Nehemiya
5 Nikuba oobo, baalumi abanakazi babo bakalila loko, bakali kung’ung’unina babbululu babo maJuda. 2 Bamwi bakali kwaamba kuti: “Tuli biingi, iswe abana besu balombe abasimbi. Nkinkaako, tweelede kujana zilyo kuti tutafwi aanzala.” 3 Bamwi bakali kuti: “Tulikupa myuunda yesu yazilyo ayamisaansa amaanda eesu kuti zibe chijatisyo kuchitila kuti tujane zilyo muchiindi chanzala.” 4 Alubo bamwi bakali kuti: “Twakakweleta mali, mpawo twapa myuunda yesu yazilyo ayamisaansa kuti ibe chijatisyo kuchitila kuti tubbadale mutelo kumwaami. 5 Tuli musyobo uumwi alubo tuli ganzi limwi ababbululu besu, bana besu bali mbuli bana babo, pesi twakatola bana besu balombe abasimbi mubuzike, lino bamwi bana besu basimbi bali mubuzike kale. Tatukwe manguzu pe aakuziimikizya eezi, nkaambo myuunda yesu amisaansa yesu yakaba yabamwi bantu.”
6 Ndakanyema loko nindakamvwa kulila kwabo amajwi aaya. 7 Nkinkaako, ndakaziyeeyesesya zintu eezi mumoyo wangu mpawo ndakabajanina mulandu baalumi balemekwa abatobeli babeendelezi mpawo ndakababuzya kuti: “Umwi awumwi wanu ulikuyanda mpindu yiindilide kuzwa kuli bbululu wakwe?”
Mukuyungizya, ndakapa kuti kube muswaangano mupati akaambo kanzibakachita. 8 Mpawo ndakababuzya kuti: “Twakachita zyoonse nzitukonzya kuti tuule babbululu besu maJuda bakali bawuzigilwa kuli zimwi zisi, pesi lino muyanda kubawuzya na babbululu banu alubo tweelede kubawula kulindinywe na kuti tubaangunune?” Nibakamvwa oobo, bakawumuna wii, babula zyakwaamba. 9 Mpawo ndakati: “Nzimulikuchita tazili kabotu pe. Tamweelede kweenda munzila iitondeezya kuti muyoowa Leza wesu na kuchitila kuti zisi, nkukwaamba basinkondoma, batatusampawuli pe? 10 Mukuyungizya, ime, banike abakulana bangu ababelesi bangu tulikubakweletesya mali azilyo bantu. Tutabakweletesyi katuyanda kuti zize kazili zyazyala pe kaka. 11 Ikaka, sunu biya amubabweedezye myuunda yazilyo, yamisaansa, yama-olifa amaanda aabo kuswaanizya achipanzi chamwaanda* chamali, chazilyo, chawayini mpya, achamafuta nzimuli kuyanda kuti ziboole kazili zyazyala.”
12 Nibakamvwa oobo, bakati: “Tulababweedezya zintu eezi alubo tatukookumbila chintu pe kulimbabo. Tulachita mbuli mbuwaamba.” Nkinkaako, ndakayita bapayizi akupa kuti baalumi aaba bakonke kuchitila kuti babambe chisyomezyo eechi. 13 Mukuyungizya, ndakakunkumuna* nkomo yachigogo changu* mpawo ndakati: “Munzila iikozyenie, Leza wakasimpe akunkumune muntu woonse kuzwa mung’anda yakwe akuzwa kuzintu nzyalaazyo uutabambi chisyomezyo eechi alubo munzila iikozyenie, akunkumunwe asyaale katakwe nchalaacho.” Naakaamba oobo, mbungano yoonse yakati: “Ameni!”* Mpawo bakatembawula Jehova alubo bantu bakachita nzibakasyomezya.
14 Mukuyungizya, kuzwa mubuzuba mwaami naakandibikka kuba mweendelezi wabo munyika yaJuda, kuzwa mumunyaka wachi 20 kusika mumunyaka wachi 32 wabweendelezi bwa-Aritasasita, ime nibaba babbululu bangu, taakwe nitwakalya chakulya cheelela kupegwa mweendelezi kwaminyaka eeyi iili 12. 15 Pesi beendelezi bakandisaangunina, bakali kulemezya bantu alubo buzuba abuzuba bakali kubweza mashekeli* aansiliva aali 40 kuzwa kulimbabo kuti bawule chinkwa awayini. Alubo babelesi babo bakali kudyaaminina bantu, pesi ime teendakachita oobo pe akaambo kakuyoowa Leza.
16 Kuyungizya waawo, andime ndakalijatikizidwe mumulimu wakuyaka muduli ooyu, taakwe muunda ngutwakabweza pe; babelesi bangu boonse bakalibungene nkukooko kuti babeleke mulimu. 17 Kwakali maJuda bali 150 abatobeli bamwaami bakali kulida aatebbulu lyangu kuswaanizya abaabo bakaza kulindiswe kabazwa kuli zimwi zisi. 18 Buzuba abuzuba, ndakali kubambilwa pule wang’ombe uumwi, mbelele mbotu zili musanu ayimwi abayuni, alubo kamwi mumazuba aali kkumi twakalikujana wayini yamisyobo yoonse kayili nyingi loko. Nikuba oobo, taakwe nindakalayilila kuti ndipegwe chakulya cheelela kupegwa mweendelezi nkaambo mulimu ngubakali kubeleka bantu wakali muyumu kale. 19 Ndakakomba kanditi: “O Leza wangu, utandilubi pe alubo ndilongezye,* akaambo kazintu zyoonse nzindakachitila bantu aaba.”