Hosiya
5 “Amumvwe eezi nibapayizi,
Swiilila kaka iwe nung’anda ya-Israyeli,
Swiilila kaka iwe nung’anda yamwaami,
Nkaambo lubeta luswaanizya ndinywe.
Nkaambo mulikakole kuMizipa
Akansabwe kavumbide Tabbori.
3 Ndilimuzi Efremu,
Alubo Israyeli takonzyi pe kundiyuba.
Nkaambo iwe O Efremu, wachita bwaamu,*
Israyeli walisofwaazya.
4 Michito yabo tayibazumizyi pe kuti babweede kuli Leza wabo,
Nkaambo bali aamuuya wabuwuule*
Alubo tabakwe ndaba pe aJehova.
5 Kulisumpula kwa-Israyeli kwapa bukamboni bwakuti uli aamulandu,
Israyeli a-Efremu balebwa aazibi zyabo,
Anguwe Juda walebwa aamwi ambabo.
6 Bakayinka aatanga lyabo lyambelele alyang’ombe kuti bakayanduule Jehova,
Pesi teebakamujana pe.
Wakali wazwa aalimbabo.
7 Teebakasyomeka pe kuli Jehova,
Nkaambo bakazyala bana bamusokwe.*
Mweezi uzoobanyonyoona* azipanzi zyabo.*
8 Lizya mweembo kuGibbeya, lizya mweembo kuRama!
Wompolola loompololo lwankondo kuBbeti-aveni—tutobela nduwe Bbenjamini!
9 O Efremu, uzooba chintu chigambya mubuzuba bwakupegwa chisubulo.
Kwaamba choonzyo, ndapa kuti eezyo zitazoochitikile misyobo yama-Israyeli zizibinkane.
10 Basilutwe baJuda bali mbuli aabo basunzulusya mugaano.
Ndizootila bukali bwangu aalimbabo mbuli maanzi.
11 Efremu wadyaamininwa, wapwayigwa aalubeta,
Nkaambo wakakanzide kutobela sinkondonyina.
12 Ndakali mbuli chuuka chinyonyoona kuli Efremu
Alubo mbuli chintu chibozeka zintu kung’anda yaJuda.
13 Efremu naakabona bulwazi bwakwe, aJuda naakabona chilonda chakwe,
Efremu wakaya ku-Asiriya alubo wakatuma batumwa kumwaami mupati.
Pesi taakakonzya pe kukusilika,
Alubo taakachiponia pe chilonda chako.
14 Ndizooba mbuli mulavu uuchili muniini kuli Efremu,
Ambuli mulavu uuli aamanguzu* kung’anda yaJuda.
Ime ndizoobazavuula-zavuula mpawo ndeende,
Ndizoobabweza alubo taakwe uutazoobavune pe.
15 Ndizooyenda, ndibweede kundawu yangu kusikila bajane zibeelede akaambo kamulandu wabo,
Alubo bazooyanda lugwasyo lwangu.*
Bazoondiyanduula nibanooli mumapenzi.”