Makani mabotu aakalembwa aaMateyo
14 Aachiindi eecho, Herodi, mweendelezi waBbooma* wakamvwa makani aali atala aJesu, 2 mpawo wakabuzya babelesi bakwe kuti: “Ooyu nguJohane Mubbabbatizi. Wakabusigwa kuzwa kubafu, milimu eeyi iigambya nchiilikuchitika kwiinda mulinguwe.” 3 Herodi* wakali wajata Johane mpawo wamusunga wamubikka mujele akaambo kaHerodiyasi, mwanakazi waFilipi mwananyina. 4 Nkaambo Johane wakali kukkala kamubuzya kuti: “Mulawu tawuzumini pe kuti ukkalaawe.” 5 Pesi, nikuba kuti Herodi wakali kuyanda kumujaya, wakayoowa makamu aabantu nkaambo akali kumubona mbuli mupolofita. 6 Pesi nikwakali kusekelelwa buzuba bwakuzyalwa bwaHerodi, mwana musimbi waHerodiyasi wakazyana kunembo lyabeenzu alubo Herodi wakabotelwa loko, 7 zyakuti wakamusyomezya kwiinda mukukonka kuti ulamupa kufumbwa nchatakumbile. 8 Mpawo musimbi ooyo kali kutobela nzyaakabuzigwa aabanyina, wakati: “Ndipe aano mutwe waJohane Mubbabbatizi kawuli mundido.” 9 Nikuba kuti mwaami wakawusa, pesi akaambo kazikonke zyakwe kuswaanizya abaabo mbaakali kulyaabo,* wakalayilila kuti awupegwe. 10 Nkinkaako, wakatuma bantu mpawo Johane bakamudyunkula mutwe mujele. 11 Mutwe wakwe wakeetwa kawuli mundido mpawo wakapegwa musimbi, mpawo musimbi ooyo wakawutola kuli banyina. 12 Nikwakayinda chiindi, basikwiiya bakwe bakasika bagwisya chidumbu chakwe, mpawo bakamuzikka. Mpawo bakayinka baakubuzya Jesu. 13 Jesu naakamvwa makani aaya, wakazwa nkukooko abwaato waya kundawu iitakwe bantu kuti akabe alikke. Pesi makamu aabantu naakazimvwa, akamutobela amawulu kaazwa mumyuunzi.
14 Naakasika kumbali aalwizi, wakabona nkamu mpati yabantu mpawo wakabeetelela, alubo wakasilika bakali kuchiswa aakati kabo. 15 Pesi nilyakaba goko, basikwiiya bakwe bakasika kulinguwe mpawo bakati: “Ookuno nkulusaka, alubo chiindi chayinka, buzya bantu beende, kuchitila kuti baye mumyuunzi bakalyuulile chakulya.” 16 Nikuba oobo, Jesu wakati kulimbabo: “Tabeelede kweenda pe, inywe amubape chakulya.” 17 Bakati kulinguwe: “Taakwe nchitulaacho pe, kunze kwazinkwa zili musanu abaswi babili.” 18 Mpawo wakati: “Amuzyeete ookuno.” 19 Mpawo wakabuzya bantu kuti bakkale aamasokwe. Mpawo wakabweza zinkwa zili musanu abaswi babili, alubo naakalanga kujulu, wakalumba alubo naakakwamuna zinkwa, wakazipa basikwiiya bakwe mpawo basikwiiya bakazipa bantu. 20 Nkinkaako, boonse bakalya bakkuta, alubo bakabwezelela chakulya chakasyaala mpawo bakazuzya mabbasikiti aali 12. 21 Aabo bakalya, bakali baalumi basika ku 5 000, kutabala banakazi abana. 22 Mbubakamaninsya biyo, wakabuzya basikwiiya bakwe kuti bajane butanta bwaato baye mutala, we naakachili kubuzya bantu kuti beende.
23 Naakamaninsya kubuzya bantu kuti beende, Jesu wakatanta chilundu alikke kuti akakombe. Nikwakasaanguna kusiya wakachili nkukooko, alikke. 24 Aachiindi eecho, bwaato bwakali bwaba kule loko* akwakali nyika njumu alubo bwakali kutontwa changuzu amayuwe nkaambo guwo lyakali kuzwida nkubakali kuya. 25 Pesi ku-awa yachine yakulinda kwamansiku,* wakasika kulimbabo kayabweenda aajulu aalwizi. 26 Nibakamubona kalikweenda aajulu aalwizi, basikwiiya bakakataazikana mpawo bakati: “Niinzi eechi?” Mpawo bakakwiila akaambo kakuyoowa. 27 Pesi aachiindi nchicheecho, Jesu wakaambuulaabo kati: “Amube aachibindi! Ndime, mutayoowi pe.” 28 Mpawo Petro wakati kulinguwe: “Mwaami, kuti kuli nduwe, ndibuzye ndize kulinduwe kandili kweenda aajulu aamaanzi.” 29 Wakati: “Kuza!” Nkinkaako Petro wakazwa mubwaato, mpawo wakeenda aajulu aamaanzi kaya kuli Jesu. 30 Pesi naakalanga guwo, wakayoowa. Alubo naakasaanguna kubbila, wakakwiila kati: “Mwaami, ndivune!” 31 Jesu wakatandabika kuboko kwakwe mpawaawo, wamujata mpawo wakati kulinguwe: “Iwe nuuli aalusyomo luniini, nkamboonzi nwaazumbuuzya?” 32 Nibakanjila mubwaato, guwo lyakamana. 33 Mpawo aabo bakali mubwaato bakamufugamina kabati: “Kwaamba choonzyo uli Mwana waLeza.” 34 Mpawo, bakazubuka basika kunyika iili muGenesareti.
35 Bantu bamundawu eeyo nibakamuziba, bakatuma jwi mumyuunzi yoonse yakali aafwiifwi alubo bakeeta bantu boonse bakali kuchiswa kulinguwe. 36 Mpawo bakamukombelezya kuti bajate mupeto wachigogo chakwe chaajulu alubo aabo boonse bakawujata, bakapona.