Joweli
3 “Nkaambo amubone! Mumazuba aayo akuchiindi eecho,
Nindazooboozya basungwa bamuJuda abamuJerusalema,
2 Ndizoobunganizya bantu bazisi zyoonse
Akubaselusizya muKkuti lyaJehoshafati.*
Ndizoobabetekela nkukooko
Akaambo kabantu bangu alukono lwangu ma-Israyeli,
Nkaambo bakabamwaya aakati kazisi,
Alubo bakaabana nyika yangu.
3 Bakuumina bantu bangu chisale;
Bakali kuuzya mwana mulombe kuti babbadale wuule
Bakali kuuzya mwana musimbi kuti bawule wayini yakunywa.
4 Iwe Tire aSidoni azilawu zyoonse zyaFilisitiya,
Muli aakaamboonzi biya andime?
Muli kundikkwichizya na?
Kuti kamuli kundikkwichizya,
Chakufwambaana ndilapa kuti nzimuyanda kundichitila zize aamitwe yanu.
5 Nkaambo mwakabweza nsiliva yangu angolida yangu,
Alubo zintu zyangu zibotu mwakazibikka mumatempele aanu;
6 Bantu bamuJuda abamuJerusalema mwakabawuzya kumaGrikki
Kuchitila kuti mubatole kule loko achilawu chabo;
7 Lino ndili kubabusya kuti baboole kuzwa kundawu nkumwakabawuzizya,
Ndilapa kuti nzimwakabachitila zize aamitwe yanu.
8 Bana banu balombe abasimbi ndizoobawuzizya maJuda,
Mpawo bazoobawuzizya bantu bakuShebba, chisi chili kule loko;
Nkaambo Jehova lwakwe nguwe waamba.
9 Amwaambilizye zintu eezi aakati kazisi:
‘Amulibambile nkondo!* Amusungwaazye baalumi bali aamanguzu!
Masooja woonse aaswene aafwiifwi, aaswene kuti alwane!
10 Amufule milomo yamaamba aanu kuti ibe mapanga, azyakukwezuuzya minsamu kuti zibe masumu.
Ooyo uutakwe manguzu aambe kuti: “Ndili aamanguzu.”
11 Amusike muzoogwasye, inywe nuzisi zyoonse zizyungulukide, amubungane aamwi!’”
Ikaka Jehova, bantu bako bali aamanguzu baselusizye kundawu eeyo.
12 “Zisi azinyampuke ziye muKkuti lyaJehoshafati;
Nkaambo ooko nkundiyookkala kuti ndibeteke zisi zyoonse zizyungulukide.
13 Amunjizye sikela, nkaambo zilyo zyabizwa.
Amukunuke muzoolyatuuke, nkaambo chikandilo chawayini chazula.
Zibikkilo zyamusinza wamasaansa zyafusuuka, nkaambo bubi bwabo mbwiingi loko.
14 Makamu-makamu ali mukkuti lyakubetekela,*
Nkaambo buzuba bwaJehova buli aafwiifwi mukkuti lyakubetekela.*
15 Izuba amweezi zizoosiya,
Nyenyeezi tazizoomweki pe.
16 Jehova uzoovuluma muZiyoni,
Uzoowompolola muJerusalema;
Julu anyika zizoozuzuma;
Pesi Jehova uzooba mayubilo kubantu bakwe,
Uzooba muduli uukwabilila kuma-Israyeli.
17 Muzooziba kuti ndime Jehova Leza wanu uukkala muZiyoni, chilundu changu chisalala.
Jerusalema uzooba ndawu iisalala,
Beenzu* tabazooyindi lubo pe mulinguwe.
18 Mubuzuba oobo, zilundu zizookunka wayini iinona,
Tulundu tuzookunka malili,
Alubo tulonga twaJuda toonse tuzookunka maanzi.
Kasawu kazookunka kakazwa mung’anda yaJehova,
Kayootilila Kkuti* lyaMinsamu yaMikoka.
19 Pesi Ijipita izooba tongo,
Edomu izooba nkanda iitakkali bantu pe,
Nkaambo zyakalwana bantu bakuJuda,
Akutila ganzi litakwe mulandu munyika yabo.
20 Pesi nyika yaJuda izookkalwa chiindi choonse,
Alubo muunzi waJerusalema uzookkalwa mumazyalani amazyalani.
21 Ganzi lyabo ndindakali kubona kuti lili aamulandu, ndizoolibona kuti talikwe mulandu pe;
Jehova uzookkala muZiyoni.”