Zakkariya
7 Mumunyaka wachine wabweendelezi bwaMwaami Dariyasi, ijwi lyaJehova lyakasikila Zakkariya mubuzuba bwachine mumweezi wamusanu aayine, nkukwaamba mweezi waKkisilevi.* 2 Bantu bakuBbeteli bakatuma Shareza aRegemu-melekki abaalumi mbaakalaabo kuti bakakombelezye Jehova kuti abafwide luzyalo, 3 kwiinda mukubuzya bapayizi bamung’anda* yaJehova wamakamu abapolofita kuti: “Ndeelede kulila na mumweezi wamusanu akulyiimya kulya, mbuli mbundali kuchita muminyaka myiingi yayinda?”
4 Ijwi lyaJehova wamakamu lyakandisikila lubo kaliti: 5 “Buzya bantu boonse bamunyika abapayizi kuti, ‘Chiindi nimwakali kulyiimya kulya akulila mumweezi wamusanu amumweezi wamusanu ayibili kwaminyaka iili 70, mwakali kulyiimya kulya akaambo kandime na choonzyo? 6 Alubo chiindi nimwakali kulya akunywa, teemwakali kulilida akulinywida lwanu na? 7 Tamweelede kuswiilila majwi ngaakaambilizya na Jehova kabelesya bapolofita bachiindi, chiindi Jerusalema amyuunzi yawo iiwuzyungulukide niyakakkedwe aabantu alubo niyakali muluumuno, achiindi Negebbu aShefela nizyakakkedwe aabantu?’”
8 Ijwi lyaJehova lyakamusikila lubo Zakkariya kaliti: 9 “Nzezi nzyaamba Jehova wamakamu, ‘Amubeteke munzila yabululami bwachoonzyo, alubo amube aaluyando lutamani alweetelelo kuli umwi awumwi. 10 Mutabbidi mukamufu naba muchaala, mweenzu naba muntu uufwaba; alubo mutakanzi kuchitilana zintu zibi mumyoyo yanu.’ 11 Pesi teebakali kubikkila maanu pe, bakandifutatila achaali, alubo bakasinka zigwilinti mumatwi kuti batamvwi. 12 Bakayumya myoyo yabo mbuli dayamondi* alubo teebakawuswiilila pe mulawu* amajwi aayo Jehova wamakamu ngaakatuma kwiinda mumuuya wakwe kabelesya bapolofita bachiindi. Nkinkaako, kwakasika bukali bupati kuzwa kuli Jehova wamakamu.”
13 “‘Mbuli mbubakatali kuswiilila nindakali kwiita,* andime teendakali kuswiilila pe nibakali kwiita,’ mbaamba Jehova wamakamu. 14 ‘Ndakabamwayila muzisi zyoonse nzibakatazi kandibelesya guwo pati, alubo nyika eeyo yakasyaala kayili tongo musule lyabo, kakutachikwe muntu wakali kwiinda naakuti kuboola mulinjiyo; nkaambo bakapa kuti nyika mbotu loko ibe chintu chiyoosya.’”