Nehemiya
8 Bantu boonse bakabungana kabali aamakanze aakozyenie mulubuwa lwamuunzi kunembo aaGeedi lyaMaanzi, mpawo bakabuzya Ezra mulembi* kuti ayete bbuku lyaMulawu waMozesi, ooyo Jehova ngwaakalayilila ma-Israyeli. 2 Mubuzuba bwakusaanguna mumweezi wamusanu ayibili, Ezra mupayizi wakeeta bbuku lyaMulawu kunembo lyambungano yabaalumi, banakazi, abantu boonse bakali kukonzya kuswiilila akumvwisisisya zyakali kubalwa. 3 Wakalibalila aajulu mulubuwa lwamuunzi kunembo aaGeedi lyaMaanzi, wakabalila baalumi, banakazi, abantu boonse bakali kukonzya kumvwisisisya, kuzwa kuseeni kusika aakalangabweeseme; mpawo bantu bakali kuswiilisisya majwi aali mubbuku lyaMulawu. 4 Ezra mulembi* wakaliimvwi aajulu aabbimbili lyazisamu lyakapangilidwe muswaangano ooyo; mpawo kumbali lyakwe kubbazu lyakuchilisyo kwakayimvwi Matitiya, Shema, Anaya, Uriya, Hilikkiya, aMaaseya; mpawo kubbazu lyakwe lyakuchimweensi kwakali Pedaya, Mishayeli, Malikkija, Hashumu, Hashi-bbadana, Zakkariya, aMeshulamu.
5 Ezra wakajula bbuku bantu boonse kabalangide, nkaambo wakayimvwi aajulu kwiinda bantu boonse. Naakalijula, bantu boonse bakayimikila. 6 Mpawo Ezra wakatembawula Jehova Leza wakasimpe, Mupati, kuzwa waawo, bantu boonse bakavwiila kuti, “Ameni!* Ameni!” alubo bakatambika maboko aabo kujulu. Mpawo bakakotama, bavuntama kunembo lyaJehova kabalangide aansi. 7 MaLevi, nkukwaamba Jeshuwa, Bbani, Sherebbiya, Jamini, Akkubbi, Shabbetayi, Hodiya, Maaseya, Kkelita, Azariya, Jozabbadi, Hanani, aPelaya bakali kupandulwida bantu Mulawu, bantu nibakayimvwi. 8 Bakayinkilila kunembo kulibalila aajulu bbuku lyaMulawu waLeza wakasimpe, kabawupandulula kabotu-kabotu akusalazya makani aakali kubalwa; nkinkaako, bakagwasya bantu kuti bamvwisisisye zyakali kubalwa.*
9 Nehemiya ooyo wakali mweendelezi* aachiindi eecho, Ezra mupayizi kumwi kali mulembi,* amaLevi bakali kuyiisya bantu, bakabuzya bantu boonse kuti: “Buzuba oobuno bulasalala kuli Jehova Leza wanu. Mutalili pe nikuba koomoka.” Nkaambo bantu boonse bakali kulila nibakamvwa majwi aaMulawu. 10 Mpawo wakati kulimbabo: “Amwiinke mukalye zyakulya zibotu* akunywa zyakunywa zinona, mubape chakulya aabo batakwe nchibalaacho; nkaambo buzuba oobuno bulasalala kuMwaami wesu, mutawusi pe, nkaambo kukondwa kwaJehova ninguzu zyanu.”* 11 MaLevi bakali kuumbulizya bantu boonse kabati: “Amuumune! Nkaambo buzuba oobuno bulasalala, mutawusi pe.” 12 Nkinkaako, bantu boonse bakayinka baakulya akunywa akupana zyakulya akusekelela kupati, nkaambo bakali baamvwisisisya majwi ngibakabuzigwa.
13 Mubuzuba bwachibili, basilutwe bamaanda aamawisi aabantu boonse, bapayizi, amaLevi bakabungana aamwi kuli Ezra mulembi* kuti bayungizye kumvwisisisya majwi aaMulawu. 14 MuMulawu Jehova ngwaakalayilila kabelesya Mozesi, bakajana kakulembedwe kuti ma-Israyeli beelede kukkala muzivututu, muchiindi chapobwe mumweezi wamusanu ayibili, 15 akuti beelede kwaambilizya mumyuunzi yabo yoonse amuJerusalema yoonse kuti: “Amwiinke kuchilawu chili aazilundu mukeete mitabi yama-olifa iili aamatu, mitabi yamipayini, ayaminsamu iitegwa mimayiteli ayatukunka, amitabi yayimwi minsamu kuti muyake zivututu kweendelana azilembedwe.”
16 Nkinkaako, bantu bakayinka baakweeta mitabi kuti bazooliyakile zivututu umwi awumwi aakaluli kang’anda yakwe, kuswaanizya amulubuwa lwamyuunzi yabo, mumabuwa aang’anda yaLeza wakasimpe, mulubuwa lwamuunzi lwaGeedi lyaMaanzi, amulubuwa lwamuunzi lwaGeedi lya-Efremu. 17 Mbungano yoonse yabantu bakaboola kuzwa mubuzike, bakayaka zivututu bakkala mulinzizyo, nkaambo ma-Israyeli taakwe nibakali bachita pobwe eeli munzila iili boobu pe kuzwa mumazuba aaJoshuwa mwana waNuni kuzoosika mubuzuba oobu. Nkinkaako, bakabotelwa loko. 18 Buzuba abuzuba, kwakali kubalwa bbuku lyaMulawu waLeza wakasimpe, kuzwa mubuzuba bwakusaanguna kusika mubuzuba bwamamanino. Alubo bakachita pobwe lyamazuba aali musanu aabili, mpawo mubuzuba bwamusanu aatatu, kwakachitwa muswaangano uuyandikana, kweendelana amulawu.