Nehemiya
13 Mubuzuba oobo, bbuku lyaMozesi lyakabalwa bantu kabamvwide, mpawo kwakajanika kakulembedwe kuti taakwe mu-Amoni naba muMowabbu weelede kunjila mumbungano yaLeza wakasimpe, 2 nkaambo teebakapa ma-Israyeli chinkwa amaanzi, pesi bakawula Bbalamu kuti abatuke. Nikuba oobo, Leza wakachincha lutuko lwakwe kuti lube chilongezyo.* 3 Mbubakaamvwa biyo majwi aaMulawu, bakasaanguna kupambula bantu boonse bakuli zimwi zisi* kuzwa aakati kama-Israyeli.
4 Kazitanachitika eezi, mupayizi wakali kulanga maanda aakubikkila zintu* aang’anda* yaLeza wesu, wakali Eliyashibbu bbululu waTobbiya. 5 Wakamupa ng’anda mpati yakubambila zintu,* chiindi njibakali kubikkila zipo zyazilyo, tununkilizyo tutuba, zibelesyo, chakkumi chazilyo, chawayini mpya, achamafuta, eezyo zyakali zyamaLevi, bayimbi, abalindi bamageedi, kuswaanizya azipo zyakali kupegwa kuti zibe zyabapayizi.
6 Chiindi choonse eechi, teendakali muJerusalema pe nkaambo ndakali ndayinka kumwaami mumunyaka wachi 32 wabweendelezi bwaMwaami Aritasasita mweendelezi waBbabbiloni; nikwakayinda chiindi, ndakakumbila mwaami kuti ndibweede. 7 Nindakasika kuJerusalema, ndakabona chintu chibi Eliyashibbu nchaakachita kwiinda mukugwasya Tobbiya. Wakamupa ng’anda yakubikkila zintu yakali mulubuwa lwang’anda yaLeza wakasimpe kuti abelesye. 8 Ndakasola loko mpawo ndakazisowela aanze zintu zyoonse zyaTobbiya zyamung’anda eezyo zyakali mung’anda yakubikkila zintu.* 9 Mpawo ndakapa malayilile, bakasalazya maanda aakubikkila zintu;* mpawo zibelesyo zyamung’anda yaLeza wakasimpe ndakazibweedezya mpuzyakabede, aamwi azipo zyazilyo atununkilizyo tutuba.
10 Ndakajana kuti maLevi teebakali kupegwa pe zyaabilo zyabo, mpawo maLevi abayimbi bakali kubeleka mulimu bakali beenda, umwi awumwi kaya kumuunda wakwe. 11 Nkinkaako, ndakakalalila batobeli babeendelezi, ndakati: “Nkamboonzi ng’anda yaLeza wakasimpe niyalekelezegwa?” Ndakababunganizya ndababweedezya kumilimu yabo. 12 MaJuda boonse bakeeta chakkumi chazilyo, chawayini mpya, achamafuta kuti zibikkwe mumaanda aakubikkila zintu. 13 Mpawo ndakabikka Shelemiya mupayizi, Zadokki mulembi,* aPedaya muLevi kuti balange maanda aakubikkila zintu, aHanani mwana waZakkuri mwana waMataniya kuti abe mugwasilizi wabo, nkaambo baalumi aaba bakali kubonwa kuti balasyomeka. Mulimu wabo wakali wakwaabanisya zintu eezyo kubabbululu babo bachaalumi.
14 Mpawo ndakakomba kanditi: “O Leza wangu, ndiyeeye, utazimi milimu yangu yaluyando lutamani njindachitila ng’anda yaLeza wangu amilimu yeelede kuchitwa aalinjiyo.”
15 Mumazuba aayo, ndakabona bantu bamuJuda kabakanda masaansa mubuzuba bwaSabata, kabali kweeta milwi yazilyo kabayibikka aamadonki alubo bakali kweeta wayini, masaansa, nkuyu azintu zisiyene-siyene zyakuuzya muJerusalema mubuzuba bwaSabata. Nkinkaako, ndakababuzya kuti taakwe chintu nchibeelede kuuzya pe mubuzuba oobu.* 16 Abantu bakuTire bakali kukkala mumuunzi bakali kweeta baswi azintu zyakuuzya zisiyene-siyene kabazyuuzizya bantu bamuJuda abamuJerusalema mubuzuba bwaSabata. 17 Nkinkaako, ndakakalalila baalumi balemekwa bamaJuda, ndakababuzya kuti: “Nchintuunzi eechi chibi nchimuli kuchita, mulikusofwaazya buzuba bwaSabata? 18 Eezi teenzizyo na nzyaakachita masianyookulu zyakapa kuti Leza ayete mapenzi woonse aaya aalindiswe akumuunzi ooyu? Lino mulikuyungizya bukali bwakwe bupati mbwachitilide ma-Israyeli kwiinda mukusofwaazya Sabata.”
19 Mbukwakasaanguna biyo kusiya kumageedi aaJerusalema, Sabata kalitanasaanguna, ndakalayilila kuti milyango ijalwe alubo ndakati tabeelede kwiijula pe kusikila buzuba bwaSabata bwiinde. Ndakabikka babelesi bangu bamwi kumageedi kuchitila kuti kutanjizigwi zintu zyuuzigwa mubuzuba bwaSabata. 20 Nkinkaako, basikuuzya abasikuchinchaanisya zintu zisiyene-siyene bakoona aanze aaJerusalema kamwi naakuti tubili. 21 Ndakabachenjezya akubabuzya kuti: “Moonenaazi kunembo aamuduli?” Kuti muzooyindulule lubo, ndizoomugwisya changuzu. Kuzwa kuchiindi eecho kuya kunembo, teebakazoosika lubo pe muSabata.
22 Mpawo ndakabuzya maLevi kuti beelede kukkala kabalisalazya akuti kabasika kuzoolinda mageedi, kuchitila kuti buzuba bwaSabata bukkale kabusalala. Ndakakomba kanditi: “O Leza wangu, ndiyeeye akaambo kazeezi, ndifwide nsoni kweendelana aluyando lwako lwiingi lutamani.”
23 Mumazuba aayo, ndakabona maJuda bakakwete* banakazi ma-Ashidodi, ma-Amoni, amaMowabbu. 24 Hafu yabana babo bakali kwaambuula chi-Ashidodi mpawo imwi hafu yakali kwaambuula milaka yabantu basiyene-siyene, pesi taakwe naba umwi wabo wakali kukonzya kwaambuula mulaka wamaJuda. 25 Nkinkaako, ndakabakalalila akubachenjezya atala ambeta zyaLeza. Mpawo bamwi baalumi ndakabawuma akubanonkola masusu akupa kuti bakonke muzina lyaLeza kanditi: “Tamweelede kukwatya bana banu basimbi kubana babo balombe, nikuba kuzumizya bana babo basimbi kuti bakwatwe aabana banu balombe naakuti andinywe. 26 Kuchita oobo teenkuko na kwakapa kuti Mwaami Solomoni abisye? Taakwe mwaami wakali mbuli nguwe aakati kazisi zyoonse; wakali kuyandwa aaLeza wakwe, zyakuti Leza wakamubikka kuba mwaami wama-Israyeli boonse. Pesi banakazi bakuli zimwi zisi bakapa kuti naba nguwe abisye. 27 Chibi eechi chipati nchimwachita tachinaba aabuunsi chamvwigwa pe. Mwatondeezya kutasyomeka kuli Leza wesu kwiinda mukukwata banakazi bakuli zimwi zisi.”
28 Umwi wabana baJoyiyada mwana wa-Eliyashibbu mupayizi mupati, wakali waba mukwaansa waSanibbalati muHoroni. Ndakamutanda kunembo lyangu.
29 Ndakakomba kanditi: “O Leza wangu, bayeeye ubasubule, nkaambo bakasofwaazya bupayizi achizuminano chabupayizi achamaLevi.”
30 Mukuyungizya, ndakabasalazya kubusofwaazi boonse bwazimwi zisi alubo ndakabapa milimu bapayizi amaLevi, umwi awumwi kumulimu wakwe, 31 ndakachita mabambe aakuti kakweetwa nkuni aaziindi zibikkidwe akuti kakweetwa michelo iisaanguna kubizwa.
Ndakakomba kanditi: “O Leza wangu, utandilubi pe alubo ndilongezye.”*