Nehemiya
9 Mubuzuba bwachi 24 mumweezi ooyo, ma-Israyeli bakabunganaamwi; bakaliimya kulya kabazweete zigogo zyamasaka akulitutila suko. 2 Bana ba-Israyeli bakalipambula kubeenzu boonse, bakanyampuka balyaambilila zibi zyabo amilandu yamawisi. 3 Mpawo bakayimikila mundawu zyabo, balibalila aajulu bbuku lyaMulawu waJehova Leza wabo kwama-awa aatatu* mubuzuba mbuboobo; kwama-awa aambi aatatu, bakali kulyaambilila zibi akukotama kunembo lyaJehova Leza wabo.
4 Jeshuwa, Bbani, Kkadimiyeli, Shebbaniya, Bbuni, Sherebbiya, Bbani, aKkenani, bakayimikila aabbimbili lyamaLevi boompolola ajwi pati kuli Jehova Leza wabo. 5 Mpawo maLevi baswaanizya Jeshuwa, Kkadimiyeli, Bbani, Hashabbinaya, Sherebbiya, Hodiya, Shebbaniya, aPetahiya bakati: “Amunyampuke mutembawule Jehova Leza wanu lyoonse alyoonse mane kukabe kutamani.* Abatembawule zina lyako lilemekwa, lisumpukide kwiinda zilongezyo* zyoonse akutembawula bantu nkubakonzya kupa.
6 “Iwe awulikke nduwe Jehova, nduwe wakalenga majulu, nkukwaamba julu lyamajulu, amakamu aawo woonse, nyika azintu zyoonse zili aalinjiyo, lwizi azintu zyoonse zili mulindulo. Nduwe nuupa kuti zyoonse kazipona alubo makamu aakujulu alakukotamina. 7 Nduwe Jehova Leza wakasimpe, wakasala Abbramu wamugwisya mu-Uri muunzi wamaKkaludiya mpawo wakamupa zina lyakuti Abbrahamu. 8 Wakabona kuti moyo wakwe ulasyomeka kulinduwe, nkinkaako, wakapangana chizuminano anguwe chakuti, we amwanaakwe uzoomupa nyika yamaKkenani, yamaHeti, yama-Amori, yamaPerezi, yamaJebbusi, ayamaGigashi. Wakazuzikizya zisyomezyo zyako nkaambo uliluleme.
9 “Wakaabona mapenzi aamasianene mu-Ijipita, wakakumvwa kulila kwabo kuLwizi Lusalala. 10 Mpawo wakachita zitondeezyo azigambyo kuti usubule Faro, babelesi bakwe boonse, abantu boonse bamunyika yakwe, nkaambo wakalizi kuti bakachita chakulisumpula kubantu bako. Wakalipangila zina lichiliwo kusika sunu. 11 Wakapambula lwizi kunembo lyabo zyakuti bakazubuka lwizi kabeenda aanyika njumu, mpawo wakanikizya bakali kubaandilila mumaanzi aanikide mbuli bbwe lyawaalwa mumaanzi aayenda changuzu. 12 Sikati wakali kubazulwida amusumpuululu wajoba, mansiku wakali kubazulwida amusumpuululu wamulilo kuti ubamunikile nzila njibakeelede kutozya. 13 Alubo iwe wakaseluka wasika aaChilundu chaSinayi, waambuulaabo kuli kujulu mpawo wabapa mbeta ziluleme, milawu yakasimpe,* malayilile amilawu iilikabotu. 14 Wakapa kuti bazibe Sabata lyako lisalala alubo wakabapa milawu, malayilile amulawu kwiinda mumubelesi wako Mozesi. 15 Wakabapa chinkwa chizwa kujulu nibakaba aanzala, wakagwisya maanzi kuzwa mubbwe nibakaba aanyota alubo wakababuzya kuti banjile babweze nyika njwaakakonkezya* kubapa.
16 “Pesi masianene bakalisumpula akuyumya mitwe,* teebakali kwiiswiilila pe milawu yako. 17 Bakakaka kukuswiilila alubo teebakayiyeeya pe milimu yako iigambya njwaakachita aakati kabo, pesi bakayumya mitwe balisalila muzulwidi kuti babweede kubuzike bwabo ku-Ijipita. Pesi iwe nduwe Leza uulibambilide kulekelela, uufwida nsoni, silweetelelo, uutafwambaani kunyema, uuzwide luyando lutamani, teewakabalekelezya pe. 18 Nikuba chiindi nibakalifulila chifanikisyo chamwana wang’ombe kabali kwaamba kuti: ‘Ngoyu Leza wako wakakugwisya mu-Ijipita,’ bakatondeezya kutalemeka kupati. 19 Nikuba oobo, mulweetelelo lwako lupati, teewakabalekelezya pe munkanda. Musumpuululu wajoba teewakazwa pe aalimbabo sikati kuti uubazulwide nzila, nuuba musumpuululu wamulilo mansiku kuti ubamunikile nzila njibakeelede kutozya. 20 Wakabapa muuya wako mubotu kuti babe basongo, teewakabayima pe mana yako. Wakabapa maanzi nibakaba aanyota. 21 Wakali kubapa chakulya munkanda kwaminyaka iili 40, taakwe nchibakabula pe. Zigogo zyabo teezyakazakala pe, amawulu aabo taakazimba pe.
22 “Wakabapa bwaami abantu, wabaabanisya chipanzi chanyika chimwi achimwi zyakuti bakabweza nyika yaSihoni, nkukwaamba nyika yamwaami waHeshibboni anyika ya-Ogi mwaami waBbashani. 23 Wakapa kuti bana babo bavule mbuli nyenyeezi zyakujulu, mpawo wakabeeta munyika njwaakasyomezya masianyinakulu kuti bazooyinjila bayibweze. 24 Nkinkaako, bana babo bakanjila munyika eeyo bayibweza. Wakazunda maKkenani kunembo lyabo aabo bakali kukkala munyika eeyo mpawo wababikka mukuboko kwabo, kuswaanizya abaami babo abantu bamunyika eeyo kuti babachite kufumbwa nzibakali kuyanda. 25 Bakazunda myuunzi iikwabilidwe anyika iili aambolezi. Bakakona maanda aakazwide zintu zibotu zyamisyobo yoonse, zikala zyakasyidwe kale, myuunda yamisaansa, myuunda yama-olifa, aminsamu myiingi iizyala michelo. Bakalya bakkuta baneneya, babotelwa akaambo kabubotu bwako.
26 “Nikuba oobo, teebakakuswiilila pe, bakakupapila akufutatila Mulawu wako.* Bakajaya bapolofita bako bakali kubachenjezya kuchitila kuti bababoozye kulinduwe. Bakatondeezya kutakulemeka kupati. 27 Akaambo kazeezi, wakababikka mukuboko kwabasinkondonyina aabo bakali kukkala kababoombya. Pesi mumapenzi aabo, bakali kulila kulinduwe mpawo wakali kubamvwa kawuli kujulu; akaambo kalweetelelo lwako lupati, wakali kubapa muvuni wakali kubavuna kuzwa kukuboko kwabasinkondonyina.
28 “Pesi chiindi nibakali kujana lugwasyo biyo, bakali kusaanguna lubo kukubisizya mpawo wakali kubalekela mukuboko kwabasinkondonyina bakali kubadyaaminina. Bakali kuboola akukwiita kuti ubagwasye. Wakali kukumvwa kulila kwabo kawuli kujulu alubo chiindi achiindi wakali kubavuna akaambo kalweetelelo lwako lupati. 29 Nikuba kuti wakali kubachenjezya kuchitila kuti baboole kuMulawu wako, bakali kulisumpula akukaka kuswiilila milawu yako. Bakabisya nkaambo teebakabamba malayilile aako, aayo aapa kuti muntu apone kuti waabamba. Pesi Bakakufutatila bayumya mitwe* akukaka kukuswiilila. 30 Wakali kubatondeezya moyo mulamfu kwaminyaka myiingi akubachenjezya amuuya wako kubelesya bapolofita bako, pesi bakali kukaka kuswiilila. Kumamanino, wakababikka mukuboko kwabantu bamuzisi zyakabazyungulukide. 31 Akaambo kalweetelelo lwako lupati, teewakabalobya pe nikuba kubalekelezya nkaambo nduwe Leza siluzyalo asilweetelelo.
32 “O Leza wesu, Leza mupati, singuzu, uugambya, uubamba chizuminano chakwe, akutondeezya luyando lutamani, utawubaansyi buyumu-yumu boonse bwakatusikila abaami besu, basilutwe besu, bapayizi besu, bapolofita besu, masianene abantu bako boonse kuzwa mumazuba aabaami ba-Asiriya kusika sunu. 33 Walikutondeezya kuti uliluleme muli zyoonse zyalikutusikila, nkaambo wakatondeezya kuti ulasyomeka, pesi iswe ndiswe nitwakachita zintu zibi. 34 Baami besu, basilutwe besu, bapayizi besu, amasianene teebakawubamba pe Mulawu wako nikuba kuswiilila milawu niziba ziyeezyo* zyako, eezyo nzwaakabachenjezya atala anzizyo. 35 Nikuba nibakali kulyeendelezya akujana zilongezyo* zyiingi nzwaakabapa, kabakkala munyika mpati iili aambolezi njwaakabapa, teebakakubelekela pe. Bakaliswini kuchita zintu zibi. 36 Sunu tuli bazike—kwaamba choonzyo, tuli bazike munyika njwaakapa masianene kuti balye michelo yayo azintu zyayo zibotu. 37 Butebuzi bwayo bwaba bwabaami aabo mbwaakabikka kuti batweendelezye akaambo kazibi zyesu. Balikweendelezya mibili yesu alubono lwesu mbuli mbubayanda, tuli mupenzi pati loko.
38 “Akaambo kazyoonse eezi, tulikupanga chizuminano chisimide kwiinda mukuchilemba. Chilasimisigwa kwiinda mukubikkwa chidindo chabasilutwe besu, maLevi eesu, abapayizi besu.”