Joweli
2 “Amulizye mweembo muZiyoni!
Amoompolole loompololo lwankondo muchilundu changu chisalala.
Boonse bakkala munyika abazazame,
Nkaambo buzuba bwaJehova bulikuza! Bwaba aafwiifwi!
2 Mbuzuba bwamudima uusiya mbi,
Mbuzuba bwamayoba amudima mupati,
Mbuli mumuni wakubuchedo mbuuboneka aazilundu.
Kuli bantu biingi, bali aamanguzu;
Taakwe nikwakabede bantu bali mbuli mbabo pe;
Alubo taakwe nikutazoobe bantu bali mbuli mbabo pe,
Muminyaka yamazyalani woonse.
3 Kunembo lyabo kuli mulilo uunyonyoona,
Alubo musule lyabo kuli mulilo uuvwilima uulotya.
Nyika iili kunembo lyabo ili mbuli muunda wa-Edeni
Pesi musule lyabo kuli nkanda iitakwe chintu,
Alubo taakwe chikonzya kufutuka.
4 Baboneka mbuli mabbiza,
Alubo bachijaana mbuli mabbiza aankondo.
5 Musindo wabo nibasotooka aajulu aazilundu, uli mbuli wangolo zyankondo,
Uli mbuli kubboloka kwamulilo uuvwilima uunyonyoona makuba.
Bali mbuli bantu bali aamanguzu balibambila nkondo.
6 Bantu bazookataazikana loko akaambo kambabo.
Masyu aabo woonse azookataazikana.
7 Bachijaanina kunkondo mbuli basilumamba,
Batanta muduli mbuli masooja,
Umwi awumwi tazwi pe munzila yakwe,
Alubo tabaleyi pe munzila zyabo.
8 Tabatontaani pe;
Umwi awumwi weenda munzila yakwe.
Kuti zilwanisyo zyawisya bamwi,
Bamwi tababweedi musule pe.
9 Bachijaanina mumuunzi, bachijaana aamiduli.
Batanta aajulu aamaanda, banjilila mumawindo mbuli mubbi.
10 Nyika ilikuteketa kunembo lyabo alubo majulu alikuzuzuma.
Izuba amweezi zyasiya
Nyenyeezi tazichimweki pe.
11 Jehova uzoowompolola kunembo lyankamu yamasooja aakwe, nkaambo nkamu yakwe nimpati loko.
Nkaambo ooyo uuchita nzilyaamba jwi lyakwe uli aamanguzu
Nkaambo buzuba bwaJehova mbupati alubo bulayoosya.
Ngwani uukonzya kulisimya kuli mbubo?”
12 “Nikuba lino,” mbaamba Jehova, “amuboole kulindime amyoyo yanu yoonse,
Kamuli kulyiimya kulya akulila akoomoka.
13 Amudelule myoyo yanu, kutali zigogo zyanu
Amuboole kuli Jehova Leza wanu,
Nkaambo ngusilweetelelo asiluzyalo, tafwambaani kunyema alubo uzwide luyando lutamani,
Uzoochincha muzeezo* atala amapenzi ngalikuyanda kumweetela.
14 Ngwani uuzi, amwi uzoomucheba akuchincha muzeezo
Akumulongezya*
Achipo chazilyo achipo chinywigwa chakupa Jehova Leza wanu?
15 Amulizye mweembo muZiyoni!
Amwaambilizye kulyiimya kulya; amwiitilizye muswaangano uuyandikana.
16 Amubunganizye bantu; amusalazye mbungano.
Amubunganizye madaala;* amubunganizye bana atwana tuchinyonka.
Sikukwata azwe mung’anda yakwe yamukati, anabwiinga* mung’anda yakwe yabwiinga.
17 Bapayizi, nkukwaamba babelesi baJehova
Abalile kabali aakati kang’anda achipayililo kabati:
‘Ikaka Jehova, bafwide nsoni bantu bako;
Utapi kuti lukono lwako lube chisesyo,
Kwiinda mukuzumizya zisi kuti zibeendelezye.
Nkamboonzi bantu nibeelede kwaamba kuti, “Ulikuli Leza wabo?”’
18 Mpawo Jehova uzoosungwaalila nyika yakwe
Akubafwida luzyalo bantu bakwe.
19 Jehova uzoosandula bantu bakwe kati:
‘Ndilikumupa zilyo, wayini mpya amafuta
Muzookkuta choonzyo,
Tandizoopi kuti mube chisesyo aakati kazisi.
20 Muntu wakubbazu lyakunyika ndizoomutandila kule andinywe;
Ndizoomumwayila kunyika njumu iitakkali bantu,
Masooja aakwe aali kunembo* ndizoowatandila kulwizi luli kubuzwezuba*
Alubo aayo aali kusule ndizoowatandila kulwizi luli kububbila.*
Kununka kwakwe kuzoozula ndawu yoonse,
Cheema chakwe chizoozula ndawu yoonse,
Nkaambo Leza uzoochita zintu zipati.’
21 Utayoowi pe, iwe nunyika.
Botelwa alubo ukondwe, nkaambo Jehova uzoochita zintu zipati.
22 Mutayoowi pe nibanyama bamusokwe,
Nkaambo machezezyo aamunkanda azoofwefwema,
Minsamu izoozyala michelo;
Mukuyu amusaansa zizoozyala michelo myiingi loko.
23 Inywe nibana baZiyoni, amubotelwe, mukondwe muli Jehova Leza wanu,
Nkaambo uzoomupa mvula yakumasaangunino yeelede,
Alubo uzoomuwisizya mvula mpati,
24 Mabuwa aakupolela azoozula zilyo zipoledwe
Alubo zikandilo zyawayini zizoozula wayini mpya amafuta,
25 Ndizoomubbadala nzimwakasweekelwaazyo
Muminyaka iilya nikwakalya nsozi zyeenda kazili zyiingi, nsozi zitakwe mababa, nsozi zilya loko ansozi zinyonyoona,
Nkamu yangu mpati njindakatuma aakati kanu.
26 Muzoolya kusikila mukkute,
Alubo muzootembawula zina lyaJehova Leza wanu,
Ooyo wakamuchitila zintu zigambya;
Bantu bangu tabazoofwisigwi bweeme lubo pe.
27 Muzooziba kuti ndili aakati ka-Israyeli
Akuti ndime Jehova Leza wanu, taakwe uumbi pe!
Bantu bangu tabazoofwisigwi bweeme lubo pe.
28 Mpawo ndizootila muuya wangu kubantu bamisyobo yoonse,
Bana banu balombe abana banu basimbi bazoopolofita,
Manene aanu azoolota ziloto,
Alubo balombe bazoobona zilengaano.
29 Nikuba kubazike bangu bachaalumi abachanakazi
Ndizootila muuya wangu aalimbabo mumazuba aayo.
30 Ndizoochita zigambyo mumajulu aanyika,
Kuzooba ganzi, mulilo abusi buunta kuya kujulu.
31 Zuba lizoochinchwa libe mudima amweezi ube ganzi
Buzuba bwaJehova bupati buyoosya kabutanasika.
32 Muntu woonse wiita zina lyaJehova uzoofutulwa;
Nkaambo aaChilundu chaZiyoni amuJerusalema munooli basikufutuka, mbuli mbaakaamba Jehova,
Basikufutuka bakayitwa aaJehova.”