Hagayi
2 Mumweezi wamusanu ayibili, mubuzuba bwachi 21 mumweezi ooyo, ijwi lyaJehova lyakasika kwiinda muli Hagayi mupolofita, kaliti: 2 “Buzya Zerubbabbeli mwana waShelatiyeli mweendelezi waJuda, aJoshuwa mwana waJehozadakki mupayizi abantu boonse kuti: 3 ‘Ngwani uuchisyeede aakati kanu wakabona bulemu bwang’anda* eeyi yachiindi? Iboneka biyeni lino? Tayiboneki aanga njabuyo na kuti twayikozyanisya ayachiindi?’
4 “‘Lino, sima Zerubbabbeli,’ mbaamba Jehova, ‘sima Joshuwa mwana aaJehozadakki, mupayizi.’
“‘Amusime nibantu bamunyika,’ mbaamba Jehova, ‘alubo amubeleke.’
“‘Nkaambo ndili aandinywe,’ mbaamba Jehova wamakamu. 5 ‘Amuyeeye nzindakamusyomezya nimwakazwa mu-Ijipita alubo muuya wangu uchili aakati kanu.* Mutayoowi pe.’”
6 “Nkaambo Jehova wamakamu waamba kuti: ‘Muchiindi chifwiifwi biyo, ndilalizungaania lubo julu anyika alwizi anyika njumu.’
7 “‘Alubo ndizoozungaania zisi zyoonse, mpawo zintu ziyandikana* zyamunyika zyoonse zizoonjila alubo ndizoozuzya ng’anda eeyi abulemu.’ mbaamba Jehova wamakamu.
8 “‘Nsiliva njiyangu, angolida njiyangu,’ mbaamba Jehova wamakamu.
9 “‘Bulemu bwang’anda eeyi bunooli bupati kwiinda bwayakusaanguna,’ mbaamba Jehova wamakamu.
“‘Alubo ndizoopa kuti kube luumuno mundawu eeyi,’ mbaamba Jehova wamakamu.”
10 Mubuzuba bwachi 24 mumweezi wamusanu ayine, mumunyaka wachibili wabweendelezi bwaDariyasi, ijwi lyaJehova lyakasika kumupolofita Hagayi, kaliti: 11 “Jehova wamakamu waamba kuti, ‘Buzya bapayizi atala amulawu kuti: 12 “Kuti muntu wanyampula nyama iisalala muchigogo chakwe, mpawo chigogo eecho chaguma chinkwa naakuti musinza naakuti wayini naakuti mafuta naakuti kufumbwa chakulya, chakulya eecho chilasalala na?”’”
Bapayizi bakasandula kabati: “Peepe!”
13 Mpawo Hagayi wakabuzya kuti: “Kuti umwi muntu uutasalali akaambo kakuguma chidumbu waguma chimwi chazintu eezi, chintu eecho chilasofwaala na?”
Bapayizi bakasandula kabati: “Iiyi, chilasofwaala.”
14 Nkinkaako, Hagayi wakati: “‘Mbuboobu mbubabede bantu aaba alubo mbubo mbuchibede chisi eechi kunembo lyangu,’ mbaamba Jehova, ‘alubo mbuboobu mbiibede milimu yoonse yamaboko aabo; zintu zyoonse nzibatola tazisalali pe.’
15 “‘Pesi lino amubikkile maanu kuli zeezi,* kuzwa sunu kaziya kunembo: Bbwe kalitanabikkwa aajulu aabbwenyina mutempele lyaJehova 16 chakali biyeni chiimo chanu? Umwi naakasika kumulwi wazilyo kalangilila zipimyo zili 20, kwakali zili 10 kupela; alubo umwi naakasika aachikandilo chawayini kalangilila zipimyo zili 50 zyawayini, kwakali zili 20 kupela; 17 Ndakawuma milimu yamaanza aanu yoonse aluuwo lupya ankubi achivulamabwe, pesi taakwe naba uumwi aakati kanu wakaboola kulindime,’ mbaamba Jehova.
18 “‘Amubikkile maanu kulizeezi,* kuzwa mubuzuba oobuno kaziya kunembo, kuzwa mubuzuba bwachi 24 mumweezi wamusanu ayine, kuzwa mubuzuba ntalisyo yatempele lyaJehova niyakabikkwa; amubikkile maanu kuli zeezi: 19 Muli mbuto na mung’anda yakubambila zintu?* Teembubo na kuti misaansa, mikuyu, mipomegraneti ami-olifa teeyakazyala michelo? Kuzwa sunu, ndinoomulongezya.’”*
20 Ijwi lyaJehova lyakasika kachibili kuli Hagayi mubuzuba bwachi 24 mumweezi ooyo kaliti: 21 “Buzya Zerubbabbeli mweendelezi waJuda kuti, ‘Ndilazungaania julu anyika. 22 Ndizoomwaya maami akunyonyoona nguzu zyabwaami bwazisi alubo ndizoonyonyoona ngolo abazitantide, mabbiza abaatantide bazoowa, umwi awumwi uzoojayigwa aapanga lyamweenzinyina.’”
23 “‘Mubuzuba oobo,’ mbaamba Jehova wamakamu, ‘Ndizookubweza iwe numubelesi wangu Zerubbabbeli mwana aaShelatiyeli,’ mbaamba Jehova, ‘alubo ndizoopa kuti ube mbuli ring’i yachidindo nkaambo nduwe ngundasala,’ mbaamba Jehova wamakamu.”