Makani Aakalembwa aaLukka
18 Mpawo wakayinkilila kunembo kubabuzya chikozyanisyo chitondeezya mbukuyandikana kuti bakkale kabakomba akuti bataleki pe. 2 Wakati: “Muli umwi muunzi, mwakali mubetesi wakatali kuyoowa Leza alubo wakatali kulemeka bantu. 3 Alubo mumuunzi ooyo, mwakali mukamufu wakaswini kayinka kulinguwe kamubuzya kuti, ‘Bona kuti makani ngindilaawo amuntu uuli aakaambo andime abetekwa munzila iiluleme.’ 4 Nikuba kuti kwakayinda chiindi mubetesi ooyo katayandi pe, pesi wakazoolibuzya kuti, ‘Nikuba kuti tandimuyoowi pe Leza akuti bantu tandibalemeki pe, 5 pesi akaambo kakuti mukamufu ooyu ukkala kandikataazya, ndilabona kuti kaambo kakwe kabetekwa munzila iiluleme, kuchitila kuti atanoosiki lubo pe kuzoondikataazya achikumbizyo chakwe.’” 6 Mpawo Mwaami wakati: “Mwazimvwa na nzyaakaamba mubetesi nikuba kuti taluleme pe? 7 Kwaamba choonzyo, Leza takapi kuti batondeezegwe bululami na bantu bakwe basalidwe, aabo bamukwiilila sikati amansiku, kumwi kabatondeezya moyo mulamfu? 8 Ndimubuzya kuti, Leza uzoopa kuti batondeezegwe bululami chakufwambaana. Nikuba oobo, aazoosika Mwanaamuntu uzoolujana na lusyomo luli boobu aanyika?”
9 Alubo wakaamba chikozyanisyo eechi kulibamwi bakali kusyoma bululami bwabo alubo bakali kubona bamwi mbuli kuti tabagwasyi pe. Wakati: 10 “Baalumi babili bakayinka kutempele kuti bakakombe. Umwi wakali muFarisi mpawo umwi wakali simutelo. 11 MuFarisi wakayimikila mpawo wakasaanguna kukomba mumoyo kati, ‘O Leza, ndilakulumba nkaambo tandili mbuli bamwi bantu boonse, masosi, bataluleme, basimamambi naakuti mbuli simutelo ooyu. 12 Ndilalyiimya kulya tubili amviki, ndilapa chakkumi chazintu zyoonse nzindijana.’ 13 Pesi simutelo, kayimvwi kule-kule alubo katayandi nikuba kulanga kujulu, wakaliswini kulyuuma aakaango kati, ‘O Leza, ndifwide luzyalo ime ndisizibi.’ 14 Ndimubuzya kuti, mwaalumi ooyu wakakunuka waya kumuunzaakwe alubo wakabonwa kuti uliluleme kwiinda muFarisi. Nkaambo muntu woonse uulisumpula, uzoofwisigwa bweeme pesi kufumbwa muntu uulibombya, uzoosumpulwa.”
15 Bantu bakali kweeta twana twabo kulinguwe kuti atujate pesi basikwiiya nibakabona zintu eezi, bakasaanguna kubakalalila. 16 Nikuba oobo, Jesu wakayita twana kuti tuze kulinguwe, kati: “Amuleke bana baniini baze kulindime, muteezyi pe kubakasya, nkaambo Bwaami bwaLeza mbwabantu bali boobu. 17 Kwaamba choonzyo, ndimubuzya kuti, kufumbwa muntu uutatambuli Bwaami bwaLeza mbuli mwana muniini, tazoonjili pe mulimbubo.”
18 Mpawo umwi mweendelezi wakamubuzya kuti: “Muyiisi mubotu, ndeelede kuchitaanzi kuti ndikakone buumi butamani?” 19 Jesu wakati kulinguwe: “Nkamboonzi nundiita kuti mubotu? Taakwe muntu mubotu pe kunze kwaLeza alikke. 20 Uliizi milawu yakuti: ‘Utachiti bumambi, utajayi, utabbi, utapi bukamboni bwakubeja, lemeka wuso abanyoko.’” 21 Mwaalumi ooyo wakati: “Milawu yoonse eeyi ndalikwiibamba kuzwa kandichili muniini.” 22 Jesu naakamvwa oobo wakati kulinguwe. “Kuchili chintu chimwi biyo chisyeede kulinduwe: Wuzya zintu zyoonse nzulaazyo, upe bafwaba mpawo ulaba aabunoti kujulu mpawo uze ube mutobeli wangu.” 23 Naakamvwa oobo, wakawusa loko nkaambo wakanotede loko.
24 Jesu wakamulanga mpawo wakati: “Chinooli chintu chiyumu kuti bantu bali aamali banjile muBwaami bwaLeza! 25 Kwaamba choonzyo, nkuuba kuti nkamela yiinde muliso lyanaliti, kwiinda kuti muntu uunotede anjile muBwaami bwaLeza.” 26 Aabo bakamvwa makani aaya bakati: “Ngwani uukonzya kufutulwa?” 27 Mpawo wakati: “Zintu zitakonzeki kubantu, zilakonzeka kuli Leza.” 28 Pesi Petro wakati: “Bona! Twakasiya zintu zyesu mpawo twakutobela.” 29 Jesu wakati kulimbabo: “Kwaamba choonzyo, ndimubuzya kuti, taakwe muntu wakasiya ng’anda naakuti mwanakazi naakuti bakulana naakuti banike naakuti bazyali naakuti bana akaambo kaBwaami bwaLeza 30 uutazoojani zintu eezi kazyiindulwidwe twiingi muchiindi eechino abuumi butamani mubwiime bwazintu buza.”*
31 Mpawo wakatola bali Kkumi Ababili kumbali mpawo wakati kulimbabo: “Amubone! Tulikutanta katuya kuJerusalema alubo zintu zyoonse zyakalembwa kwiinda mubapolofita atala aMwanaamuntu zizoozuzikizigwa.* 32 Muchikozyano, uzootolwa kubantu bazisi, uzoofubaazigwa, akujatwa chalunya alubo uzooswidwa mate. 33 Nibamana kumuuma, bazoomujaya pesi mubuzuba bwachitatu uzoobuka.” 34 Nikuba oobo, teebakazimvwisisisya pe zintu eezi nkaambo majwi aaya akalisisidwe kulimbabo alubo teebakazimvwisisisya pe zintu nzyaakaamba.
35 Jesu naakaba aafwiifwi kuti asike kuJerikko, umwi mwaalumi moofu wakalikkede kumbali aanzila kalikukumbilila. 36 Mpawo wakasaanguna kubuzya zyakali kuchitika nkaambo wakamvwa bantu biingi bakali kwiinda. 37 Mpawo bakamubuzya kuti: “Jesu wakuNazareta ulikwiinda!” 38 Naakamvwa oobo, wakoompolola kati: “Jesu, Mwana waDavida, ndifwide luzyalo!” 39 Bantu bakali kunembo bakasaanguna kumukalalila, kabamubuzya kuti awumune pesi wakayinkilila kunembo koompolola kati: “Mwana waDavida, ndifwide luzyalo!” 40 Mpawo Jesu wakayimikila alubo wakalayilila kuti mwaalumi ooyo ayetwe kulinguwe. Naakasika aafwiifwi, Jesu wakamubuzya kuti: 41 “Uyanda kuti ndikuchitileenzi?” Mwaalumi ooyo wakati: “Mwaami, chita kuti ndibone lubo.” 42 Nkinkaako, Jesu wakati kulinguwe: “Bona lubo. Lusyomo lwako lwakuponia.” 43 Aachiindi nchicheecho, wakabona lubo alubo wakasaanguna kumutobela kalikulumbayizya Leza. Bantu boonse nibakabona zintu eezi, ambabo bakatembawula Leza.