Joweli
1 Ndeli jwi lyaJehova lyakasikila Joweli,* mwana waPetuweli:
2 “Amumvwe nibaalu,
Amuswiilile, inywe moonse nimukkala aanyika.
Zintu zili boobu kuli nizyakachitikide na mumazuba aanu
Naakuti mumazuba aamasianyookulu?
3 Amuzibuzye bana banu,
Abana banu abazibuzye bana babo,
Alubo bana babo bazoozibuzye zyalani litobela.
4 Eezyo zyakasiigwa aansozi zinyonyoona, zyakaligwa aansozi zyeenda kazili zyiingi,
Eezyo zyakasiigwa aansozi zyeenda kazili zyiingi, zyakaligwa aansozi zitakwe mababa,
Alubo eezyo zyakasiigwa aansozi zitakwe mababa, zyakaligwa aansozi zilya loko.
5 Amubuke nibakolwi, mulile.
Amoomoke moonse nimunywa wayini,
Nkaambo wayini iinona yagwisigwa kumilomo yanu.
6 Nkaambo chisi chili aamanguzu alubo chili aabantu batabaliki chanjila munyika yangu.
Menyo aacho ali mbuli aamulavu, miyaya yacho ili mbuli yamulavu.
7 Chanyonyoona musaansa wangu akukukunya mukuyu wangu kusikila kuchisiko,
Chayipulula akwiikupula chakumaninina akwiisowela kumbali,
Chasiya tutabi twayo katutuba.
9 Chipo chazilyo achipo chinywigwa zyamana mung’anda yaJehova;
Bapayizi, nkukwaamba babelesi baJehova, balikulila.
10 Muunda wanyonyoonwa, nyika ilikulila;
Nkaambo zilyo zyanyonyoonwa, wayini mpya yayuminina, mafuta amana.
11 Balimi bakataazikana, basikulima misaansa balikulila,
akaambo kawiiti abbali;
Nkaambo butebuzi bwamumuunda bwanyonyooka.
12 Musaansa wayuma,
Mukuyu wapusama.
Mupomegraneti, mukunka amu-epulu,
Minsamu yoonse yamumuunda yayuma;
Nkaambo kubotelwa kwabantu kwachincha kwaba bweeme.
Amunjile moone kamuzweete masaka, inywe nibabelesi baLeza wangu,
Nkaambo chipo chazilyo achipo chinywigwa tazicheetwi pe kung’anda yaLeza wanu.
14 Amwaambilizye* kulyiimya kulya; amwiitilizye muswaangano uuyandikana.
Amubunganizye baalu abantu boonse bakkala aanyika,
Kung’anda yaJehova Leza wanu kuti muzoolilile kugwasigwa aaJehova.
15 Mayoo akaambo kabuzuba oobo!
Nkaambo buzuba bwaJehova buli aafwiifwi,
Buzoosika mbuli lunyonyooko luzwa kuli Singuzuzyoonse!
16 Chakulya teechagwisigwa na kunembo lyesu,
Kubotelwa akukondwa teezyagwisigwa na mung’anda yaLeza wesu?
17 Mbuto* zyanyana kunsi aamafosholo aabo.
Maanda aakubikkila zintu anyonyooka
Matala aabo adilisigwa nkaambo zilyo zyamana.
18 Niziba zivuubwa zilikusinta!
Matanga aang’ombe alikweendengana nkaambo abula machezezyo.
Matanga aambelele oomba akaambo kakubisya kwabo.
19 Ikaka Jehova, ndizooyita nduwe;
Nkaambo mulilo wanyonyoona machezezyo aamunkanda,
Mulilo uuvwilima watenta minsamu yoonse yamusokwe.
20 Nibaba banyama bamusokwe balangilila kulinduwe kuti ubagwasye,
Nkaambo tulonga twamaanzi twayuminina
Mulilo wanyonyoona machezezyo aamunkanda.”