Jona
1 Ijwi lyaJehova lyakamusikila Jona* mwana wa-Amitayi kaliti: 2 “Buka, yinka kuNiniva muunzi mupati ukaambilizye lubeta luli atala anguwo nkaambo bubi bwabo ndabubona.”
3 Pesi Jona wakabuka waya kuTashishi kali kuchija Jehova; wakakunuka waya kuJopa mpawo wakajana bwaato bwakali kuya kuTashishi. Nkinkaako, wakabbadala mali yalweendo mpawo wakatanta kuti ayinke aamwi ambabo kuTashishi, kule aJehova.
4 Mpawo Jehova wakapa kuti kube guwo pati mulwizi mpawo kwakaba mvula iili aaguwo liyoosya mulwizi zyakuti bwaato bwakali bwaamba kunyonyooka. 5 Basikweenzya bwaato bakayoowa loko zyakuti umwi awumwi wabo wakasaanguna kwiita kuli leza wakwe kuti amugwasye. Mpawo bakasaanguna kuzisowela mulwizi zintu zyakali mubwaato kuchitila kuti buube. Pesi Jona wakali wayinka aansi mukati mubwaato, mwaakalandabala woona mpawaawo. 6 Mpawo mupati wabasikweenzya bwaato wakasika kulinguwe akumubuzya kuti: “Woonenaanzi? Buka wiite leza wako! Amwi Leza wakasimpe ulatufwida nsoni kuchitila kuti tutafwi.”
7 Mpawo bakabuzyania kuti: “Amuze tuume chisale* kuchitila kuti tuzibe kuti ngwani wapa kuti tusikilwe penzi eeli.” Nkinkaako, bakawuma chisale mpawo chakawida Jona. 8 Mpawo bakamubuzya kuti: “Ikaka tubuzye, ngwani wapa kuti tusikilwe penzi eeli? Ubeleka mulimuunzi? Uzwa kuli? Uli wakunyika iili? Uli musyoboonzi?”
9 Wakasandula kuti: “Ndili muHebberu, ndiyoowa* Jehova Leza wakujulu, ooyo wakalenga lwizi anyika njumu.”
10 Baalumi aabo nibakamvwa oobo, bakayindilila kuyoowa mpawo bakamubuzya kuti: “Niinzi eechi nchwaachita?” (Baalumi aabo bakaziba kuti wakali kuchija Jehova, nkaambo Jona wakali wababuzya.) 11 Nkinkaako, bakamubuzya kuti: “Tukuchite biyeni kuti lwizi lubatame?” Nkaambo mvula iili aaguwo yakali kuyabuyungizya mulwizi. 12 Wakasandula kuti: “Amundibweze mundiwaalile mulwizi mpawo lwizi lulabatama; nkaambo ndilizizi kuti ndime ndapa kuti musikilwe mvula eeyi iili aaguwo pati.” 13 Nikuba oobo, baalumi aabo bakakwalapula changuzu kuti batole bwaato kunyika njumu, pesi bakakachilwa nkaambo guwo lyamulwizi lyakali kuyabuyungizya kuba aanguzu.
14 Mpawo bakayita Jehova kabati: “O Jehova, ikaka tutafwi pe akaambo kamwaalumi ooyu. Utatupi mulandu pe akaambo kaganzi lyamuntu uutakwe mulandu mbukunga wachita mbuli mbuyanda, O Jehova.” 15 Mpawo bakabweza Jona bamuwaalila mulwizi; kuzwa waawo, lwizi lwakabatama. 16 Mpawo baalumi aabo bakamuyoowa loko Jehova alubo bakapa zipayizyo kuli Jehova akuchita zikonke.
17 Mpawo Jehova wakatuma muswi mupati kuti umene Jona, nkinkaako, Jona wakaba mwida lyamuswi ooyo kwamazuba aatatu amansiku aatatu.