Nehemiya
6 Lino Sanibbalati, Tobbiya, Geshemu mu-Arabbiya abasinkondoma boonse mbubakabuzigwa biyo kuti ndakali ndayakulula muduli akuti teekwakachili myeenya pe mulinguwo nikuba kuti aachiindi eecho teendakalinabikka makoma mumageedi, 2 chakufwambaana, Sanibbalati aGeshemu bakanditumina mulumbe ooyu wakuti: “Kuza tubambe chiindi chakuti tuswaanane muli umwi wamyuunzi iili muntandabale muKkuti* lya-Ono.” Pesi bakakanzide kundichisa. 3 Nkinkaako, ndakatuma batumwa kulimbabo kuti bakababuzye kuti: “Ndilikuchita mulimu mupati loko, tandikonzyi pe kukunuka kuti ndize ooko. Nkaambo kuti ndasiya mulimu ndaza ooko kulindinywe, mulimu ulayimikila.” 4 Bakanditumina mulumbe uukozyenie kwaziindi zine, pesi ndakali kubasandula oobo mpubakali kundibuzya.
5 Mpawo Sanibbalati wakatuma mubelesi wakwe kulindime kali aamulumbe ooyo kwachiindi chamusanu, mubelesi ooyo wakajisi lugwalo lujulidwe mukuboko. 6 Mulugwalo oolo, mwakalembedwe kuti: “Kuli mamvwaamvwa aakati kazisi, anguwe Geshemu ulikwaamba oobo, kuti iwe amaJuda mukanza kupapila. Nzizyo zilikupa kuti uyake muduli. Alubo kweendelana amakani aaya aalikwaambwa, iwe uyanda kuba mwaami wabo. 7 Alubo wakasala bapolofita kuti baambilizye atala anduwe muJerusalema yoonse kuti, ‘Lino muJuda mwaba mwaami!’ Lino makani aaya alabuzigwa mwaami. Nkinkaako, kuza tuzoowambuuzyanie atala ankani eeyi.”
8 Nikuba oobo, ndakamusandula kuti: “Zintu nzulikwaamba taakwe nizyakachitika pe, ulikwaamba zintu nzulikuyeeyela* biya.” 9 Nkaambo boonse bakali kweezya kutuyoosezya kabati: “Maboko aabo alamana nguzu zyakuchita mulimu mpawo tawukoobelekwa pe.” Ndili kukomba kanditi: “Simya maboko aangu.”
10 Mpawo ndakayinka kung’anda yaShemaya mwana waDelaya mwana waMehetabbeli chiindi naakatali kuzwa pe mung’anda yakwe. Wakati: “Atubambe chiindi tuswaanane mung’anda yaLeza wakasimpe mutempele, mpawo tujale milyango yatempele nkaambo balasika bakujaye. Balasika mansiku bakujaye.” 11 Pesi ndakavwiila kuti: “Muntu uuli mbuli ndime weelede kuchija na? Muntu uuli mbuli ndime nga ulanjila mutempele mpawo ayinkilile kunembo kupona? Tandikoonjila pe!” 12 Mpawo ndakaziba kuti teeLeza pe wakali watuma mupolofita ooyu, pesi kuti nguTobbiya aSanibbalati bakali bamuula kuti andiyunge. 13 Wakali wawulwa kuti andiyoosezye akupa kuti ndibisye kuchitila kuti bajane twaambo twakubisya mpuwo yangu kutegwa bandisampawule.
14 Mpawo ndakakomba kanditi: “O Leza wangu, yeeya zyakachitwa aaTobbiya aSanibbalati, kuswaanizya aNowadiya mupolofita wachanakazi abapolofita boonse bakali kukkala kabandiyoosezya.”
15 Nkinkaako, muduli wakamana kuyakwa mubuzuba bwachi 25, mumweezi wa-Eluli,* wakayakwa mumazuba aali 52.
16 Basinkondoma boonse mbubakamvwa biyo, azisi zyoonse zyakatuzyungulukide nizyakawubona, bakaba aabweeme loko. Bakaziba kuti nguLeza wesu wakapa kuti mulimu ooyu uzwidilile. 17 Mumazuba aayo, baalumi balemekwa bamuJuda bakali kutumizya magwalo miingi kuli Tobbiya mpawo Tobbiya wakali kubasandula. 18 MaJuda biingi bakali basyomezya kuti balaba kubbazu lyakwe nkaambo wakali mukwaansa waShekkaniya mwana wa-Ara, alubo mwanaakwe mulombe Jehohanani wakakwete mwana musimbi waMeshulamu mwana waBberekkiya. 19 Alubo chiindi achiindi, bakali kundibuzya zintu zibotu atala anguwe mpawo bakali kumubuzya nzindakali kwaamba. Mpawo Tobbiya wakali kunoonga wanditumizya magwalo aakundiyoosezya.