Makani mabotu aakalembwa aaMateyo
10 Nkinkaako, wakayita basikwiiya bakwe bali 12, mpawo wakabapa manguzu aakutanda myuuya mibi, kuchitila kuti basilike bantu bakali aamalwazi aamisyobo yoonse amachise aamisyobo yoonse.
2 Mazina aabaapostoli bali 12 ngaaya: Wakusaanguna nguSimoni ooyo uutegwa Petro amwanikaakwe Andreya; Jakkobo mwana waZebbediya amwanikaakwe Johane; 3 Filipi aBbatolomeyo; Tomasi aMateyo simutelo; Jakkobo mwana wa-Alifasi aTediyasi; 4 Simoni wakuKkenani,* aJudasi Isikkariyoti, ooyo wakazoomuuzya.
5 Jesu wakatuma aaba bali 12, mpawo wakabapa malayilile aakuti: “Mutayinki pe kumugwagwa wabantu bazisi alubo mutanjili kufumbwa muunzi wamaSamariya, 6 pesi amwiinkilile kunembo kweendela mbelele zisweekede zyamung’anda ya-Israyeli. 7 Mwanooyabweenda, amukambawuke kamuti: ‘Bwaami bwakujulu bwaswena aafwiifwi.’ 8 Amusilike bachiswa, amubusye bafwide, amusalazye basizipele, amutande madimoni. Mwakapegwa kamutabbadede, amupe kamutabbadalisyi pe. 9 Mutabwezi ngolida, niiba nsiliva, niiba kkopa* muzikwama zyanu zyakubikkila mali, 10 nichiba chikwama chakubikkila chakulya mulweendo, niziba zigogo zibili,* naaba manyatela, niiba nkoli, nkaambo mubelesi weelede kupegwa chakulya chakwe.
11 “Kufumbwa muunzi ngumunjila naakuti kawunzi nkimunjila, amuyanduule muntu weelela, alubo mukkale mumo kusikila mukazwe. 12 Nimwanjila mung’anda, amubajuzye bali mumo. 13 Kuti bamung’anda eeyo kabeelela, luumuno lwanu alube aalimbabo, pesi kuti kabateeleli, luumuno lwanu alubweede kulindinywe. 14 Kufumbwa kundawu bantu nkubatamutambuli naakuti nkubataaswiilili pe majwi aanu, nimwazwa aang’anda eeyo naakuti mumuunzi ooyo, amukunkumune lusuko kumawulu aanu. 15 Kwaamba choonzyo, ndimubuzya kuti, Mubuzuba Bwakubetekwa, chisubulo chamuunzi ooyo chinooli chipati kwiinda chaSodoma aGomora.
16 “Amubone! Ndilikumutuma mbuli mbelele aakati kabawumpe, nkinkaako, amuchenjele mbuli nzoka pesi mutabi aamulandu mbuli nziba. 17 Amubachenjelele bantu, nkaambo bazoomutola kunkuta alubo bazoomukwibbuula muzikombelo zyabo. 18 Alubo muzootolwa kunembo lyabeendelezi abaami akaambo kangu, kuchitila kuti bube bukamboni kulimbabo akuzisi. 19 Nikuba oobo, kuti bamutola nkuko, mutakakataazikani pe kuti muzoowambuula biyeni naakuti muzootyeni, nkaambo nzimutakaambuule muzoozipegwa ku-awa njiyeeyo, 20 nkaambo banoowambuula teendinywe kupela, pesi muuya waWuso waambuula kwiinda mulindinywe. 21 Mukuyungizya, mukulana uzoojazya mwanikaakwe, wisi uzoojazya mwanaakwe, alubo bana bazoobukila bazyali babo akupa kuti bajayigwe. 22 Alubo muzoozondwa aabantu boonse akaambo kazina lyangu, pesi ooyo uulisimya kusikila kumamanino, uzoofutulwa. 23 Kuti bamupenzya muli umwi muunzi, amuchijile kuluumbi, nkaambo kwaamba choonzyo, ndimubuzya kuti, tazichiti pe kuti mumaninsye kuzyunguluka myuunzi yamu-Israyeli, Mwanaamuntu katanasika.
24 “Sikwiiya teemupati pe kumuyiisi wakwe alubo muzike teemupati pe kuli simalelaakwe. 25 Sikwiiya akkutisikane akuba mbuli muyiisi wakwe alubo muzike abe mbuli simalelaakwe. Kuti bantu kabayita mwining’anda kuti Bbeluzabbele,* kutegwani abamung’anda yakwe? 26 Nkinkaako, mutabayoowi pe nkaambo taakwe chintu chivumbidwe chitazoovumbulwi alubo taakwe chintu chansiswa chitazoozibinkani. 27 Nzindimubuzya mumudima, amuzyaambe mumumuni alubo nzimumvwa mukuvwiya-vwiya, amuzikambawuke kamuli aatululi twamaanda. 28 Alubo mutabayoowi pe aabo bajaya mubili pesi batakonzyi kujaya buumi. Pesi amuyoowe ooyo uukonzya kunyonyoona buumi amubili muGehena.* 29 Tutiiti tubili tuuzigwa aakamali katakwe ambukabede,* teembubo na? Nikuba oobo, taakwe nikaba kamwi kawidaansi Wuso katazi pe. 30 Pesi naaba masusu aali mumitwe yanu alibalidwe woonse. 31 Nkinkaako, mutayoowi pe, muyandikana loko kwiinda tutiiti twiingi.
32 “Nkinkaako, muntu woonse uundizumina kunembo lyabantu, andime ndizoomuzumina kunembo lyaTaata uuli kujulu. 33 Pesi kufumbwa muntu uundikaka kunembo lyabantu, andime ndizoomukaka kunembo lyaTaata uuli kujulu. 34 Mutabonaanga ndakaza kuzooyeta luumuno aanyika, ndakazida kuzooyeta panga kutali luumuno pe. 35 Nkaambo ndakazida kuzoopa kuti kube kwaanzaana aakati kamwana mulombe awisi, aakati kamwana musimbi abanyina, aakati kamukamwana abanyinazyala. 36 Kwaamba choonzyo, basinkondonyina bamuntu bazooba bantu bamung’anda yakwe. 37 Kufumbwa muntu uuyandisya wisi naakuti banyina kwiinda ndime, tandeeleli pe, alubo kufumbwa muntu uuyandisya mwanaakwe mulombe naakuti musimbi kwiinda ndime, tandeeleli pe. 38 Alubo kufumbwa muntu uutatambuli chisamu chakwe chakupenzezya* akunditobela, tandeeleli pe. 39 Kufumbwa muntu uukwabilila buumi bwakwe, uzoosweekelwa aambubo alubo kufumbwa muntu uusweekelwa aabuumi bwakwe akaambo kangu, uzoobujana.
40 “Kufumbwa muntu uutambula ndinywe, wanditambula andime alubo kufumbwa muntu uunditambula, wamutambula aYooyo wakandituma. 41 Kufumbwa muntu uutambula mupolofita akaambo kakuti mupolofita, uzoojana bulumbu bwamupolofita alubo kufumbwa muntu uutambula muntu uululeme akaambo kakuti uliluleme, uzootambula bulumbu bwamuntu uululeme. 42 Alubo kufumbwa muntu uupa umwi wabaniini aaba nkomeki yamaanzi aakunywa aatontola akaambo kakuti ngusikwiiya wangu, ndimubuzya choonzyo kuti, tazichiti pe kuti azoosweekelwe aabulumbu bwakwe.”