Esita
5 Mubuzuba bwatatu, Esita wakazwaata zigogo zyakwe zyabwaami mpawo wakayimikila mulubuwa lwamukati lwang’anda yamwaami* lulangene aang’anda yamwaami. Aachiindi eecho, mwaami wakalikkede aachuuno chabwaami mung’anda yakwe yabwaami kalangide kumanjililo. 2 Mwaami mbaakamubona biyo Namalelo Esita kayimvwi mulubuwa, wakamufwida luzyalo mpawo wakatandabika nkoli yabwaami yangolida yakali mukuboko kwakwe kulinguwe. Esita wakaswena mpawo wiiguma kumutwe wayo.
3 Mwaami wakamubuzya kuti: “Namalelo Esita, niinzi chili kukataazya? Uyanda kukumbilaanzi? Ulazipegwa nzuyanda nikuba kusika kuhafu yabwaami bwangu.” 4 Esita wakasandula kuti: “Kuti kazimubotezya mwaami, asike sunu aHamani kupobwe ndindamubambila.” 5 Mwaami wakati kubabelesi bakwe: “Amukabuzye Hamani kuti aze chakufwambaana mbuli mbaakumbila Esita.” Nkinkaako, mwaami aHamani bakayinka kupobwe ndibakabambilwa aa-Esita.
6 Nibakali aapobwe lyawayini, mwaami wakati kuli Esita: “Uyandaanzi Esita? Ulazipegwa nzuyanda. Uyanda kukumbilaanzi? Ndilakupa kufumbwa nchuyanda kusika kuhafu yabwaami bwangu.” 7 Esita wakasandula kuti: “Nzezi nzindiyanda achikumbizyo changu, 8 kuti mwaami wandifwida luzyalo alubo kazimubotezya kuti andipe nzindiyanda anzindikumbila, mwaami aHamani abaze kupobwe ndinditababambile juunza mpawo ndilachita mbuli mbaamba mwaami.”
9 Mubuzuba oobo Hamani wakazwa kakondedwe alubo kaboteledwe mumoyo. Hamani naakabona Modekkayi kugeedi lyamwaami katali kunyampuka akuzazama kunembo lyakwe, wakamunyemena loko. 10 Nikuba oobo, Hamani wakalijata wayinka kung’anda yakwe. Mpawo wakatuma jwi kuti kwiitwe beenzinyina aZereshi mwanakazi wakwe. 11 Hamani wakalidunda akaambo kabunoti bwakwe bugambya abana bakwe balombe biingi, ambaakali wasumpulwa aamwaami akupegwa chuuno chili aajulu kwiinda bamwi balupati-pati ababelesi bamwaami.
12 Mpawo Hamani wakati: “Mukuyungizya, Namalelo Esita taakwe umwi muntu ngwaatamba kuti asindikile mwaami kupobwe ndyaabambide, kunze kwangu. Ndatambwa lubo kuti ndikabe aamwi anguwe amwaami juunza. 13 Pesi zyoonse eezi tazindibotezyi pe kubona Modekkayi muJuda kakkede aageedi lyamwaami.” 14 Nkinkaako, Zereshi mwanakazi wakwe abeenzinyina boonse bakati kulinguwe: “Layilila kuti kujimpikwe chisamu chilampa makkiyubbiti aali 50.* Mpawo kuseeni ubuzye mwaami kuti Modekkayi aanzikwe aalinchicho. Mpawo wiinke amwaami ukabotelwe kupobwe.” Muzeezo ooyu wakamubotela Hamani. Nkinkaako, wakalayilila kuti kujimpikwe chisamu.