Hosiya
8 “Bikka mweembo kumulomo wako!
Kuli muntu uulikuza mbuli gumbe kuti alwane ng’anda yaJehova,
Nkaambo bakatyola chizuminano changu alubo bakasotoka mulawu wangu.
2 Balikundililila kabati, ‘Leza wesu, iswe tuma-Israyeli tulikuzi!’
3 Israyeli wazikaka zintu zibotu.
Sinkondonyina amwaandilile.
4 Basala baami kutali akaambo kangu.
Basala basilutwe, pesi teendakabaziba pe.
Bapanga zibumbwa kababelesya ngolida yabo ansiliva yabo,
Mpawo eezi zyapa kuti banyonyoonwe.
5 Mwana wang’ombe wako, O Samariya, wakakwa.
Bukali bwangu bwabavutukila.
Kusika lili kabatakonzyi pe kuba bantu batakwe mulandu?*
6 Nkaambo wazwa ku-Israyeli.
Muntu uuli aaluzibo lwakupanga zintu nguwe wakamupanga, pesi tali Leza pe.
Mwana wang’ombe ooyo waSamariya uzoopwayigwa.
7 Nkaambo balikubyala guwo,
Nkinkaako, bazootebula guwo pati.
Taakwe chisiko chizyala zilyo zibizidwe.*
Kufumbwa chisyuuka tachipi kuti kube fulawa pe.
Kuti yabawo, bamuzwakule* bazooyimena.
8 Israyeli uzoomenwa.
Bazooba aakati kazisi,
Mbuli chilongo chitayandikani.
9 Nkaambo bayinka ku-Asiriya mbuli donki lyamusokwe lyeenda aalilikke.
Efremu wabbadala bantu kuti bamuyande.
10 Nikuba kuti babawula kuzwa kubantu bazisi,
Ndizoobabunganizyaamwi.
Bazooswaana mapenzi akaambo kamukuli weetwa aamwaami wabasilutwe.
11 Nkaambo Efremu wayungizya zipayililo kuti abisye.
Zyaba zipayililo zyakwe zyakuti abisye.
12 Ndakamulembela zintu zyiingi zyamulawu wangu,*
Pesi wakazibona mbuli zintu zyeenzu.
13 Bandipa zipayizyo mpawo balya nyama,
Pesi tazimubotezyi pe Jehova.
Lino uzooyeeya mulandu wakwe alubo uzoobapa chisubulo akaambo kazibi zyabo.
Babweeda* ku-Ijipita.
14 Israyeli waluba Mulengi wakwe alubo wayaka matente,
Juda wavuzya myuunzi yakukwabilila.
Pesi ndizootuma mulilo mumyuunzi yakwe,
Alubo uzoonyonyoona ngazi zyamuunzi umwi awumwi.”