Zefaniya
2 Amubungane, kwaamba choonzyo, amulibunganizye,
Inywe nibantu bamuchisi nimutakwe bweeme.
2 Mulawu kawutanabeleka,
Buzuba kabutanayinda mbuli buungu,
Bukali bwaJehova buyaka mbuli mulilo kabutanamusikila,
Buzuba bwakunyema kwaJehova kabutanamusikila,
3 Amuyanduule Jehova, inywe moonse nibabombe moyo* baanyika,
Inywe nimubamba milawu yakwe* iiluleme.
Amuyanduule bululami, amuyanduule kubomba moyo.*
Amwi mwalikuzoosiswa mubuzuba bwabukali bwaJehova.
4 Nkaambo Gaza uzooba muunzi uusiidwe;
Ashikkeloni uzooba tongo.
Ashidodi uzootandwa zuba kalitwa mwaaba,*
Ekkironi uzoonyukulwa.
5 “Bali aapenzi aabo bakkala kunkomwe yalwizi, chisi chamaKkereti!
Ijwi lyaJehova lyamupa mulandu.
O Kkenani, nyika yamaFilisiti, ndizookunyonyoona,
Zyakuti taakwe muntu uutazoosyaale kakkala mulinduwe pe.
6 Ankomwe yalwizi izooba ndawu yamachezezyo,
Iili aazikala zyabeembeli azibaya zyambelele ziyakidwe aamabwe.
7 Izooba ndawu yabasyeede bamung’anda yaJuda,
Banoolya nkukooko.
Goko banoolala mumaanda aaku-Ashikkeloni.
Nkaambo Jehova Leza wabo uzoobacheba,*
Uzooboozya bantu babo bakali mubuzike.”
8 “Ndakumvwa kusampawula kwaMowabbu akutukila kwama-Amoni,
Aabo basampawula bantu bangu akulidunda kuti balabanyanga chilawu chabo.
9 Kwaamba choonzyo, mbuli mbundili muumi,” mbaamba Jehova wamakamu, Leza wa-Israyeli,
“Mowabbu uzooba mbuli Sodoma,
Ama-Amoni bazooba mbuli Gomora,
Nindawu iimena bbabani, ndikkomba lyamunyo, atongo liliwo lyoonse alyoonse.
Bantu bangu basyeede bazoobanyanga zintu,
Bantu bamuchisi changu bakasyaala bazookona nyika yabo.
10 Eezi nzizyo nzibatazoojane akaambo kakulisumpula kwabo,
Nkaambo bakasampawula akulisumpula kubantu baJehova wamakamu.
11 Jehova uzoopa kuti bayoowe;
Nkaambo uzoonyonyoona* baleza boonse baanyika,
Atusuwa toonse twazisi tuzoomukotamina,*
Kamwi akamwi aandawu yako.
12 Andinywe nima-Itopiya muzoojayigwa aapanga lyangu.
13 Uzootandabika kuboko kwakwe kubbazu lyakunyika akunyonyoona Asiriya,
Alubo uzoopa kuti Niniva ibe tongo, iyume mbuli nkanda.
14 Matanga azoolala mulinguwe, banyama bamusokwe bamisyobo yoonse.*
Sifundwe* anungu zizoowona mansiku aamitwe yamapila aakwe aawide.
Ijwi lizooyimba aawindo.
Kuzooba lunyonyooko kumulyango;
Nkaambo uzoovumbula mapulanga amukkedari aagankaminidwe.
15 Ooyu nguumuunzi wakali kulisumpula, wakakkede kawulyiibide,
Ooyo wakali kulyaambuuzya mumoyo kawuti, ‘Ndindime taakwe uumbi pe.’
Kwaamba choonzyo waba chintu chigambya,
Ndawu mubalala banyama bamusokwe!
Kufumbwa muntu wiinda mulinguwo uzoosiba mulozwi akugunuusya mfayindi yakwe.”