibakabula pe chiindi choonse nibakali kuKkameli. 8 Buzya kubalombe bakubelekela balakubuzya. Balombe mbindeendaabo abafwidwe luzyalo mumeso aako, nkaambo twasika aachiindi chibotu.* Ndikumbila kuti upe babelesi bako amwanaako Davida kufumbwa nchulaacho.’”
9 Balombe baDavida bakayinka baakubuzya Nabbali makani woonse aaya muzina lyaDavida. Nibakamaninsya kwaambuula, 10 Nabbali wakasandula babelesi baDavida kuti: “Davida ngwani biya alubo mwana waJese ngwani biya? Mazubaano babelesi biingi balikuchija basimalelaabo. 11 Nga ndilabweza chinkwa changu amaanzi aangu anyama njindakajayila basikugela mbelele zyangu mpawo ndizipe bantu mbinditazi biya pe kuti bazwa kuli?”
12 Nibakamvwa oobo, balombe baDavida bakabweeda baakumubuzya majwi aaya woonse. 13 Aachiindi nchicheecho, Davida wakabuzya baalumi boonse mbaakalaabo kuti: “Muntu woonse abweze panga lyakwe!” Nkinkaako, boonse bakabweza mapanga aabo, anguwe Davida wakabweza panga lyakwe. Davida wakayinka aabaalumi bakachisike ku 400 mpawo bamwi bali 200 bakasyaala kabali kulinda zibbudu.
14 Aachiindi nchicheecho, umwi mubelesi wakabuzya Abbigeli mwanakazi waNabbali kuti: “Bona! Davida watuma batumwa kuzwa kunkanda kuti bazoojuzye simaleleesu, pesi wabatukila. 15 Baalumi aabo bakatujata kabotu loko. Teebakatuchitila chintu chibi pe alubo taakwe chintu nichiba chimwi nchitwakabula chiindi choonse nitwakalaabo musokwe. 16 Bakali mbuli muduli uutukwabilila kumabazu woonse mansiku asikati, chiindi choonse nitwakalaabo katuli kweembela butanga. 17 Bona nzutachite, nkaambo penzi lilikumuzida simaleleesu abamung’anda yakwe boonse mbukunga mwaalumi uutagwasyi,* zyakuti taakwe uukonzya kwaambuulaawe pe.”
18 Chakufwambaana, Abbigeli wakabweza zinkwa zili 200, nongo mpati zyawayini zibili, mbelele zili musanu zifundidwe kale, zilyo zikangidwe zikkwana muzipimyo zyasiya* zili musanu azinkwa zili 100 zyamasaansa aayanikidwe azinkwa zili 200 zyankuyu ziyanikidwe alubo wakabikka zintu zyoonse eezi aamadonki. 19 Mpawo wakati kubabelesi bakwe: “Amutunge kunembo, ime ndilamutobela.” Pesi taakwe nchaakaamba pe kumulumaakwe Nabbali.
20 Abbigeli naakatantide donki kalikukunuka kasitidwe aachilundu, Davida abaalumi mbaakalaabo ambabo bakali kukunuka kabatozya nkwaakali kuzwida mpawo wakabaswaana. 21 Davida wakali kulibuzya kuti: “Ndakabelekela maliminya nindakakwabilila zintu zyoonse zyamwaalumi ooyu munkanda. Taakwe chintu chakwe nichiba chimwi biyo chakabulika, pesi ulikundichitila zintu zibi kakuli ime ndakamuchitila zintu zibotu. 22 Leza abachitile zikozyenie akubayungizizya basinkondonyina baDavida* kuti ndazumizya naba mwaalumi* uumwi wamung’anda yakwe kuti afutuke kusika kuseeni.”
23 Abbigeli naakabona Davida, wakaseluka chakufwambaana aadonki, wavuntama kunembo lyaDavida kalangide aansi. 24 Alubo wakazoovuntama aafwiifwi amawulu aaDavida mpawo wakati: “Simalelaangu, mulandu awube aalindime. Ndizumizye ndimubelesi wako kuti ndaambuule aanduwe alubo swiilila majwi aamubelesi wako. 25 Inche kaka, simalelaangu atabi aandaba aNabbali ooyu uutagwasyi, nkaambo uchita kweendelana azina lyakwe. Nabbali* ndizina lyakwe alubo muntu uutakwe maanu. Pesi ime ndimubelesi wako teendababona pe balombe mbuwatuma simalelaangu. 26 Lino simalelaangu, kwaamba choonzyo, mbuli Jehova mbali muumi anduwe mbuli muumi, nguJehova wakulesya kuba aamulandu waganzi akuti utabweedezyi chibi* akuboko kwako. Basinkondonyokwe abaabo bayanda kukuchitila zintu zibi simalelaangu ababe mbuli Nabbali. 27 Lino chipo* eechi nchindazaacho kuli simalelaangu ime ndimubelesi wako, achipegwe balombe balikukutobela simalelaangu. 28 Inche kaka, ndilekelele mulandu wangu ndimubelesi wako, nkaambo kwaamba choonzyo, Jehova uzoopa kuti ng’anda yasimalelaangu yiinkilile kunembo kayiliwo, nkaambo simalelaangu ulikulwana nkondo zyaJehova alubo taakwe bubi bwakajanwa mulinduwe kwamazuba woonse aabuumi bwako. 29 Kuti umwi muntu wanyampuka kuti akwaandilile kayanda kukujaya, buumi bwasimalelaangu bunookwabilidwe aaJehova Leza wakwe kabuputilidwe muchikwama chabuumi, pesi buumi bwabasinkondonyokwe buzoowaalilwa kule mbuli mabwe aawaalwa aankwisyo. 30 Alubo Jehova natazookuchitile zintu zyoonse zibotu nzyaakakusyomezya simalelaangu akukubikka kuti ube muzulwidi wama-Israyeli, 31 tuzoolisoli* pe mumoyo wako akaambo kakutila ganzi kakutakwe kaambo akulekela kuboko kwasimalelaangu kuti kubweedezye chibi.* Jehova natazookuchitile zibotu simalelaangu, uzoondiyeeye ime ndimubelesi wako.”
32 Naakamvwa oobo, Davida wakati kuli Abbigeli: “Atembawulwe Jehova Leza wa-Israyeli, ooyo wakutuma sunu kuti uzoondiswaane! 33 Alubo Leza akulongezye* akaambo kakuti watondeezya kuti ulaamaanu! Alubo ulongezegwe akaambo kakuti wandilesya kuba aamulandu waganzi sunu akuti nditabweedezyi chibi* amaboko aangu. 34 Nkaambo kwaamba choonzyo, mbuli Jehova Leza wa-Israyeli mbali muumi, ooyo wandilesya kuti nditakuchitili chintu chibi pe, kaansinga teewafwambaana kuza kuti uzoondiswaane, nikuli taakwe mwaalumi* naba uumwi wamung’anda yaNabbali walikunoosyaala kusika kuseeni.” 35 Mpawo Davida wakazitambula zintu nzyaakamweetela Abbigeli alubo wakamubuzya kuti: “Yinka muluumuno kung’anda yako, ndakuswiilizya alubo ndizoozichita nzwaakumbila.”
36 Nikwakayinda chiindi, Abbigeli wakabweeda kuli Nabbali, ooyo wakali kupobola mbuli mwaami kung’anda yakwe alubo wakaliboteledwe* kakoledwe loko. Abbigeli taakamubuzya nichiba chintu chimwi kusika nibwakacha. 37 Kuseeni, Nabbali katachikoledwe, mwanakazi wakwe wakamubuzya zintu eezi. Mpawo moyo wakwe wakaba mbuli wamuntu uufwide alubo wakoona mubili wakwe kawuli wayuma mbuli bbwe. 38 Nikwakayinda mazuba aakachisike kukkumi, Jehova wakawuma Nabbali mpawo wakafwa.
39 Davida naakamvwa kuti Nabbali wafwa, wakati: “Atembawulwe Jehova, ooyo walanga-langa kaambo kangu kakusampawulwa nkundakachitwa aaNabbali akundikasya ime ndimubelesi wakwe kuti nditachiti chibi alubo Jehova wabweedezya bubi mbwaakachita Nabbali aamutwe wakwe!” Kuzwa waawo, Davida wakatumina Abbigeli mulumbe kali kukumbila kuti amukwate. 40 Nkinkaako, babelesi baDavida bakasika kuli Abbigeli kuKkameli bamubuzya kuti: “Davida watutuma kulinduwe kuti tuzookubweze kuti ube mwanakazi wakwe.” 41 Aachiindi nchicheecho, wakanyampuka wavuntama busyu kabulangide aansi mpawo wakati: “Ngoyu muzike wako uutabe mubelesi uunoosanzya mawulu aababelesi basimalelaangu.” 42 Mpawo Abbigeli wakanyampuka chakufwambaana watanta donki lyakwe alubo babelesi bakwe bachanakazi bali musanu bakali kumutobela musule. Wakeendaamwi abatumwa baDavida mpawo wakaba mwanakazi wakwe.
43 Aachiindi eecho, Davida wakakwete Ahinowamu wakuJezriyeli. Nkinkaako, boonse kabali babili bakaba banakazi bakwe.
44 Pesi Sawulu wakali wapa Mikkala, mwanaakwe musimbi mwanakazi waDavida kuli Paliti mwana waLayishi wakuGalimu.