Hosiya
7 “Chiindi ninditazooponie Israyeli,
Chibi cha-Efremu chizooba aantanganana,
Kuswaanizya abubi bwaSamariya.
Nkaambo bali aalweeno,
Babbi balanjila mumaanda mpawo zigwebenga zilikunyanga bantu zintu aanze.
2 Pesi tabalibuzyi pe mumyoyo yabo kuti ndizoobuyeeya bubi bwabo boonse.
Lino milimu yabo ilibazyungulukide,
Ilikunembo aabusyu bwangu.
3 Bapa kuti mwaami abotelwe abubi bwabo,
Akuti basilutwe babotelwe alweeno lwabo.
4 Boonse biya mbaasimamambe,
Bapya mbuli oveni yasoselwa mulilo asikujika,
Ooyo uuleka kusosela mulilo chiindi namaninsya kukanda fulawa kusikila yafufumuka.
5 Mubuzuba bwamwaami wesu, basilutwe bachiswa
—Balinyemede akaambo kawayini.
Wamvwanana aabasikuseka.
6 Nkaambo baza kabali aamyoyo iipya mbuli oveni.*
Sikujika uloona busiku boonse,
Kuseeni oveni nga ilikupya mbuli mulilo uuvwilima.
7 Boonse balapya mbuli oveni,
Banyonyoona beendelezi* babo.
Baami babo boonse bawa.
Taakwe naba uumwi aakati kabo uundiita.
8 Efremu waliswaanizya aazimwi zisi.
Efremu uli mbuli chinkwa chalawundi chitasandwidwe.
9 Beenzu bamumana manguzu, pesi taakwe nzyazi pe.
Alubo watuba mvwi, pesi we taziboni pe.
10 Kulisumpula kwa-Israyeli kwapa bukamboni bwakuti uli aamulandu,
Pesi teebaboola pe kuli Jehova Leza wabo,
Alubo kazitakwe ndaba pe azintu zyoonse eezi, teebamuyanduula pe.
11 Efremu uli mbuli nziba mfuba-fuba iitakwe maanu.
Bayita Ijipita kuti ibagwasye, bayinka ku-Asiriya.
12 Kufumbwa nkubaya, ndizoobavumba aakansabwe kangu.
Ndizoobaselusya mbuli bayuni bamujulu.
Ndizoobalulamika kweendelana anchenjezyo yakapegwa mbungano yabo.
13 Bali aapenzi nkaambo bandichija!
Abanyonyoonwe nkaambo bandibisizya!
Ndakalilibambilide kubanununa, pesi baamba manwa atala andime.
14 Teebakandiita aamoyo woonse pe kuti ndibagwasye,
Nikuba oobo, bakaliswini kulila aamalo aabo.
Bakali kulinenguula aamibili yabo akaambo kazilyo zyabo awayini mpya.
Balikundibukila.
15 Nikuba kuti ndakabalulamika akusimya maboko aabo,
Balikundibukila, kabakanza kuchita zintu zibi.
16 Bakachincha nzila yabo, pesi kutali kuchintu chisumpukide.*
Teebakali kusyomeka pe mbuli daantambwa lyakatebela.*
Basilutwe babo bazoowa aapanga akaambo kamajwi aabo aakubukila.
Nkinkaako, bazoosampawulwa munyika ya-Ijipita.”