Hosiya
6 “Amuze tubweede kuli Jehova,
Nkaambo watuzavuula, pesi uzootuponia,
Watuuma, pesi uzoowanga zilonda zyesu.
2 Uzootubusilizya nikwayinda mazuba aabili.
Uzootubusya mubuzuba bwachitatu,
Mpawo tuzoopone kunembo lyakwe.
3 Tuzoomuziba Jehova, tuzoobeleka changuzu kuti tumuzibe.
Tazooleki pe kuza mbuli mbukutaleki pe kucha,
Uzooza kulindiswe mbuli mvula iiwa,
Mbuli mvula yamamanino iipa kuti nyika itete.”
4 Ndikuchite biyeni Efremu?
Ndikuchite biyeni Juda?
Nkaambo luyando lwanu lutamani luli mbuli mayoba aakuseeni,
Mbuli lume* lufwambaana kumana.
5 Nkinkaako, ndizoobagonka kandibelesya bapolofita.
Ndizoobajaya amajwi aazwa kumulomo wangu.
Alubo mbeta zizoomunika aalindinywe mbuli mumuni.
6 Nkaambo ndiyandisya luyando lutamani,* kutali chipayizyo.
Alubo ndiyandisya luzibo luli atala aLeza, kwiinda zipayizyo zitentwa bukkwene.
7 Pesi bakatyola chizuminano mbuli bantu biyo.
Teebakasyomeka pe kulindime nkukooko.
8 Giliyadi muunzi wabasizibi,
Uzwide kutilwa kwaganzi.
9 Kabunga kabapayizi kali mbuli zigwebenga zibwatilila muntu.
Bajaya bantu mumugwagwa kuShekkemu,
Nkaambo nzibachita zifwisya bweeme.
10 Ndabona chintu chisesemya mung’anda ya-Israyeli.
Efremu ulikuchita buwuule nkukooko.
Israyeli walisofwaazya.
11 Mukuyungizya, iwe O Juda, wabikkilwa chiindi chakutebulwa,
Chiindi ninditazoobunganizye bantu bangu bali mubuzike.”