Zakkariya
6 Ndakabusya mutwe lubo, mpawo ndakabona ngolo zine zyakali kuza kazizwa aakati kazilundu zibili, alubo zilundu eezyo zyakali zyakkopa.* 2 Ngolo yakusaanguna yakali aamabbiza aasalala, ngolo yachibili yakali aamabbiza aasiya. 3 Ngolo yachitatu yakali aamabbiza aatuba, mpawo ngolo yachine yakali aamabbiza aabusenseele alubo aamabata-mabata.
4 Ndakabuzya ngilozi yakali kwaambuula aandime kuti: “Niinzi eezi, O mwaami wangu?”
5 Ngilozi eeyo yakandisandula kuti: “Eeyi myuuya iine yakujulu iiyanda kwiinka niyamana kwiimikila kunembo lyaMwaami wanyika yoonse. 6 Eeyo* iili aamabbiza aasiya ilayinka kuchisi chili kubbazu lyakunyika; mabbiza aatuba alayinka mutala aalwizi; mabbiza aabusenseele alayinka kuchisi chakumusanza. 7 Mpawo mabbiza aamabata-mabata akali aachiyandisyo chakuzwa kuti akeendeende munyika.” Mpawo yakati: “Amwiinke mukeendeende munyika yoonse.” Kuzwa waawo, akasaanguna kweendeenda munyika yoonse.
8 Mpawo yakoompolola kulindime kayiti: “Bona, aayo aalikuya kunyika iili kubbazu lyakunyika, apa kuti muuya waJehova ukkale munyika iili kubbazu lyakunyika.”
9 Ijwi lyaJehova lyakandisikila lubo kaliti: 10 Bweza zintu kuli Helidayi, Tobbija, aJedaya nzibazaazyo kuzwa kubantu bali mubuzike; mpawo mubuzuba oobo, weelede kuzooyinka kung’anda yaJosiya mwana waZefaniya kulaamwi abantu aaba bakazwa kuBbabbiloni. 11 Weelede kubweza nsiliva angolida upange ngwaani yabwaami,* mpawo wiizwaatike kumutwe waJoshuwa mupayizi mupati mwana waJehozadakki. 12 Umubuzye kuti,
“‘Nzezi nzyaamba Jehova wamakamu: “Ngoyu muntu uuli aazina lyakuti Chisyuukila. Uzoosyuuka mundawu yakwe, alubo uzooyaka tempele lyaJehova. 13 Muntu ooyu nguwe uutazooyake tempele lyaJehova, alubo nguwe uutazoopegwe bulemu. Uzookkala aachuuno chakwe chabwaami akweendelezya, alubo uzooba mupayizi aachuuno chakwe chabwaami, mpawo zyuuno eezi zibili* zizoobelekelaamwi muluumuno. 14 Mpawo ngwaani yabwaami* eeyo izooba chiyubulusyo* mutempele lyaJehova chakuyeeya Helemu, Tobbija, Jedaya, aHeni mwana waZefaniya. 15 Abaabo bali kule bazoosika bagwasilizye mukuyaka tempele lyaJehova.” Mpawo muzooziba kuti Jehova wamakamu wandituma kulindinywe. Alubo zintu eezi zizoochitika—kuti mwakkala kamuswiilila jwi lyaJehova Leza wanu.’”