Zakkariya
5 Ndakabusya mutwe lubo, mpawo ndakabona bbuku lyakupeta liyabuuluka. 2 Ngilozi yakandibuzya kuti: “Ubweneenzi?”
Ndakasandula kuti: “Ndibwene bbuku lyakupeta liyabuuluka, lilampa makkiyubbiti* aali 20 mubulamfu amakkiyubbiti aali 10 mubusasa.”
3 Mpawo yakandibuzya kuti: “Oolu ndutuko lulikwiinka munyika yoonse, nkaambo muntu woonse uubba talikusubulwa pe, mbuli mbukulembedwe kubbazu limwi lyabbuku eeli; amuntu woonse uukonka chikonke talikusubulwa pe, mbuli mbukulembedwe kubbazu limbi lyabbuku eeli. 4 ‘Ndalutuma,’ mbaamba Jehova wamakamu, ‘mpawo lulanjila mung’anda yamubbi amung’anda yamuntu uukonka chikonke chakubeja muzina lyangu, lulakkala mung’anda eeyo lwiinyonyoone kuswaanizya amapulanga aayo amabwe aayo.’”
5 Mpawo ngilozi yakali kwaambuula aandime yakaza kunembo yandibuzya kuti: “Langa kujulu ubone kuti niinzi eechiya chiyabweenda.”
6 Nkinkaako, ndakabuzya kuti: “Niinzi?”
Yakasandula kuti: “Eechi nchibikkilo chikkwana efa* chiyabweenda.” Yakayungizya kuti: “Mbuboobu mbubaboneka munyika yoonse.” 7 Mpawo ndakabona kuti vunisyo walawundi wansimbi njumu wakavununwa, mpawo muchibikkilo eecho mwakali mwanakazi wakakkede mukati. 8 Nkinkaako yakati: “Oobu Mbubi.” Mpawo yakatontela mwanakazi ooyo muchibikkilo eecho chikkwana efa, kuzwa waawo, yakajala mulomo wachibikkilo eecho achivunisyo chansimbi ndemu.
9 Ndakalanga kujulu, mpawo ndakabona banakazi babili bakali kuzabuza, kabaza buuluka muluuwo. Banakazi aaba bakali aamababa aali mbuli mababa aamuyuni uutegwa syulamoobe. Mpawo bakanyampula chibikkilo eecho bayinkaacho mumulenga-lenga aakati kajulu anyika. 10 Nkinkaako, ndakabuzya kungilozi yakali kwaambuula aandime kuti: “Bachitola kuli chibikkilo eechiya chikkwana efa?”
11 Yakasandula kuti: “Kunyika yaShina* kukumuyakila ng’anda; mpawo yaakumana kubambwa, uyoobikkwa nkukooko mundawu yakwe iimweelede.”