Makani Aakalembwa aaLukka
14 Aali chimwi chiindi, Jesu wakayinka kuti akalye kung’anda yawumwi mupati wabaFarisi muSabata alubo bakali kumulangisisya. 2 Lino bona, kunembo lyakwe kwakali umwi mwaalumi wakali aabulwazi bwakuzimba mubili.* 3 Jesu wakabuzya aabo bazi Mulawu abaFarisi kuti: “Zilazumizigwa na amulawu kusilika muSabata naakuti pe?” 4 Pesi bakawumuna. Nkinkaako, wakamujata, wamuponia, wamubuzya kuti ayinke. 5 Mpawo wakati kulimbabo: “Ngwani aakati kanu uunga waleka kufwambaana kugwisya mwanaakwe naakuti ng’ombe yakwe kuti yawida muchikala mubuzuba bwaSabata?” 6 Pesi bakakachilwa kumusandula kumakani aaya.
7 Mpawo naakabona bantu bakatambidwe kabasala kukkala aandawu zilemekwa loko, wakababuzya chimwi chikozyanisyo. Wakati kulimbabo: 8 “Kuti umwi muntu wakutamba kupobwe lyamuchado, utakkali aandawu iilemekwa loko. Amwi kuli umwi muntu uulemekwa kwiinda nduwe uutambidwe anguwe. 9 Mpawo ooyo wakamutamba moonse, ulasika akubuzye kuti, ‘Nyampuka, ooyu akkale mpukkede.’ Mpawo ulanyampuka kuli aabweeme kuti ukakkale aandawu iilangilwaansi loko. 10 Pesi kuti watambwa, yinka ukakkale aandawu iilangilwaansi loko kuchitila kuti aasika muntu wakakutamba akubuzye kuti, ‘Mweenzuma, kakkale aandawu iilemekwa.’ Mpawo eezi zilapa kuti ulemekwe kunembo lyabantu boonse batambidwe mbuli nduwe. 11 Nkaambo muntu woonse uulisumpula, uzoofwiinsigwa alubo kufumbwa muntu uulibombya, uzoosumpulwa.”
12 Mpawo wakabuzya muntu wakamutambide kuti: “Kuti wabamba chakulya chasikati naakuti chagoko, utayiti beenzinyokwe, banike bako, babbululu bako naakuti bantu banotede mbuyakilenaabo. Nkaambo balakonzya kuzookutamba anduwe kabalikukubbadala nzwaakabachitila. 13 Pesi kuti wachita pobwe, tamba bafwaba, balemene, bateendi, aboofu, 14 mpawo ulabotelwa nkaambo tabakwe chakukubbadala pe. Uzoobbadalwa baakubusigwa baluleme.”
15 Umwi wakatambidwe naakamvwa zintu eezi, wakati kulinguwe: “Ulabotelwa ooyo uulya chakulya* muBwaami bwaLeza.”
16 Jesu wakati kulinguwe: “Umwi mwaalumi wakachita pobwe pati lyachilalilo mpawo wakatamba bantu biingi. 17 Nichakaba chiindi chakulya, wakatuma muzike wakwe kuti akabuzye bantu bakatambidwe kuti, ‘Amuze, nkaambo zyoonse zyaba kabotu.’ 18 Pesi boonse bakasaanguna kwaamba twaambo tutamvwikki. Wakusaanguna wakati kulinguwe, ‘Ndakawula muunda alubo ndeelede kwiinka ndikawubone. Undilekelele, tandikookonzya pe kusika.’ 19 Mpawo umwi wakati, ‘Ndakawula zipani zyang’ombe zili musanu alubo ndiya kukuzibona. Undilekelele, tandikookonzya pe kusika.’ 20 Alubo umwi wakati, ‘Ndakakwata lino-lino, nkinkaako tandikoosika pe.’ 21 Nkinkaako, muzike ooyo wakaboola akubuzya simalelaakwe zintu eezi. Mwining’anda wakanyema mpawo wakabuzya muzike wakwe kuti, ‘Fwambaana uye kumigwagwa mipati akutuzila twamumuunzi, ukaze aabantu bafwaba, balemene, boofu abaabo bateendi.’ 22 Nikwakayinda chiindi, muzike wakati, ‘Simalelaangu, ndazichita zyoonse nzwaamba pesi kuchili ndawu.’ 23 Mpawo simalelo wakati kumuzike, ‘Yinka kumigwagwa akutuzila usungwaazye bantu kuti basike kuchitila kuti ng’anda yangu izule. 24 Nkaambo ndikubuzya kuti, aakati kabantu bakatambidwe, taakwe naaba uumwi uutalabile chilalilo changu.’”
25 Makamu aabantu akali kweendaawe, mpawo wakachengunuka wababuzya kuti: 26 “Kuti muntu waza kulindime pesi katazondi* wisi, banyina, mwanakazi wakwe, bana bakwe, bakulana bakwe, banike bakwe nibuba buumi bwakwe, tanoonga waba sikwiiya wangu pe. 27 Kufumbwa muntu uutanyampuli chisamu chakwe chakupenzezya* akuleka kunditobela, tanoonga waba sikwiiya wangu pe. 28 Muchikozyano, ngwani aakati kanu uunga kuti kayanda kuyaka ngazi, takkali aansi saansi kuti alange-lange mali iiyandikana, kuti abone kuti mali njalaayo ilakkwana na kwiiyaka akwiimaninsya? 29 Nkaambo kuti taachita oobo, ulakonzya kuyaka ntalisyo mpawo akachilwe kwiimaninsya alubo bantu boonse balangide balasaanguna kumuseka 30 kabati: ‘Mwaalumi ooyu wakasaanguna kuyaka pesi wakakachilwa kumaninsya.’ 31 Mpali na mwaami uunga kuti kayanda kuya kunkondo, takkali aansi saansi mpawo abuzye basikumupa lulayo kuti abone kuti ulakonzya na kulwana mwaami uuli aamasoja aali 20 000, we kali amasoja aali 10 000? 32 Kuti wabona kuti takookonzya pe, ulatuma bayiminini bakwe kumwaami ooyo kachili kule, kuchitila kuti akumbile kuti babambe luumuno. 33 Munzila iikozyenie, andinywe amuzibe kuti, taakwe naaba uumwi aakati kanu uukonzya kuba sikwiiya wangu kuti taasiya zintu zyakwe zyoonse.
34 “Kwaamba choonzyo, munyo ulikabotu, pesi kuti kawutachilweeli, kujana wachitwa biyeni kuti ulweele lubo? 35 Tawucheeleli pe kuswaanizigwa aaseele* naakuti amanyuwa. Bantu balawusowela kule. Ooyo uuli aamatwi aamvwa, amvwe.”