Nehemiya
1 Ngaya majwi aaNehemiya* mwana waHakkaliya: Mumweezi waKkisilevi* mumunyaka wachi 20, ndakali muShushani* muunzi uukwabilidwe.* 2 Aachiindi eecho, Hanani mwanikaangu* wakazaamwi abamwi baalumi kuzwa kuJuda mpawo ndakabuzya atala ambubakali kupona maJuda bakasyeede, aabo bakazwa mubuzike kuswaanizya amakani aali atala achiimo chaJerusalema. 3 Bakasandula kuti: “Aabo basyeede bakazwa mubuzike ibali muchilikiti* bali muchiimo chiyumu loko, chifwisya bweeme. Miduli yaJerusalema ilidilikide, amageedi aayo akapya mulilo.”
4 Mbundakaamvwa biyo majwi aaya, ndakakkala aansi ndasaanguna kulila akuusa kwamazuba. Ndakali kulyiimya kulya alubo ndakali kukomba kunembo lyaLeza wakujulu. 5 Ndakati: “O Jehova Leza wakujulu, Leza mupati uuyoosya, uubamba chizuminano chakwe, uutondeezya luyando lutamani kuli baabo bamuyanda ababamba milawu yakwe, 6 chenjeka kutwi kwako, meso aako aabe aalindime, uswiilile nkombyo yangu ndimubelesi wako njindili kukomba kulinduwe sunu. Sikati amansiku ndikombela babelesi bako ma-Israyeli kandili kwaamba zibi nzibakakuchitila. Twakakubisizya, ime abamung’anda yandeende. 7 Kwaamba choonzyo, twakakubisizya nkaambo teetwakabamba milawu yako pe, malayilile aako, anzila zyakubeteka nzwaakapa mubelesi wako Mozesi.
8 “Yeeya majwi ngwaakabuzya mubelesi wako Mozesi aakuti: ‘Kuti teemwasyomeka, ndizoomumwayila kubantu bakuli zimwi zisi. 9 Pesi kuti mwaboola kulindime mpawo mwabamba milawu yangu akwiiswiilila, nikuba kuti mwamwayikizyania kusika kumagolelo aajulu, ndiyoomubunganizya nkukooko nkumunoobede akumweeta kundawu njindakasala kuti zina lyangu likkale nkuko.’ 10 Mbabelesi bako alubo mbantu bako mbwaakanuna akuboko kwako kupati kuli aamanguzu. 11 O Jehova, swiilila nkombyo yangu ndimubelesi wako ankombyo yababelesi bako aabo bayandisya kuyoowa zina lyako. Ikaka, pa kuti mubelesi wako azwidilile sunu akupa kuti mwaalumi ooyu andifwide luzyalo.”
Aachiindi eecho, ndakali sikutola zyakunywa kumwaami.